ၶၢဝ်းတၢင်း သိုၵ်းမၢၼ်ႈယိုတ်းမိူင်းၼႆႉ ၵူၼ်းမိူင်းထူပ်းၽေးသိုၵ်းသိူဝ်၊ ထူပ်းၽေးသၽႃႇဝ ၵူၼ်းယူႇဝၢၼ်ႈၼွၵ်ႈ ပႃးၸဵမ်ၵူၼ်းယူႇၼႂ်းဝဵင်း ထူပ်းၽေးမိူၼ်ၵၼ်မူတ်း။ မိူဝ်ႈပၢၼ်လူင်ပွင်ၸိုင်ႈ ၵူၼ်းမိူင်း လိူၵ်ႈတင်ႈၼၼ်ႉတႄႉ ယင်းမီးၵၢၼ်ပူၵ်းပွင်ဝၢၼ်ႈမိူင်းလႄႈ ပိုတ်ႇပၢင်ႇယူႇၽွင်ႈ။

ထိုင်မႃး ပၢၼ်သိုၵ်းမၢၼ်ႈ ယိုတ်းမိူင်းၼႆႉတႄႉ ယႃႇဝႃႈ တေပူၵ်းပွင်ၶူင်သၢင်ႈဢၼ်မႂ်ႇလႃႈ။ ဢၼ်မီးဝႆႉ ၵူၺ်းၵေႃႈ ဢမ်ႇသိုပ်ႇလုမ်းလႃးလႆႈ။ မိူၼ်ၼင်ႇ ၾႆးၾႃႉ ဢၼ်သိုၵ်းမၢၼ်ႈဝႃႈ မိူင်းမၢၼ်ႈ ႁဵတ်းဢွၵ်ႇၶၢႆ တေႃႇၼွၵ်ႈမိူင်းၼမ်သုတ်း ၼႆၼၼ်ႉၵေႃႈ တွၼ်ႈတႃႇၵူၼ်းမိူင်းတႄႉ ဢမ်ႇမီးၾႆးၾႃႉၸႂ်ႉ။ ပႆႇဝႃႈဝဵင်းဢွၼ်ႇ ဝဵင်းဢိတ်းလႃႈ – တေႃႈၼင်ႇဝဵင်းယႂ်ႇဝဵင်းလူင် ၶၢဝ်းၸႅၵ်ႇၸၢႆႇပၼ်ၾႆးၾႃႉ ဢမ်ႇမီးဝႆႉပိူင်တၢႆ။

တီႈဝဵင်းမိူင်းၽျၢၵ်ႈ ၸိုင်ႈတႆးပွတ်းဢွၵ်ႇၵေႃႈ ယွၼ်ႉပိူဝ်ႈၼမ်ႉထူမ်ႈလႄႈ လႆႈၶိုၼ်းမႄးႁူင်းၾႆးၾႃႉၼႆသေ ဢမ်ႇပၼ် ၾႆးၾႃႉမၢၼ်ႇ။ လႆႈၸၢႆႇၵႃႈၾႆးၾႃႉၼမ်လိူဝ် တပ်ႉသိုၵ်းမၢၼ်ႈ ၵူၺ်းၵႃႈ ဢွင်ႈတီႈ သိုၵ်းမၢၼ်ႈယူႇသဝ်းၼၼ်ႉသမ်ႉ လႆႈၾႆးၾႃႉၵူႈဝၼ်းၶိုၼ်း။

ၸဵမ်မိူဝ်ႈ 10/9/2024 ၾူၼ်တူၵ်း ၼမ်ႉၼွင်းယႂ်ႇသေ ႁူင်းၾႆးၾႃႉ ဢၼ်ႁဵတ်းဝႆႉတီႈၵႄးၼမ်ႉလူင် ၸႄႈဝဵင်းမိူင်း ၽျၢၵ်ႈ ၸိုင်ႈတႆးပွတ်းဢွၵ်ႇၼၼ်ႉ ယုၵ်းယၢၵ်း လိၼ်သၢႆး ၵိင်ႇမႆႉၵိင်ႇတွၵ်ႇ ၸိူဝ်းၼႆႉ မႃးၶၢင်ႉပၢၼ်ႈၼမ် ထိုင်တီႈ ၾႆးၾႃႉဢမ်ႇပၼ်ႇၵၢၼ်လႆႈ။

ထိုင်မႃးႁူဝ်လိူၼ်တီႊသႅမ်ႊပိူဝ်ႊ ပီ 2024 ၼႆႉတႄႉ ၶွမ်ႊပၼီႊဢၼ်ဢဝ်ပုၼ်ႈၽွၼ်းၾႆးၾႃႉ ၶိုၼ်းပိုတ်ႇပၼ်ၶိုၼ်းသေတႃႉၵေႃႈ ၾႆးၾႃႉဢမ်ႇလႆႈၽဵင်ႇၵၼ်မိူၼ်ၵဝ်ႇ။

ႁူင်းၾႆးၾႃႉ ဢၼ်ၸႂ်ႉဝႆႉ တီႈဝဵင်းမိူင်းၽျၢၵ်ႈၼႆႉ ပဵၼ်ၶွင်ၶွမ်ႊပၼီႊၶႄႇ (ကန်လုံရေအားလျှပ်စစ်) ဢၼ်မိူင်းမၢၼ်ႈပၼ်ၶႂၢင်ႉႁဵတ်းမိူဝ်ႈပီ 2013 လိူၼ်ဢေႊပရိူဝ်ႊ။ ထိုင်မႃး ၼႂ်းလိူၼ်ဢေႃႊၵတ်ႊသ် ပီ 2015 ၸင်ႇတႄႇၸႅၵ်ႇၾႆးၾႃႉ ပၼ်ၵူၼ်းဝၢၼ်ႈၵူၼ်းမိူင်း ၼႂ်းဝဵင်းမိူင်းၽျၢၵ်ႈ ၸႄႈတွၼ်ႈတႃႈၶီႈလဵၵ်း။

မိူၼ်ၼင်ႇ တႃႈၶီႈလဵၵ်း တႃႈလိူဝ်ႇ ၵဵင်းလၢပ်ႈ ၸိူဝ်းၼႆႉတႄႉ လႆႈၸႂ်ႉၾႆးၾႃႉ ဢၼ်တေႃႇမႃးတၢင်း ၾင်ႇထႆးလႄႈ ၾင်ႇလၢဝ်း လႆႈၸၢႆႇငိုၼ်းၸွမ်းလိူၼ်လႂ်လိူၼ်ၼၼ်ႉ။ မိူင်းၽျၢၵ်ႈၼႆႉသမ်ႉ ႁွင်ႈၵၢၼ် ၾၢႆႇၾႆးၾႃႉ မိူင်းမၢၼ်ႈ ယၢမ်ႈပိုၼ် ၽၢဝ်ႇဝႃႈ မီးႁႅင်းၾႆးၾႃႉပဵင်းပေႃးယူႇၼႆသေ ဢမ်ႇယွမ်းဢဝ်ၾႆး မိူင်းထႆး မိူင်းလၢဝ်း။ မိူဝ်ႈပၢၼ်လူင်ပွင်ၸိုင် ပႃႇတီႇ ၼူၵ်ႉယုင်းၼၼ်ႉၵေႃႈ ယၢမ်ႈပိုၼ်ၽၢဝ်ႇဝႃႈ တေဢဝ်ၾႆးၾႃႉၵဵင်းတွင်းမႃးၼႆသေတႃႉ ဢမ်ႇတၼ်းယဝ်ႉတူဝ်ႈ။ ၺႃးသိုၵ်း ယိုတ်းမိူင်းသေ ထိုင်မိူဝ်ႈလဵဝ် ဢမ်ႇႁၼ်တူၵ်ႇၶိုၼ်း။

မိူဝ်ႈတႄႇပိုတ်ႇႁူင်းၾႆးၾႃႉမိူင်းၽျၢၵ်ႈၼႆႉ ႁူဝ်ၼပ်ႉႁိူၼ်း ဢၼ်ၸႂ်ႉၾႆးၾႃႉဢမ်ႇပေႃးမီးၼမ်။ ႁႅင်းၾႆးၾႃႉလႄႈ ၵူၼ်းၸႂ်ႉမၼ်းတိုၵ်ႉငၢမ်ႇၵၼ်ယူႇ။ ၼႂ်းပီ 2015-16 ၼၼ်ႉ မေႃႈၾႆးၾႃႉ တိုၵ်ႉမီး 350 ႁူၺ်ႇၵူၺ်း။ ထိုင်မႃး ပီ 2023 ၼႆႉ မေႃႈၾႆးၾႃႉ မီးထိုင် 1,200 ႁူၺ်ႇ။ ထိုင်မႃး 2024 ၼႆႉ ႁႅင်းၾႆးၾႃႉၵေႃႈ ဢမ်ႇၼိမ်သေ ၵူၼ်းမိူင်းဢမ်ႇၸၢင်ႈပိုင်ႈလီလီ။

ဝၢႆးၼမ်ႉလုပ်ႇထူမ်ႈၼႆႉ ယိင်ႈၶႅၼ်းႁၢင်ႈႁၢႆႉလိူဝ်ၵဝ်ႇ။ ဢဝ်ၶေႃႈဢၢင်ႈဝႃႈ လႆႈမႄးၵုမ်းႁူင်းၾႆးၾႃႉ လၢႆၶၵ်ႉတွၼ်ႈၼႃႇ ၼႆသေ ၶွမ်ႊပၼီႊၶိုၼ်ႈၵႃႈမီႊတိူဝ်ႊၾႆး။ လုၵ်ႉတီႈ ၼိုင်ႈယူႊၼိတ်ႉလႂ် 200 ပျႃး ပဵၼ် မႃး 600 ပျႃး။ ဝၢႆးၼမ်ႉထူမ်ႈယဝ်ႉၼႆႉသမ်ႉ ၼိုင်ႈယူႊၼိတ်ႉလႂ် ပဵၼ်ၵႂႃႇ 800 ပျႃး။

ၸဝ်ႈႁၢၼ်ႉၶၢႆၵုၼ်ႇ မိူင်းၽျၢၵ်ႈ ၵေႃႉၼိုင်ႈ လၢတ်ႈတၢင်းယၢပ်ႇၽိုတ်ႇဝႆႉၼင်ႇၼႆ – “ၾႆးၾႃႉၼႆႉ တိုၵ်ႉလႆႈၶိုၼ်း မိူဝ်ႈႁူဝ်လိူၼ်တီႊသႅမ်ႊပိူဝ်ႊ 2024 ၼႆႉၵူၺ်း။ ၶဝ်ပိုတ်ႇပၼ်ၶိုၼ်းသေတႃႉၵေႃႈ ၵမ်းၼႆႉသမ်ႉ ၼိုင်ႈယူႊၼိတ်ႉလႂ်ၶိုၼ်ႈဝႆႉ 800 ပျႃး။ ၶႂ်ႈႁဵတ်းၸိူင်ႉႁိုဝ်ၵေႃႈ ႁဵတ်းလူင်ယူႇႁဵတ်းၼၼ်။ ၵွၼ်ႇၼႃႈၼႆႉ 600 ၼႆႉၵူၺ်း။ ၵူၼ်းမိူင်းၵမ်ႈၼမ်တႄႉ မိူဝ်ႈလဵဝ် ၶဝ်တိုၼ်းၸႂ်ႉသႂ်ႇ 800 ၼၼ်ႉယဝ်ႉ။ ယွၼ်ႉၶဝ် ၶိုၼ်ႈၵႃႈမၼ်းၸိူင်ႉၼႆလႄႈ ၵမ်ႈၼမ်ၵေႃႈ ဢမ်ႇၶႂ်ႈၸၢႆႇ။ ပဵၼ်ပၼ်ႁႃသေ မိူဝ်ႈလဵဝ် ဢမ်ႇပၼ်ၾႆးၽဵင်ႇၵၼ်ယဝ်ႉ။ ၵမ်ႈၽွင်ႈ ဢဝ်ငိုၼ်းမွၼ်သေ သိုဝ်ႉမီႊတိူဝ်ႊၸႂ်ႉၵေႃႈမီး။ လွင်ႈၼႆႉ ၽူႈ ၵဵဝ်ႇၶွင်ႈၶဝ် ဢွၼ်ၵၼ် ၸတ်းပၢင်ၵုမ်ၶိုၵ်ႉၶၵ်ႉသေတႃႉ ပႆႇလႆႈၶေႃႈတွပ်ႇ ပႆႇၵႄႈလိတ်ႈသင်”- ဝႃႈၼႆ။

ႁူင်းၾႆးၾႃႉမိူင်းၽျၢၵ်ႈၼႆႉ မိူဝ်ႈပီ 2016 ၼၼ်ႉ မီးတၢႆႊၼမူဝ်ႊ ဢၼ်မီးႁႅင်းၾႆးၾႃႉ 320 KVA ၼိုင်ႈလုၵ်ႈ ၊ မီးၶိူင်ႈ ၸႅၵ်ႇၾႆးၾႃႉ Transformer 7 ဢၼ် ၊ တႄႇၸႅၵ်ႇၸႂ်ႉမႃး တႃႇ 3 ပွၵ်ႉ (ဢၼ်မီးၼႂ်းဝဵင်း မိူင်းၽျၢၵ်ႈ) လႄႈ ဝၢၼ်ႈဢၼ်ယူႇၸွမ်းၶႅပ်ႇဝဵင်း ၸိူဝ်းၼၼ်ႉ။ သင်ဝႃႈ ၾႆးၾႃႉဢမ်ႇၵုမ်ႇထူၼ်ႈ ႁၢင်ႈ ႁႅၼ်းပႃးတီႈထႅမ်သႂ်ႇ တၢႆႊၼမူဝ်ႊ 320 KVA တႃႇသွင်လုၵ်ႈၼႆ ၽူႈၸတ်းၵၢၼ်ၶွမ်ႊပၼီႊၾႆးၾႃႉ ဢူးဢွင်ႇၵျေႃႇတိၼ်ႉ ယၢမ်ႈလၢတ်ႈၼင်ႇၼၼ်သေတႃႉ ဢမ်ႇၸတ်းသင်ပၼ်ႁႂ်ႈၵုမ်ႇထူၼ်ႈၼႆ ၵူၼ်းပိုၼ်ႉ တီႈလၢတ်ႈ။

မေႃႈၾႆးၾႃႉ meter box ၼိုင်ႈလုၵ်ႈလႂ် လႆႈၸၢႆႇငိုၼ်း 6 သႅၼ်ပျႃးၶိုင်ႈ။ ဝၢႆးသိုၵ်းမၢၼ်ႈ ယိုတ်းဢႃႇၼႃႇ ယဝ်ႉတႄႉ ဢိင်ၼိူဝ်ၶၼ်ငိုၼ်းၶိုၼ်ႈလူင်းသေ ၵႃႈမေႃႈၾႆးၶိုၼ်ႈထိုင် 10 သႅၼ်ပျႃးၵေႃႈမီး။ ၵႃႈၸႂ်ႉၸၢႆႇ ၾႆးၾႃႉၼႆႉ ၵႃႈၵေႃႈယဝ်ႉ ပေႃးၵေႃႈယဝ်ႉ မီးလွင်ႈတုမ်ႉယွၼ်ႈၵူၼ်းမိူင်းၼမ် ယွၼ်ႉဝႃႈ ၵူၼ်းမိူင်း ပဵၼ်ၵူၼ်း ၵေႃႉလူင်းတိုၼ်းသေ ၸင်ႇပဵၼ်မႃးႁူင်းၾႆးၾႃႉ။ ဝႃႈၼၼ်ႉသေတႃႉ ဢၼ်လႆႈၸၢမ်ႇၽွၼ်း လီမၼ်းသမ်ႉ ပဵၼ်တပ်ႉသိုၵ်းမၢၼ်ႈၼႆ ၵူၼ်းမိူင်းၽျၢၵ်ႈ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ပေႃးပဵၼ်သိုၵ်းမၢၼ်ႈသမ်ႉ ၶဝ်ဝႆႉပၼ် ၼိုင်ႈမီႊတိူဝ်ႊ မွၵ်ႈ 600 ပျႃး ၼႆႉသေ ပၼ်ၸႂ်ႉၾႆးၾႃႉယူႇ။ တီႈတႄႉမၼ်း ပေႃးတူၺ်းၼႂ်းသဵၼ်ႈမၢႆ ဢၼ်သိုဝ်ႉမေႃႈၾႆးၾႃႉတီႈၶွမ်ႊပၼီႊၼႆႉ ဢမ်ႇပႃးသိုၵ်းမၢၼ်ႈ။ ဢဝ်ငိုၼ်းဢၼ်ၶဝ်ၵဵပ်းမႃးတီႈၵူၼ်းမိူင်း မိူဝ်ႈတႄႇႁဵတ်းႁူင်းၾႆးၾႃႉၼၼ်ႉသေ ၸႂ်ႉဝႆႉၵူၺ်း။ တႃႇၵူၼ်းမိူင်းသမ်ႉ ဢမ်ႇဝႆႉၼမ်ႉၼၵ်းသေ ၵႂႃႇတူၺ်းပၼ်တပ်ႉမၢၼ်ႈၵူၺ်း။ ႁွင်ႈၵၢၼ်ၾၢႆႇၾႆးၾႃႉ ၶဝ်ၵေႃႈ ဢဝ်ၼႃႈတီႈပုၼ်ႈၽွၼ်းဝႆႉသေ ဢမ်ႇႁဵတ်းသင်ပၼ် ၵူၼ်းမိူင်းႁႂ်ႈမီးလွင်ႈၽဵင်ႇပဵင်း”- ဝႃႈၼႆ။

တႃႇၸၢႆႇငိုၼ်း ၵႃႈၸႂ်ႉတိုဝ်းၾႆးၾႃႉၼႆႉ ၶွမ်ႊပၼီႊၶဝ် ၸႅၵ်ႇဝႆႉပၼ် ၵၢတ်ႉတိူမ်းငိုၼ်း (ငၢႆးမိူၼ်သိမ်ႊၵၢတ်ႉသ်ၾူၼ်း)၊ တႃႇၸႂ်ႉၾႆးၾႃႉ ႁိူၼ်းလႂ်ႁိူၼ်းၼၼ်ႉ လႆႈဢဝ်ၵၢတ်ႉသ် ဢၼ်ထႅမ်ငိုၼ်းဝႆႉၼၼ်ႉ ၵႂႃႇ သဵပ်ႇသႂ်ႇဢွင်ႈတီႈ ၸႅၵ်ႇၾႆးၾႃႉ ၼၼ်ႉသေ ၸင်ႇလႅၵ်ႈလၢႆႈပဵၼ်မီႊတိူဝ်ႊ ၸႂ်ႉတိုဝ်းၾႆးၾႃႉလႆႈ။ လၢႆးၸႂ်ႉမၼ်းၸၼ်ႉသုင်ယူႇသေတႃႉ ပၢၼ်သိုၵ်းယိုတ်းမိူင်းၼႆႉ ၵႃႈၶၼ်မၼ်းဢမ်ႇၼိမ်လႄႈ ၵူၼ်းမိူင်း ၵမ်ႈၼမ်ၵိၼ်းၸႂ်ဝႆႉ။

ၵူၼ်းမိူင်းၽျၢၵ်ႈၼႆႉ ယၢမ်းလဵဝ် တေဝႃႈၸႂ်ယႂ်ႇၾႆးၾႃႉ ဢၼ်ႁွင်ႈၵၢၼ်ၾၢႆႇၾႆးၾႃႉ EPC ဢၼ်ယူႇ တႂ်ႈသိုၵ်းမၢၼ်ႈ ၸႅၵ်ႇပၼ်ၼၼ်ႉၼႆၵေႃႈ မႃးၼိုင်ႈဝၼ်းလႂ် 2 ၸူဝ်ႈမူင်းၵူၺ်း။ သမ်ႉပၢႆ ပၼ်ႇပုတ်ႈသေ ၸင်ႇၸႅၵ်ႇပၼ်။ ပေႃးလႆႈပွၵ်ႉ ၼိုင်ႈ ထႅင်ႈပွၵ်ႉၼိုင်ႈသမ်ႉဢမ်ႇလႆႈ ။ ၵၢပ်ႈယၢမ်းလဵဝ် ၵၢၼ်ၵမ်ႈၼမ် လႆႈၸႂ်ယႂ်ႇၾႆးၾႃႉလႄႈ ၵူၼ်းမိူင်းၽျၢၵ်ႈ ၵိၼ်း ၸႂ်ၽႂ်မၼ်းဝႆႉ ဝႃႈၼႆ။

မိူင်းၽျၢၵ်ႈၼႆႉ မီးၼႂ်းၵႄႈ ၵဵင်းတုင်လႄႈ တႃႈၶီႈလဵၵ်းသေ မီးပွၵ်ႉလႄႈဝၢၼ်ႈ ႁူမ်ႈၵၼ် 24 ဢၼ် မီးပီႈၼွင်ႉၸၢဝ်းလႃး ႁူႇလႄႈ ၸၢဝ်တႆး ယူႇဝႆႉၼမ်။