ႁိူၼ်းယေးၵူၼ်းမိူင်း ၼႂ်းၸႄႈဝဵင်းလွႆၶေႃ ၸႄႈမိူင်းယၢင်းလႅင် တီႈဢမ်ႇမီးၵူၼ်းမႃးယူႇသဝ်းၶိုၼ်းၼၼ်ႉ တေယိုတ်းဢဝ်ပႅတ်ႈၼႆ သိုၵ်းမၢၼ်ႈ လွၵ်ႇငိုတ်ႈတေႃႇၵူၼ်းမိူင်း ၸိူဝ်းပွၵ်ႈမိူဝ်းၸႂ်းႁိူၼ်းၼၼ်ႉ ၼင်ႇၼႆ။
ၽႅၼ်ယၼ်ႇသိုၵ်း 1111 ၼႂ်းပီ 2023 ၼၼ်ႉ တီႈဝဵင်းလွႆၶေႃ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ ယိုဝ်းတိုၵ်းၵၼ် ႁၢဝ်ႈႁႅင်းသေ ႁဵတ်းႁႂ်ႈၵူၼ်းမိူင်း လႆႈဢွၼ်ၵၼ်ငိူင်ႉပၢႆႈၽေးသိုၵ်းတင်းၼမ် ႁိုင်မႃးၶၢဝ်းတၢင်းပီပၢႆ ၵူၼ်းမိူင်းၵမ်ႈၽွင်ႈ ပွၵ်ႈမိူဝ်းၸႂ်းႁိူၼ်းၶိုၼ်းသေ ၺႃးသိုၵ်းမၢၼ်ႈ လွၵ်ႇငိုတ်ႈဝႃႈ သင်ဢမ်ႇပွၵ်ႈမႃး ယူႇႁိူၼ်းယေးၶိုၼ်းၸိုင် တေယိုတ်းဢဝ်ပႅတ်ႈ ဝႃႈၼႆ။
ၵူၼ်းဝဵင်းလွႆၶေႃ ၼၢင်းယိင်း ၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇ Kantarawaddy Times ဝႃႈ – “ၵူၼ်းပၢႆႈၽေးသိုၵ်း ၵမ်ႈၽွင်ႈ ပွၵ်ႈမႃးၺႃး သိုၵ်းမၢၼ်ႈ ဢၼ်ပႂ်ႉဢဝ်ႁူမ်ႇလူမ်ႈဝႆႉ ၸွမ်းၼႂ်းပွၵ်ႉၼႂ်းယွမ်ႇၼႆႉ လွၵ်ႇငိုတ်ႈဝႃႈ သင်ဢမ်ႇပွၵ်ႈမႃး ယူႇႁိူၼ်းယေးၶိုၼ်းၸိုင် တေယိုဝ်းဢဝ်ပႅတ်ႈ။ လိူဝ်ၼၼ်ႉ ယူႇတီႈ ၽူႈၵွၼ်းပွၵ်ႉၶဝ် ဢမ်ႇပွင်ႇၶၢဝ်ႇတီႈၸဝ်ႈႁိူၼ်းသေ ၶၢတ်ႈၵိၼ်ႁိူၼ်း တီႈဢမ်ႇမီးၵူၼ်းယူႇသဝ်း ၸိူဝ်းၼႆႉၵေႃႈမီး”- ဝႃႈၼႆ။
တႄႇႁၢင်ပီ 2024 ၼၼ်ႉမႃး သိုၵ်းမၢၼ်ႈ ပိုၼ်ၽၢဝ်ႇႁွင်ႉၶိုၼ်း ၵူၼ်းပၢႆႈၽေးသိုၵ်း ႁႂ်ႈပွၵ်ႈမိူဝ်းယူႇႁိူၼ်းယေးၸဝ်ႈၵဝ်ႇ။ ၵူၺ်းၵႃႈ ၼႂ်းပိုၼ်ႉတီႈၼၼ်ႉသမ်ႉ သိုၵ်းတင်းသွင်ၾၢႆႇ တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်း တေႃႇၵၼ်ယူႇ ဝႃႈၼႆ။
ထႅင်ႈၾၢႆႇၼိုင်ႈၵေႃႈ သိုၵ်းမၢၼ်ႈသမ်ႉ ၵႆႉလၢမ်းယိုဝ်းၶိူင်ႈၵွင်ႈလူင်လႄႈ ႁဵတ်းႁႂ်ႈၵူၼ်းပၢႆႈၽေးသိုၵ်း ပႆႇႁတ်းပွၵ်ႈမိူဝ်းယူႇသဝ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ