သိုၵ်းမၢၼ်ႈ ဢၼ်တူင်ႉၼိုင်ဝႆႉၼႂ်းထုင်ႉၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်းၼၼ်ႉ ၶဝ်ႈသွၵ်ႈတဝ်လၵ်ႉ ဢဝ်ၶူဝ်းၶွင် ၼႂ်းႁိူၼ်းယေးၵူၼ်းမိူင်း ထိုင်တီႈၵူၼ်းမိူင်း ပေႃးလႆႈတၢင်ႇၸိုဝ်ႈပၼ်ဝႃႈ “သၢႆသိုၵ်းၽူႈလၵ်ႉ” ဝႃႈၼႆ။

တႄႇဢဝ်ႁူဝ်လိူၼ်ၵျႅၼ်ႊၼိဝ်ႊရီႊ 2025 မႃးၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်းထၼု (DPLF) ပဵၼ်ပၢင်တိုၵ်းၵၼ်မႃး ၼႂ်းထုင်ႉၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇ ၾၢႆႇသိုၵ်းမၢၼ်ႈ ၸႂ်ႉပႃးၶိူင်ႈမိၼ် ယိုဝ်းတိုၵ်းၸွႆႈ ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းပိုၼ်ႉတီႈ လႆႈငိူင်ႉပၢႆႈဢွၵ်ႇဝၢၼ်ႈ တင်းၼမ်လၢႆ။

ၵူၼ်းပိုၼ်ႉတီႈ ဝဵင်းလွၵ်ႉၸွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ဝၢႆးလင် ဝၼ်းတီႈ 18 မႃးၼႆႉ သၢႆသိုၵ်းမၢၼ်ႈ ၶဝ်ႈသွၵ်ႈတဝ် ၼႂ်းဝၢၼ်ႈ ၼႂ်းႁိူၼ်းယေး ၼႂ်းႁၢၼ်ႉၶၢႆၶူဝ်းၵုၼ်ႇ ၶွင်ၵူၼ်းမိူင်းသေ တေႃႉဢဝ်ၵႂႃႇၶူဝ်းၶွင်ၵိၼ်ယႅမ်ႉ ဢိၵ်ႇပႃးၶူဝ်းၸႂ်ႉတိုဝ်း ၸိူဝ်းၼႆႉၵႂႃႇ တင်းၼမ်ဢေႃႈ။ ၶူဝ်းၶွင် ဢၼ်ၶဝ်ဢမ်ႇယုၵ်ႉၵႂႃႇလႆႈသမ်ႉ ထုပ်ႉပေႃႉယႃႉၵွႆႈပႅတ်ႈ ႁဵတ်းၼၼ် ဢေႃႈ၊ ပဵၼ်သၢႆသိုၵ်းၽူႈလၵ်ႉၶဝ် တေႃႉဢဝ်ၵႂႃႇၼႂ်းတပ်ႉၶိူင်ႈၵွင်ႈလူင် ဢမတ 349 ၼၼ်ႉဢေႃႈ”- ဝႃႈၼႆ။  

တီႈထုင်ႉၵျွၵ်ႉၵူႇၼႆႉ သိုၵ်းမၢၼ်ႈတင်း သိုၵ်းထၼု (DPLF) တႄႇပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ထိုင်မႃး ဝၼ်းတီႈ 16/1/2025 ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ 56 လုၵ်ႈ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်း လူႉတၢႆ 3 ၵေႃႉ မၢတ်ႇၸဵပ်း 10 ၵေႃႉ။ ဝၢႆးၼၼ်ႉ သိုၵ်းမၢၼ်ႈ ထႅမ်ႁႅင်းသိုၵ်းသေ ၶဝ်ႈသွၵ်ႈတဝ် ၼႂ်းဢိူင်ႇၼႂ်းဝၢၼ်ႈ တေႃႇထိုင်ယၢမ်းလဵဝ် သိုၵ်းတင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်း တေႃႇၵၼ်ဝႆႉယူႇ ၵွပ်ႈ ၼႆလႄႈ ၵူၼ်းပၢႆႈၽေးသိုၵ်း ပႆႇႁတ်းပွၵ်ႈမိူဝ်း ဝႃႈ ၼႆ။

ထုင်ႉၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇၼႆႉ ပဵၼ်ဢွင်ႈတီႈလႅၼ်လိၼ် မိူင်းတႆးပွတ်းၸၢၼ်း – ပွတ်းႁွင်ႇ တိတ်းၸပ်းၵၼ်ဝႆႉလႄႈ ၵွပ်ႈၼႆ မီးဝႆႉသိုၵ်းတႆး RCSS တင်း SSPP တူင်ႉၼိုင်ယူႇဝႆႉသေဢမ်ႇၵႃး ယဝ်ႉၵေႃႈ မီးပႃး ၸုမ်းပျီႇတူႉၸိတ်ႉပဢူဝ်း PNO ၸိူဝ်းၼႆႉထႅင်ႈ ယၢမ်းလဵဝ် တပ်ႉသိုၵ်းထၼု (DPLF) ၵေႃႈ မႃးတူင်ႉၼိုင်ဝႆႉထႅင်ႈ ဝႃႈၼႆ။