ယၢမ်းလဵဝ် သိုၵ်းဝႃႉ UWSA ဢၼ်မီးဝႆႉၼႂ်းၸႄႈဝဵင်းတၢင်ႉယၢၼ်းၼႆႉ ယိပ်းၵွင်ႈၵၢင်ႇ သႂ်ႇၶူဝ်းသိုၵ်းတဵမ်တူဝ်သေ ထၢင်ႇႁၢင်ႈတူင်ႉၼိုင်ၵႂႃႇမႃး လွတ်ႈလႅဝ်း ႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်း – ၵူၼ်းပိုၼ်ႉတီႈလၢတ်ႈ။

ၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇၼႆႉ ယူႇတီႈ တပ်ႉသိုၵ်းဝႃႉ UWSA ၶဝ်ႈမႃးယိုတ်းၵုမ်းဝႆႉ ၸဵမ်မိူဝ်ႈလိူၼ်ၵျူႊလၢႆႊ ပီ 2024 ၼၼ်ႉမႃးသေ ႁၢၼ်ႉတေႃႇထိုင်ယၢမ်းလဵဝ် ဝႃႈၼႆ။

ၵွပ်ႈၼႆလႄႈ ဝၢႆးယိုတ်းၵုမ်းဝဵင်းတၢင်ႉယၢၼ်းၼႆႉယဝ်ႉ ယၢမ်းလဵဝ် သိုၵ်းဝႃႉ ထၢင်ႇႁၢင်ႈယိပ်းၵွင်ႈၵၢင်ႇ သႂ်ႇၶူဝ်းသိုၵ်းသေ တူင်ႉၼိုင်ၵႂႃႇမႃး လွတ်ႈလွတ်ႈလႅဝ်းလႅဝ်း – ၵူၼ်းပိုၼ်ႉတီႈ ဝဵင်းတၢင်ႉယၢၼ်း ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။

“ယၢမ်းလဵဝ် သိုၵ်းဝႃႉၼႆႉ သႂ်ႇၶူဝ်းသိုၵ်းတဵမ်တူဝ် ယိပ်းၵွင်ႈသေ ၵႂႃႇမႃးၸွမ်းၼႂ်းၵၢတ်ႇ၊ ၼႂ်းပွၵ်ႉၼႂ်းယွမ်ႇ ၸိူဝ်းၼႆႉ ၶႂ်ႈဝႃႈႁၼ်ၵူႈဝၼ်းယဝ်ႉ။ မိူၼ်ၶဝ်ၶႂ်ႈႁတ်းၵႂႃႇမႃး လိူဝ်ၵူႈပွၵ်ႈဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉသေ ယူႇတီႈ ၵူၼ်းမိူင်းၵမ်ႈၽွင်ႈတႄႉ ႁၼ်ထိုင်ဝႃႈ ပဵၼ်ဢၼ်လၢၵ်ႇလၢႆးဝႆႉ ၵမ်ႈၽွင်ႈတႄႉ ပဵၼ် ဢၼ်မႆႈၸႂ်ၵူဝ်ဝႆႉ ၵေႃႈမီး ဝႃႈၼႆ။

“ၵူၼ်းမိူင်း ၵမ်ႈၽွင်ႈတႄႉ ႁၼ်ဝႃႈ ပဵၼ်ဢၼ်လၢၵ်ႇလၢႆးဝႆႉ ၵမ်ႈၽွင်ႈသမ်ႉ မႆႈၸႂ် ၵူဝ်ၶဝ်ပဵၼ်ပၢင်တိုၵ်း ၸွမ်းသေၸုမ်းၸုမ်းဢေႃႈ။ ယွၼ်ႉႁၼ်ၶဝ်တူင်ႉၼိုင်ၵႂႃႇမႃး ၸွမ်းၼႂ်းဝဵင်းၸိူင်ႉၼႆလႄႈ တေဝႃႈပဵၼ် ပုၼ်ႈၽွၼ်းၶဝ် ဝႃႈၼႆသေတႃႉၵေႃႈ ၵူၺ်းၵႃႈ ဢမ်ႇထုၵ်ႇလီ သႂ်ႇၶူဝ်းသိုၵ်း ယိပ်းၵွင်ႈၵၢင်ႇၵႂႃႇမႃး ၸိူင်ႉၼႆၶႃႈ”- ၵူၼ်းပိုၼ်ႉတီႈ ဝဵင်းတၢင်ႉယၢၼ်း သိုပ်ႇလၢတ်ႈၼႄၼင်ႇၼႆ။

ၸႄႈဝဵင်းတၢင်ႉယၢၼ်းၼႆႉ မိူဝ်ႈၵူႈပွၵ်ႈ ပဵၼ်ၼႃႈတီႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA တူင်ႉ ၼိုင်ယူႇဝႆႉသေတႃႉ ယၢမ်းလဵဝ်သမ်ႉ ပဵၼ်တပ်ႉသိုၵ်းဝႃႉ UWSA တူင်ႉၼိုင်ယူႇဝႆႉ ဝႃႈၼႆ။  

ယၢမ်းလဵဝ် တီႈဝဵင်းတၢင်ႉယၢၼ်းၼႆႉ ၸဵမ်ၼမ်ႉမၼ်းၸိူဝ်ႉၾႆး၊ ၶူဝ်းၵုၼ်ႇၶွင်ၵိၼ်ယႅမ်ႉ၊ ၶိူင်ႈၵေႃႇသၢင်ႈ ႁိူၼ်းယေး တႄႇၵႂႃႇၸိူဝ်းၼႆႉ သင်ဝႃႈ တေတေႃႉမႃးၶၢႆၼႂ်းဝဵင်းၸိုင် တၵ်းတေလႆႈမီးဝႂ်ႁပ်ႉႁွင်း တီႈတပ်ႉသိုၵ်းမၢၼ်ႈၵွၼ်ႇ ၸင်ႇတေတေႃႉတၢင်ႇမႃးလႆႈ ၵွပ်ႈၼႆလႄႈ ႁဵတ်းႁႂ်ႈၶၼ်ၶူဝ်းၵုၼ်ႇပုင်ႈၶိုၼ်ႈႁႅင်း။

ဝၢႆးၽႅၼ်ယၼ်ႇသိုၵ်း 1027 ၼႂ်းမိူင်းတႆးပွတ်းႁွင်ႇၼႆႉမႃး ႁဵတ်းႁႂ်ႈၶၼ်ၶူဝ်းၵုၼ်ႇ ၵူႈဢၼ်ဢၼ်၊ ၼမ်ႉ မၼ်းၸိူဝ်ႉၾႆး ၸိူဝ်းၼႆႉ လႆႈၶၢတ်ႇဝႆႉသေဢမ်ႇၵႃး ယဝ်ႉၵေႃႈ ႁဵတ်းႁႂ်ႈၶၼ်ၵုၼ်ႇ ပုင်ႈၶိုၼ်ႈထႅင်ႈ ပဵၼ်လၢႆပုၼ်ႈ ဝႃႈၼႆ။