ဝၢႆးသိုၵ်းမၢၼ်ႈတင်း သိုၵ်းၵဝ်ႈၵၢင်ႉ MNDAA တူၵ်းလူင်းလႆႈၸႂ်ၵိုတ်းတိုၵ်းၵၼ်ယဝ်ႉ မိူင်းၶႄႇ ပိုၼ်ၽၢဝ်ႇ ပိုတ်ႇၽၵ်းတူမိူင်း ၸွမ်းလႅၼ်လိၼ်တႆး – ၶႄႇ ၸိူဝ်းဢွင်ႈတီႈတပ်ႉသိုၵ်းၵဝ်ႈၵၢင်ႉ – ဝႃႉ ၵုမ်းၵမ်ဝႆႉၸိူဝ်း ၼၼ်ႉ။

တႄႇဢဝ် ဝၼ်းတီႈ 20/1/2025 ၼႆႉမႃး တၢင်းမိူင်းၶႄႇ ပိုၼ်ၽၢဝ်ႇ ပိုတ်ႇၽၵ်းတူမိူင်း (ၵဵတ်ႉ/ လၢၼ်ႇ) တီႈဝဵင်းပၢင်ႇသၢႆး၊ ယၼ်ႇလူင်ၵျိၼ်း၊ ဝဵင်းၼမ်ႉၽႃႈ (သျိၼ်းသူၺ်ႇႁေႃႇ) လႅၼ်လိၼ်တႆး – ၶႄႇ ဢၼ်လႆႈပိၵ်ႉ ဢိုတ်းမႃးၶၢဝ်းတၢင်းၸမ် 7 လိူၼ်ၼႆႉ ဝႃႈၼႆ။

ၵူၼ်းမိူင်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “တႄႇဝၼ်းတီႈ 20 မႃးၼႆႉ ၽၵ်းတူပၢင်ႇသၢႆး – ဝၼ်းတဵင်ႈတႄႉ တႄႇပိုတ်ႇမႃးယဝ်ႉ။ ၼႂ်းလိၵ်ႈၽိုၼ်ၽၢဝ်ႇ ဢၼ်ၶႄႇၶဝ်ဢွၵ်ႇဝႆႉၼၼ်ႉ တေပိုတ်ႇတႃႇ 1 လိူၼ်။ ၽၵ်းၶဵဝ်၊ ၶွင်ၵိၼ်ယႅမ်ႉတႄႉ တေႃႉၶဝ်ႈမႃးလႆႈ ၵမ်ႈၽွင်ႈယဝ်ႉ။ ၾၢႆႇတပ်ႉသိုၵ်းၵဝ်ႈၵၢင်ႉၶဝ်တႄႉ တေမၢႆဝႆႉပပ်ႉၶၢမ်ႈမိူင်းသေ ၵဵပ်းသဵၼ်ႈမၢႆ ၵူၼ်းၶဝ်ႈဢွၵ်ႇ မွၵ်ႈၼၼ်ႉၵူၺ်း”- ဝႃႈၼႆ။

တႄႇၽႅၼ်ယၼ်ႇသိုၵ်း 1027 ပွၵ်ႈၵမ်းသွင် မိူဝ်ႈႁၢင်လိူၼ်ၵျူႊလၢႆႊ ပီ 2024 ၼၼ်ႉမႃးသေ ၸွမ်းၼင်ႇ တပ်ႉသိုၵ်းၵဝ်ႈၵၢင်ႉ MNDAA ယိုတ်းၵုမ်းဝႆႉ ၵဵတ်ႉ/ လၢၼ်ႇ ၸွမ်းလႅၼ်လိၼ်တႆး – ၶႄႇ ၸိူဝ်းၼႆႉသေ ထုၵ်ႇမိူင်းၶႄႇ ပိၵ်ႉဢိုတ်းမႃး ၸမ်ၶၢဝ်းတၢင်း 7 လိူၼ် ၸင်ႇပိုတ်ႇပၼ်ၶိုၼ်း ၼႂ်းဝၼ်းတီႈ 19 လႄႈ ဝၼ်းတီႈ 20 ၼႆႉၵူၺ်း ဝႃႈၼႆ။

“ၵူၼ်းမိူင်းၶႄႇတႄႉ ၶဝ်ႈဢွၵ်ႇၵႂႃႇမႃးလႆႈယူႇ။ ၵူၺ်းၵႃႈ ၵူၼ်းမိူင်းမၢၼ်ႈတႄႉ ပႆႇၶဝ်ႈဢွၵ်ႇၵႂႃႇမႃးလႆႈ။ ၸိူဝ်းမီးပီႈၼွင်ႉ တၢင်းၾင်ႇမိူင်းၶႄႇၼၼ်ႉ ၶဝ်တေဢဝ်ၶူဝ်းၵုၼ်ႇတေႃႉမႃးပၼ် တီႈၽၵ်းတူသေ ႁႂ်ႈၵူၼ်းတၢင်းၼႆႉ ၵႂႃႇႁပ်ႉဢဝ်မႃး ဢေႃႈ။ တီႈလိၵ်ႈၽိုၼ်ၽၢဝ်ႇၶႄႇ ဢွၵ်ႇဝႆႉၼၼ်ႉ ၶဝ်လၢတ်ႈဝႃႈ တေပိုတ်ႇ 1 လိူၼ်ၵူၺ်းလႄႈ ၶဝ်ၵူဝ်ၵူၼ်းမိူင်းမၢၼ်ႈ ၶဝ်ႈၵႂႃႇသေ ဢမ်ႇဢွၵ်ႇမႃးၶိုၼ်း ၸိူင်ႉၼၼ်ဢေႃႈ။ ၵွပ်ႈၼၼ် လႄႈ ပေႃးၶဝ်ႈၵႂႃႇဢဝ်ၶူဝ်းၵုၼ်ႇၵေႃႈ ႁႂ်ႈဢွၵ်ႇမႃးၶိုၼ်း ၵမ်းလဵဝ် ၼၼ်ႉယဝ်ႉ”- ၵူၼ်းပိုၼ်ႉတီႈ ဝဵင်းပၢင်ႇသၢႆး သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၸွမ်းၼင်ႇ ၵဵတ်ႇလႅၼ်လိၼ် ဢၼ်ယူႇတီႈ သိုၵ်းၵဝ်ႈၵၢင်ႉ MNDAA ယိုတ်းၵုမ်းဝႆႉၼၼ်ႉ ၶဝ်ပၼ်ၶူဝ်း ၵုၼ်ႇ၊ မၢၵ်ႇမႆႉ ၸိူဝ်းၼႆႉ တေႃႉဢွၵ်ႇမႃးလႆႈ။ ၵူၺ်းၵႃႈ ဢၼ်လုၵ်ႉတၢင်းမိူင်းတႆး – မိူင်းမၢၼ်ႈ တေႃႉၶဝ်ႈၵႂႃႇၼၼ်ႉတႄႉ ပႆႇပၼ်ၶႂၢင်ႉၶဝ်ႈ – ၵူၼ်းပိုၼ်ႉတီႈလၢတ်ႈ။

ဢိင်ၼိူဝ် လွင်ႈမိူင်းၶႄႇ ယူႇၵၢင် ဢုပ်ႇဢူဝ်းငူပ်ႉငီႉပၼ် သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႇ MNDAA လွင်ႈၵိုတ်းတိုၵ်းၵၼ် တီႈဝဵင်းၶုၼ်ႊမိင်ႊၼၼ်ႉ မီးမႃး 7 ပွၵ်ႈယဝ်ႉ။ တႄႇဢဝ် ဝၼ်းတီႈ 18 ၼႆႉမႃး တင်းသွင်ၾၢႆႇ ၸင်ႇၵိုတ်းတိုၵ်းပဵၼ်တၢင်းၵၢၼ်ယဝ်ႉ ဝႃႈၼႆ။