ၽိူဝ်ႇဝႃႈ ငဝ်းလၢႆးမိူင်းမၢၼ်ႈ ၽႅဝ်ထိုင်တီႈလီမႆႈၸႂ်မႃး ၸိူဝ်းႁူဝ်ၼႃႈၸၼ်ႉသုင် ပႃႇတီႇၶွမ်ႊမိဝ်ႊၼိတ်ႉမိူင်းၶႄႇ၊ ၸဵမ်တၢင်းၽူႈႁူႉမေႃၶဝ်၊ ၽူႈလူင်ႉလႅၼ်ႇပိူင်ၵၢၼ်ၾၢႆႇမိူင်းၼွၵ်ႈၶဝ် ဢိုတ်းၽၵ်းတူသေ ဢုပ်ႇၵုမ်ၵၼ် တီႈၶုၼ်ႊမိင်ႊ ၼႂ်းလိူၼ်တီႊသိမ်ႊပိူဝ်ႊၼၼ်ႉၼႆ The Economic Times ဢၼ်ပၵ်းသင်ႉတီႈမိူင်း ဢိၼ်ႊတီႊယိူဝ်ႊ ဢွၵ်ႇၶၢဝ်ႇၵႂႃႇ မိူဝ်ႈဝၼ်းတီႈ 14 ပူၼ်ႉမႃးၼႆႉ။

ၸိူဝ်းၶိုၼ်ႈႁွတ်ႈပၢင်ၵုမ် ထတ်းႁၼ်ၼပ်ႉသၢင်ဝႃႈ ၶွင်ႇသီႇသိုၵ်းမၢၼ်ႈၼႆႉ ႁႂ်ႈပေႃးႁႅင်းယူပ်ႈၸွပ်ႈလူင်းမိူၼ်ၼႆ ဢမ်ႇတွၼ်ႉထူပ်းမႃးလႄႈ တႃႉဢမ်ႇႁၼ်သၢႆငၢႆ တႃႇတေၵႅတ်ႇၶႄႁႄႉၵင်ႈပၼ်လႆႈ လိူင်ႈၵပ်းသၢၼ်ၼႂ်းၵႄႈ ၶႄႇလႄႈမၢၼ်ႈ ၸဵမ်တင်းၽွၼ်းပၢင်ႈ မၢၵ်ႈမီးၶွင်မိူင်းၶႄႇၼၼ်ႉလႃႈ ဝႃႈၼႆယဝ်ႉ။

ၶွင်ႇသီႇသိုၵ်းမၢၼ်ႈၼႆႉ ႁူမ်ႈဝႃႈ မၼ်းတိုၵ်ႉၵုမ်းၵမ်လႆႈ ဝဵင်းယႂ်ႇဝဵင်းလူင် ၸိူင်ႉၼင်ႇ တႃႈၵုင်ႈ၊ ၼေႇပျီႇတေႃႇ၊ ဝဵင်းလိူဝ်ႇ ၸိူဝ်းၼႆႉယူႇၵေႃႈ ပိူဝ်ႈတႃႇၵႅတ်ႇၶႄႁႄႉၵင်ႈ ၽွၼ်းပၢင်ႈမၢၵ်ႈမီးမိူင်းၶႄႇတႄႉ တီႈၸုမ်းၸၢဝ်းၶိူဝ်း မႅၵ်ႇၵွင်ႈလုၵ်ႉ ၽိုၼ်ႉၶဝ်ၵေႃႈ တေလႆႈဝႆႉၼမ်ႉၼၵ်းသိုဝ်ႇသၢၼ်ၵႂႃႇယူႇ ဢွၼ်ပၼ်ၶေႃႈၺၢၼ်ႇ ၼႂ်းပၢင်ၵုမ်ၼၼ်ႉ ဝႃႈၼႆယဝ်ႉ။

ၵူၺ်းၵႃႈ ၸိူဝ်းၸုမ်း PDFs ဢၼ်ၸိုင်ႈမိူင်းဝၼ်းတူၵ်းၶဝ် ၸွႆႈထႅမ်ၵမ်ႉယၼ်ဝႆႉၼၼ်ႉတႄႉ ဢမ်ႇၵိုင်ႇလီၼပ်ႉပႃး။ ယဝ်ႉၵေႃႈ ၽူႈၶိုၼ်ႈႁွတ်ႈ ပၢင်ၵုမ်ၵမ်ႈၼမ် ထတ်းႁၼ်ၼပ်ႉသၢင်ဝႃႈ ငဝ်းလၢႆးမိူင်းမၢၼ်ႈ ၼႂ်းဝၼ်းမိူဝ်ႈလဵဝ်ၼႆႉ ဢမ်ႇပေႃးမီးသၢႆငၢႆ တႃႇတေပိၼ်ႇပႅင်ႈလႅၵ်ႈလၢႆႈ မိူၼ်မိူင်းသီႊရီႊယိူဝ်ႊ ၼႆယဝ်ႉ။

ၶၢဝ်ႇငၢဝ်းဢၼ်ၼႆႉ ယူႇတီႈလူင်ပွင်ၸိုင်ႈၶႄႇ ဢမ်ႇတွပ်ႇဢမ်ႇယိုၼ်၊ ၸႂ်ႈၵေႃႈဢမ်ႇဝႃႈ ဢမ်ႇၸႂ်ႈ ၵေႃႈဢမ်ႇဝႃႈ။ ႁဵတ်းမိူၼ်ဢမ်ႇႁူႉဢမ်ႇငိၼ်းသေ သိုပ်ႇၶိုင်ၸွမ်းၼင်ႇၽႅၼ်ၵၢၼ်မၼ်း တမ်းမီးဝႆႉၼၼ်ႉၵူၺ်း။

ဝၼ်းတီႈ 16 ပူၼ်ႉမႃးၼႆႉ ၸတ်းႁဵတ်း ပၼ်ပၢင်ဢုပ်ႇၵုမ် ၼႂ်းၵႄႈ MNDAA ၸုမ်းၵဝ်ႈၵၢင်ႉလႄႈ SAC သိုၵ်းမၢၼ်ႈ တီႈ ၶုၼ်ႊမိင်ႊ၊ ဢၼ်ၼႆႉ ပဵၼ်ပၢင်ၵုမ်ပွၵ်ႈသွင် ဢၼ်သွမ်ႉၶိုၼ်းၵမ်းပူၼ်ႉၵူၺ်း။ ယွၼ်ႉပၢင်ၵုမ် ပွၵ်ႈၼိုင်ႈ ဢၼ်ႁဵတ်းမႃးမိူဝ်ႈ လိူၼ်တီႊသႅမ်ႊပိူဝ်ႊ ဝၼ်းတီႈ 15 ၼၼ်ႉ ဢမ်ႇပဵၼ်ၼမ်ႉပဵၼ်တူဝ်သင်မႃး ၼင်ႇႁူႉထိုင်ၵၼ်ၶႃႈယဝ်ႉ။

ၵူၺ်းၵႃႈ မိူင်းၶႄႇၼႆႉ ၵႃႈဢမ်ႇပဵၼ်ဢမ်ႇၸူး လႅပ်ႈတေတိုဝ်ႁဵတ်း ႁႂ်ႈပေႃးဢွၵ်ႇမႃး ၶေႃႈတူၵ်းလူင်းသေဢၼ်ဢၼ်ယူႇ၊ ဝၢႆးလင် ႁွင်ႉၵဝ်ႈၵၢင်ႉယဝ်ႉ သမ်ႉတေႁွင်ႉထႅင်ႈ ၸုမ်းပလွင်ႈ TNLA ၼႆၵေႃႈ ဢွၼ်လၢမ်းႁၼ်ၵၼ် ဝႆႉယဝ်ႉ။

ၵွပ်ႈပိူဝ်ႈ လွင်ႈမႆႈၸႂ် ၼိူဝ်ၵၢၼ်မၢၵ်ႈမီးမၼ်းၼႆႉ ႁုပ်ႇႁွၼ်ႉထိုင်ထီးဝႆႉယဝ်ႉလူး။ ႁူမ်ႈဝႃႈ မၼ်းၵမ်ႉယၼ်ပၼ် ႁႅင်းယူႇ ၵေႃႈ ၼမ်ႉၵတ်ႉလႄႈ တၢင်းႁဵတ်းမိၼ်းဢွင်ႇလၢႆႇၼႆႉ ဢမ်ႇထိုင်တီႈလႆႈမၼ်ႈၸႂ်သႄႈ။

ၼပ်ႉၸွမ်းၵၢၼ်မၢၵ်ႈမီး ပိူင်လဵဝ်ၵူၺ်းၵေႃႈ ယူႇတီႈမိူင်းၶႄႇၼႆႉ တႃႉလီမႆႈၸႂ်တႄႉယူႇၼင်ႇၵဝ်ႇ၊ ၼႂ်းမိူင်းတႆး ပွတ်းႁွင်ႇလႄႈ တင်းၼႃႈတီႈၸပ်းသိုပ်ႇမၼ်း ဢၼ်ပဵၼ်မိူင်းမၢၼ်ႈ ပွတ်းၵၢင်ၼၼ်ႉၵူၺ်း။ ၽႅၼ်ၵၢၼ်လူင်းတိုၼ်းမိူင်းၶႄႇ ပၵ်းတမ်းဝႆႉပဵၼ် 23 ဢၼ်၊ ၼႂ်းၼင်ႇၼၼ် တႃ 13 ဢၼ်ၼႆႉ ၸုမ်းၸၢဝ်းၶိူဝ်းလႄႈ PDFၶဝ် ယိုတ်းသိမ်း ၵုမ်းၵမ်ဝႆႉယဝ်ႉ ၼႆ လႆႈႁၼ် ISP – Myanmar ၶူၼ်ႉၶႂႃႉ လၢႆးငၢၼ်းဢွၵ်ႇၶၢဝ်ႇဝႆႉယူႇ။

ပိူင်ယႂ်ႇပဵၼ် MNDAA လႄႈ TNLA ၵုမ်းဝႆႉ၊ ၼႂ်းမိုဝ်း PDFs တႄႉ မီးဝႆႉႁူင်းၸၢၵ်ႈၼီၵႄႇလ် တီႈတႃႈၵွင်လႄႈ ႁူင်း ၸၢၵ်ႈလိၼ်ပုၼ်ဢႄလ်ၾႃ တီႈဝဵင်းလိူဝ်ႇၵူၺ်း။ ပေႃးတူၺ်းတၢင်းမိူင်းရၶႅင်ႇ ၼႆၵေႃႈ ၽႅၼ်ၵၢၼ်မၢၵ်ႈမီး မိူင်းၶႄႇ တႃႇ 10 ဢၼ်ၼႆႉ ၽႅဝ်ဝႆႉၼႂ်းမိုဝ်း AA ယူႇယဝ်ႉ။

ဢဝ်ၸဵမ် လွတ်ႇတေႃႈၵႅတ်ႉသ်၊ လွတ်ႇၼမ်ႉမၼ်းမဵၼ် တေႃႇထိုင် ၽႅၼ်ၵၢၼ်တၢင်းရူတ်ႉလဵၼ်း၊ တၢင်းရူတ်ႉၵႃး၊ ၽႅၼ်ၵၢၼ်ၾႆးၾႃႉ ၸႂ်ႉႁႅင်းလူမ်း၊ ၽႅၼ်ၵၢၼ်မၢၵ်ႈမီး တႃႈႁိူဝ်းလိုၵ်ႉ ၸဵမ်ၸိူဝ်းၼႆႉ AA ၵုမ်းဝႆႉသဵင်ႈသဵင်ႈ။

ၸႄႈမိူင်းရၶႅင်ႇတင်းလုမ်ႈၼႆႉ ဢၼ် AA ပႆႇယိုတ်းသိမ်း တေႃႉတႄႉၵိုတ်းလိူဝ် သၢမ်ၸႄႈဝဵင်းၵူၺ်းယဝ်ႉလူး။ ၼင်ႇၼႆဝႃႈ မိူင်းၶႄႇ ဢမ်ႇမႆႈၸႂ် ဢမ်ႇပဵၼ်လႆႈလေႃႇ။ ၼႆလႄႈ ၽူႈႁူႉမေႃၶဝ်၊ ၽူႈလူင်ႉလႅၼ်ႇၶဝ် ၸင်ႇဢွၼ်ဝႃႈ ႁႂ်ႈသိုဝ်ႇသၢၼ်ၵပ်းတိတ်းၸွမ်း ၸုမ်းၸၢဝ်းၶိူဝ်းလုၵ်ႉၽိုၼ်ႉၼၼ်ႉယိုင်။ တေႃႈၼႆႉ ပႆႇၼပ်ႉပႃး ၸုမ်းၸၢဝ်းၶၢင် KIA ဢၼ်ယိုတ်းသိမ်းလႆႈပႃး သူပ်းတူသွင်မိူင်း ၸိူင်ႉၼင်ႇ ပၢင်ဝႃႈ၊ မၢၼ်ႈၸေႊ၊ ၸၢင်ႊႁွင်ႊ ၼၼ်ႉၵွၼ်ႇ။

ၵမ်းၼႆႉ ပေႃးတူၺ်းပၢင်ၵုမ် မိူဝ်ႈဝၼ်းသိုၼ်း ဢၼ် MNDAA လႄႈ SAC ဢုပ်ႇၵၼ်တီႈၶုၼ်ႊမိင်ႊၼၼ်ႉၼႆ ဢမ်ႇ ႁၼ်လၢၵ်ႇလၢႆးသင်မႃး၊ ဢမ်ႇႁၼ်တူၵ်းလူင်းလႆႈ တိုၵ်ႉၶမ်ၵၼ်မိူၼ်ၵဝ်ႇယူႇ ငိၼ်းဝႃႈၼႆ။

တႃႇထွႆပၼ်ၼႃႈတီႈ ဢၼ်တိုၵ်းပေႉဝႆႉၼၼ်ႉ MNDAA ဢမ်ႇယွမ်းၽွမ်ႉ၊ တႃႇပိုတ်ႇသဵၼ်ႈတၢင်းၵႃႉၶၢႆ ဝဵင်းလိူဝ်ႇ – မူႇ ၸေႊလႄႈ ႁူးၽၵ်းတူၵၢၼ်ၵႃႉၵေႃႈ ပႆႇငူပ်ႉငီႉႁႃႁၼ် ၶေႃႈၽွမ်ႉၸႂ်ၵၼ်။

ဢၼ်ၼႆႉ ယူႇတီႈၽူႈလူင်ႉလႅၼ်ႇမိူင်းၶႄႇၶဝ် တေလၢမ်းႁၼ်ဝႆႉၸဵမ်ပိုင်းလႄႈ ၸင်ႇတၵ်းပၼ်ၶေႃႈၺၢၼ်ႇဝႃႈ ႁႂ်ႈသိုဝ်ႇသၢၼ်ၵပ်းတိတ်းၸွမ်း ၸုမ်းၸၢဝ်းၶိူဝ်းလုၵ်ႉၽိုၼ်ႉၶဝ်ၼႆႁိုဝ်၊ တႃႉလီၼပ်ႉသွၼ်ႇလိုၵ်ႉၼႂ်းတႄႉ ယဝ်ႉ။

လီယဝ်ႉ ထိုင်ၵမ်းလူဝ်ႇလႆႈသိုဝ်ႇသၢၼ်ၵပ်းတိတ်းတႄႉမႃး လူင်ပွင်ၸိုင်ႈမိူင်းၶႄႇ တေၵပ်းသၢၼ်ၸွမ်းၸုမ်းၸၢဝ်းၸိူဝ်းလႂ်၊ ၶိုင်ႈၼမ်တႄႉ ၸၢင်ႈပဵၼ်ၸုမ်းၸိူဝ်းတိုၵ်းလႆႈဝႆႉ ၼႃႈတီႈဢုပ်ႉပိူင်ႇလႄႈ ၼႃႈတီႈၽႅၼ် ၵၢၼ်မၢၵ်ႈမီးၶွင်ၶႄႇ ၼၼ်ႉၵူၺ်းယဝ်ႉ။

ပိၵ်ႉသမ်ႉ ပဵၼ်ဢူၺ်းလီၶဝ်ႈဢွၵ်ႇဝႆႉ ပိူင်ၽဵၼ်ႈၵေႃႈယႃႇ ၽွၼ်းပၢင်ႈၼႆႉ ပဵၼ်ထီႉၼိုင်ႈ၊ ၽွၼ်းပၢင်ႈၼႆႉ ပဵၼ်ထီႉသွင် ၼႆ ႁူႉထိုင်ပွင်ႇၸႂ်ၵၼ်ယူႇ။ တူၺ်းတူဝ်ယၢင်ႇတီႈမိူင်းသီႊရီႊယိူဝ်ႊ ပဵၼ်မီးယူႇၼၼ်ႉၵူၺ်းလႃႈ၊ ၸုမ်း HTS ၼႆႉ ႁူမ်ႈဝႃႈ ပဵၼ်ၸုမ်းၵူၼ်းထိူၼ်ႇၵူၺ်း။

တေႃႈၼင်ႇ ဢမေႊရိၵၼ်ႊ ယင်းဢွၵ်ႇၵႃႈႁူဝ်တေႃႇ ၽူႈယႂ်ႇၶဝ်ဝႆႉၵွၼ်ႇၵေႃႈ ၽိူဝ်ႇထိုင်တီႈပဵၼ်မႃးၸုမ်း တိုၵ်းသိမ်းလႆႈမိူင်းတႄႉ ႁိမ်းႁွမ်းဢမ်ႇၵႃး ပႃးၸဵမ်လၢႆလၢႆမိူင်း ဢွၼ်ယိုၼ်ယၼ်သိုဝ်ႇသၢၼ်ၵပ်းၸူးမႃး၊ တေႃႈၼင်ႇ ဢမေႊရိ ၵၼ်ႊ ယင်းလူတ်းယႃႉၶိုၼ်း ၶေႃႈပိုၼ်ၽၢဝ်ႇ ဢွၵ်ႇၵႃႈႁူဝ်မၼ်းၼၼ်ႉယိုင်။

ပေႃးၼႆ ၸၢမ်းႁႂ်ႈဝႃႈ မဢလ ဢမ်ႇပဵၼ်တူဝ်ယဝ်ႉၼႆ ယူႇတီႈမိူင်းၶႄႇ တေႁဵတ်းၵေႃႉ တေႃႇၸုမ်းၸၢဝ်းလႂ်၊ ၸုမ်းၸၢဝ်းၶိူဝ်းလုၵ်ႉၽိုၼ်ႉ ဢၼ်လႂ် ၵႅတ်ႇၶႄပၼ်လႆႈ ၼမ်ႉတွၼ်းၽွၼ်းပၢင်ႈတႃႇမိူင်းမၼ်းၵေႃႈ တေပဵၼ်ဢူၺ်းလီ တႃႇမၼ်းၵူၺ်းၼႃႇ။ တႃႇၸုမ်းၸၢဝ်းၸိူဝ်း ဢမ်ႇဝၵ်ႉဢမ်ႇငမ်လႆႈဝႆႉ သေသမ်ႇသေပိူင်တႄႉ ၸၢင်ႈတေလႆႈၵိုတ်း ၸိူဝ်းယူႇၼႂ်းပိုၼ်းမွင်သဝ်ႈၸဝ်ႈၵဝ်ႇၵူၺ်းယူဝ်ႉၼႆ ယွၼ်းပၢႆးၼႄတၢင်းႁၼ် မွၵ်ႈၼႆႉၵွၼ်ႇၶႃႈ။