ၽွင်းၵူၼ်းဝၢၼ်ႈၼမ်ႉမူဝ် ပၢႆႈၽေးပၢင်တိုၵ်းယူႇၼၼ်ႉ သိုၵ်းမၢၼ်ႈၶဝ်ႈယူႇၼႂ်းဝၢၼ်ႈသေ ဢဝ်ၵိၼ်ဢဝ်ၸႂ်ႉၶူဝ်းၶွင် ၵူၼ်းမိူင်းလူႉသုမ်းတင်းၼမ်။

တႄႇႁူဝ်လိူၼ်ၵျႅၼ်ႊၼိဝ်ႊရီႊမႃး  SSPP တင်း RCSS  ၶဵင်ႈၶႅင် ပိုတ်းယိုဝ်းတိုၵ်းတေႃးၵၼ်လႄႈ ၵူၼ်းဝၢၼ်ႈၼမ်ႉမူဝ် ဢိူင်ႇၼွင်ႁီး ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ဢွၼ်ၵၼ်ပၢႆႈၽေးသိုၵ်းသိူဝ် ဢမ်ႇယွမ်း 200 လင်ၶႃး ႁိူၼ်း။  

ၽွင်းၼၼ်ႉ သိုၵ်းမၢၼ်ႈသမ်ႉ ၶဝ်ႈယူႇၼႂ်းဝၢၼ်ႈ ဢဝ်ၵိၼ်ဢဝ်ၸႂ်ႉၶူဝ်းၶွင်ၵူၼ်းမိူင်း ၵူၼ်းၸၢႆး ၵေႃႉၼိုင်ႈ ယူႇဝၢၼ်ႈ ၼမ်ႉမူဝ် လၢတ်ႈၽူႈတွႆႇႁွၵ်ႈၼင်ႇၼႆ။

“ၶဝ် (သိုၵ်းမၢၼ်ႈ) သမ်ႉ လၵ်ႉႁႅင်းၼႃႇ၊ ႁူႉတႄႉႁူႉဝႃႈ ပဵၼ်မၢၼ်ႈယဝ်ႉဝႃႈ ဢွၼ်တၢင်း ဢမ်ႇမီးၽႂ် ၶဝ်ႈမိူဝ်းၵေႃႈ ဢမ်ႇမီးၽႂ်လၵ်ႉလူး၊ သိုၵ်းမၢၼ်ႈ တိုၵ်ႉၶဝ်ႈမႃးယူႇ ၽွင်းသုၵ်ႉသၵ်ႉၼႆႉၵူၺ်း ပႆႇမီးလိူၼ်၊ လၵ်ႉၵိၼ်ၵႆႇ၊ လၵ်ႉလဝ်ႈ ၊ လၵ်ႉတၢင်းၵိၼ်တၢင်းယႅမ်ႉၵူၼ်းဝၢၼ်ႈ ယဝ်ႉၶဝ်ႈသွၵ်ႈႁိူၼ်း ၽွင်းၵူၼ်းဝၢၼ်ႈဢမ်ႇယူႇ” – ဝႃႈၼႆ။

ယၢမ်းလဵဝ် သိုၵ်း RCSS ဢဝ်ႁူမ်ႇလူမ်ႈဝႆႉၼႂ်းဝၢၼ်ႈသေ ဢွၵ်ႇပိူင်ႁၢမ်ႈၵူၼ်းဝၢၼ်ႈ ၽွင်းၵၢင်ၶမ်ႈ 8 မူင်းထိုင် ၵၢင်ၼႂ် 6 မူင်း ၽူႈလႂ်ၽႂ် တေဢမ်ႇလႆႈဢွၵ်ႇၼွၵ်ႈႁိူၼ်း ပေႃးဢွၵ်ႇတေယိုဝ်း ဝႃႈၼႆ။

ၵူၼ်းၸၢႆးပိုၼ်ႉတီႈ လၢတ်ႈဝႃႈ -“ႁၢႆတႄႉႁၢႆယူႇ သိုၵ်းသမ်ႉၼမ် မီးပႃးပျီႇတူႉၸိတ်ႉ SSS သေ ၽႂ် ၶဝ်ႈလၵ်ႉၼႆတႄႉ ဢမ်ႇမီးၽႂ်ဝႃႈလႆႈတႄႉတႄႉ တေႃႈလဵဝ် ၾၢႆႇၶူဝ်းလၢႆးဢဝ်ႁူမ်ႇလူမ်ႈဝႆႉသေ လၢတ်ႈဝႃႈ ဝၢႆး 8 မူင်းၵၢင်ၶမ်ႈ ၵၢင်ၼႂ် 6 မူင်း ၽႂ်တေဢမ်ႇလႆႈဢွၵ်ႇၼွၵ်ႈႁိူၼ်း ပေႃးၽႂ်ဢွၵ်ႇမီး ၶႂၢင်ႉသုၼ်ႇယိုဝ်းလႄႈ ဝႃႈၼႆဝႆႉလႄႈ ၵူၼ်းဝၢၼ်ႈဢၼ်ၵိုတ်းဝႆႉတီႈဝၢၼ်ႈၵေႃႈ ၽႂ်ဢမ်ႇႁတ်း ဢွၵ်ႇတင်းၼွၵ်ႈ၊ ၶူဝ်းႁိူၼ်းၶူဝ်းယေးၸိူဝ်းၼႆႉၵေႃႈ ဢမ်ႇႁၢႆယဝ်ႉ”- ဝႃႈၼႆ။

ၵူၼ်းပိုၼ်ႉတီႈလၢတ်ႈထႅင်ႈဝႃႈ – မိူဝ်ႈၵွၼ်ႇ တီႈဝၢၼ်ႈၼမ်ႉမူဝ်ၼႆႉ ဢမ်ႇမီးတပ်ႉသိုၵ်းမၢၼ်ႈ၊ သိုၵ်းမၢၼ်ႈ ၸင်ႇႁႃၶဝ်ႈမႃးယူႇသဝ်း တိုၵ်ႉမီးမွၵ်ႈလိူၼ်ၼႆႉၵူၺ်း။ ၶဝ်မႃးၸွမ်းပျီႇတူႉၸိတ်ႉ SSS ။ SSS တႄႉ ၶဝ်ႈမႃးယူႇၼႂ်းဝၢၼ်ႈမီးမွၵ်ႈ 2 ပီယဝ်ႉ။ ၸဵမ်ႈမိူဝ်ႈ SSPP တႄႇလူင်းမႃးပုၼ်ႉၼေႈ”- ဝႃႈၼႆ။

ယၢမ်းလဵဝ် ပၢင်တိုၵ်းတီႈဝၢၼ်ႈၼမ်ႉမူဝ် သဵင်ၵွင်ႈသဵင်မၢၵ်ႇယဵၼ်ဝႆႉၸူဝ်ႈၶၢဝ်းလႄႈ ၵူၼ်းဝၢၼ်ႈၼမ်ႉမူဝ် ဢၼ်ပၢႆႈ ၽေးသိုၵ်းဝႆႉၼၼ်ႉ ၵၢင်ဝၼ်းမိူဝ်းဢဝ်ထူဝ်ႇႁႄႉ၊ ၵၢင်ၶိုၼ်းတႄႉ ပၢႆႈၵႂႃႇၼွၼ်း ၶိုၼ်းတီႈဝတ်ႉဝႃးၽႃသိူဝ်ႇလႄႈ တီႈ ဢၼ်ၵႂႃႇသွၼ်ႈယူႇဝႆႉ တီႈဝၢၼ်ႈပီႈၽႂ်ၼွင်ႉမၼ်း။ 

ၼၢင်းယိင်း ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ဢၼ်ပိူၼ်ႈဝႃႈ သိုၵ်းၶူဝ်းၶဵဝ် SSPP ၶဝ်ႈမႃး ၼႂ်းဝၢၼ်ႈၼႆၼၼ်ႉတႄႉ ၶဝ်ပႆႇၶဝ်ႈမႃးလႆႈ၊ ၵမ်းပူၼ်ႉၶဝ်ၵႆႉဢဝ် ၶိူင်ႈမိၼ်ၻရူၼ်ႊမႃးယိုဝ်း။ သိုၵ်းၶူဝ်းလၢႆး ယိုဝ်းၵွႆပႅတ်ႈယဝ်ႉ၊ ဢမ်ႇႁူႉဝႃႈ ပၢင်တိုၵ်း တေပဵၼ်ၼႂ်းဝၢၼ်ႈ မိူဝ်ႈလႂ် မၢၵ်ႇတေတူၵ်းတီႈလႂ် ၵူဝ်မႃးတူၵ်းၼႂ်းဝၢၼ်ႈ ယွၼ်ႉၼၼ်လႄႈ ဢမ်ႇႁတ်း ၼွၼ်းၼႂ်းဝၢၼ်ႈ၊ ပေႃး ၵၢင်ဝၼ်းတႄႉ ဢွၼ်ၵၼ် မိူဝ်းတူၺ်းထူဝ်ႇႁႄႉၽႂ်မၼ်းယူႇ”- ဝႃႈၼႆ။

ဝၼ်းတီႈ 15/01/2025 ယၢမ်းႁူဝ်ၶမ်ႈ မၢၵ်ႇလူင်တူၵ်းသႂ်ႇ ႁွင်ႈယူတ်းယႃတူဝ်ၼႂ်းဝၢၼ်ႈၼမ်ႉမူဝ်။ ပၢင်တိုၵ်း တီႈဝၢၼ်ႈ ၼမ်ႉမူဝ်ၼႆႉ ပဵၼ်ႁၢဝ်ႈႁႅင်းမႃး ၸမ်လိူၼ်ယဝ်ႉ။ ၵူၼ်းဝၢၼ်ႈႁူဝ်ၶူဝ်၊ ၵုၼ်သၢႆး၊ ဝၢၼ်ႈပၢင်ႇ၊ ၼမ်ႉဢုတ်ႇ ဢၼ်လႆႈငိၼ်းသဵင်ၵွင်ႈ သဵင်မၢၵ်ႇၸမ်ၼၼ်ႉ ဢွၼ်ၵၼ်ပၢႆႈၶဝ်ႈသွၼ်ႈယူႇ ၼႂ်းဝၢၼ်ႈၼမ်ႉမူဝ် ၵမ်ႈၽွင်ႈ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)