ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလႅင်ႇ လၢတ်ႈၵႂႃႇတီႈပၢင်ပွႆး ဝၼ်းႁပ်ႉတွၼ်ႈပီမႂ်ႇၶႄႇ ဢၼ်ၸတ်းႁဵတ်း တီႈဝဵင်းတႃႈၵုင်ႈ ၼႂ်းဝၼ်းတီႈ 25/1/2025 ၼႆႉဝႃႈ – ၶွပ်ႈၸႂ်ထိုင်မိူင်းၶႄႇ ဢၼ်ၸွႆႈထႅမ်ပၼ် လွင်ႈၼိမ်သဝ်းလႄႈ လွင်ႈႁုၼ်ႈမုၼ်း ၶိုၼ်ႈယႂ်ႇ ၼႂ်းမိူင်းမၢၼ်ႈ ဝႃႈၼႆ။

မၼ်းၸၢႆးလၢတ်ႈဝႃႈ – တေဝႆႉ လွင်ႈၵပ်းသိုပ်ႇၵၼ်တင်းမိူင်းၶႄႇ ပဵၼ်လွင်ႈယႂ်ႇသေ တိူဝ်းႁဵတ်းသၢင်ႈၶူင်း ၵၢၼ်မိူင်းမၢၼ်ႈ –  မိူင်းၶႄႇ ႁူမ်ႈၵၼ်ၵႂႃႇ။ တုၵ်းယွၼ်းႁႂ်ႈမိူင်းၶႄႇ သိုပ်ႇၵမ်ႉၸွႆႈပၼ် ၼႂ်းၶၵ်ႉတွၼ်ႈၵၢၼ်ငမ်းယဵၼ်လႄႈ လွင်ႈ ႁုၼ်ႈမုၼ်းၶိုၼ်ႈယႂ်ႇ ၼႂ်းမိူင်းမၢၼ်ႈ – ဝႃႈၼႆ။

ၽူႈထတ်းသၢင် ၵၢၼ်မိူင်းၵေႃႉၼိုင်ႈ လၢတ်ႈဝႃႈ – မိူင်းၶႄႇ ပၼ်ႁႅင်းၵမ်ႉထႅမ် ပၢင်လိူၵ်ႈတင်ႈ ဢၼ်သိုၵ်းမၢၼ်ႈ တေၸတ်းႁဵတ်း။ တႃႇသိုၵ်းမၢၼ်ႈ တေလႆႈလွင်ႈၵမ်ႉထႅမ်တီႈ ဢႃႊသီႊယၼ်ႊၵေႃႈ တေလႆႈပႃး မိူင်းၶႄႇၵွၼ်ႇ။ ၵွပ်ႈၼၼ်လႄႈ ႁူဝ်ၼႃႈသိုၵ်းမၢၼ်ႈ တိူဝ်းၶဝ်ႈဢွၵ်ႇၵပ်းသိုပ်ႇ ႁႂ်ႈၸမ်ၸႂ်ၵၼ်တင်း မိူင်းၶႄႇ – ဝႃႈၼႆ။

မိူဝ်ႈတႄႇယိုတ်းဢႃႇၼႃႇၼၼ်ႉ သိုၵ်းမၢၼ်ႈ ၶဝ်ႈဢွၵ်ႇၵပ်းသိုပ်ႇ ဢဝ်လွင်ႈၸမ်ၸႂ်ၵၼ်တင်း မိူင်းရတ်ႉသျႃႊ ၼမ်လိူဝ်မိူင်းၶႄႇ။

ၾၢႆႇၼိုင်ႈၵေႃႈ မိူင်းၶႄႇ ပၼ်ႁႅင်းဢီး ႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ် ၵိုတ်းတိုၵ်း ၼႂ်းမိူင်းတႆးပွတ်းႁွင်ႇ။ ၼႂ်းဝူင်ႈတီႈ 3 လိူၼ်ၼႆႉသေ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ (MNDAA) တူၵ်းလူင်းၵိုတ်းတိုၵ်းၵၼ်။

ယွၼ်ႉမိူင်းၶႄႇ ပၼ်ႁႅင်းဢီးလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၵမ်ႈၽွင်ႈၵေႃႈ လႅပ်ႈတေၸၢင်ႈၵိုတ်း တိုၵ်းမႃးထႅင်ႈ ယူႇၼႆ – ၽူႈလဵပ်ႈႁဵၼ်းၵၢၼ်မိူင်းၶဝ် ထတ်းသၢင်ဝႆႉၼင်ႇၼႆ။

ၽွင်းတၢင်မိူင်းၶႄႇ ၵဵဝ်ႇၵပ်းမိူင်းမၢၼ်ႈ Mrs. Ma Jia ၵေႃႈ လၢတ်ႈဝႃႈ – ယုမ်ႇယမ်ဝႃႈ တေသိုပ်ႇႁဵတ်းသၢင်ႈ လႆႈလွင်ႈၵပ်းသိုပ်ႇ ၼႂ်းၵႄႈသွင်ၸိုင်ႈမိူင်း ႁႂ်ႈမီးလွင်ႈမၼ်ႈၵႅၼ်ႇၼႅၼ်ႈၼႃသေ တေတိူဝ်းၶူင်သၢင်ႈတိုဝ်းတၢင်း လွင်ႈႁုၼ်ႈမုၼ်း ၶိုၼ်ႈယႂ်ႇပၼ်ၵူၼ်းမိူင်းမၢၼ်ႈၵႂႃႇယူႇ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။