မိူဝ်ႈၼႆႉ ဝၼ်းတီႈ 10/1/2025 ယၢမ်းၵၢင်ၼႂ်မွၵ်ႈ 10 မူင်း မီးၸုမ်းဢမ်ႇႁူႉၾၢႆႇ 6 ၵေႃႉ ယိပ်းၵွင်ႈၸေးမိုဝ်းသေ ၶဝ်ႈ ၸူၼ်တီႈႁၢၼ်ႉမႄးရူတ်ႉၵႃး “ဟိုင်းရာဇာ ကား၀ပ်ရှော့” တီႈပွၵ်ႉမၢၼ်ႈဝဵင်း ၼႂ်းဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ လႆႈၵႂႃႇရူတ်ႉၵႃး၊ ၾူၼ်းလႄႈ ငိုၼ်းထႅင်ႈတင်းၼမ် ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈၽူႈတွႆႇႁွၵ်ႈဝႃႈ – “ၵူၼ်းၸူၼ်ၼၼ်ႉ ၶီႇၵႃးမႃးၸွမ်းၵၼ် လမ်းၼိုင်ႈသေ ၶဝ်ႈ ၸူၼ်တီႈႁၢၼ်ႉမႄးရူတ်ႉၵႃး ၼႂ်းပွၵ်ႉမၢၼ်ႈဝဵင်း လႆႈၵႂႃႇငိုၼ်းမၢၼ်ႈ 40 သႅၼ်ပျႃး၊ ငိုၼ်းၶႄႇ 10,000 ယႂၼ်ႊ၊ ၾူၼ်းတီႈၵူၼ်းႁဵတ်းၵၢၼ်ထႅင်ႈ 10 လုၵ်ႈလႄႈ ၵႃးလႅၼ်ႊၶူႊသိူဝ်ႊ (Landcruiser) လမ်း ၼိုင်ႈ”- ဝႃႈၼႆ။

ၸုမ်းဢမ်ႇႁူႉၾၢႆႇ 6 ၵေႃႉၼၼ်ႉ ပဵၼ်ၽူႈၸၢႆးမူတ်း ယဝ်ႉၵေႃႈ ယိပ်းၵွင်ႈယၢဝ်းၸေးမိုဝ်းၵၼ်ၵူႈၵေႃႉသေ ၶဝ်ႈၸူၼ်။ ၵႃးဢၼ်ၶဝ် 6 ၵေႃႉ ၶီႇမႃးၸွမ်းၵၼ်လမ်းၼိုင်ႈၼၼ်ႉ ပဵၼ်ၵႃးသႅၼ်း ဢေႃႊလႅၼ်ႊတႃႊ (outlander) မႃးလမ်းၼိုင်ႈ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 21/12/2024 ယၢမ်းၵၢင်ၼႂ်မွၵ်ႈ 10 မူင်း မေႃယႃယိင်း ၵေႃႉၼိုင်ႈ ၽွင်းတိုၵ်ႉသၢႆႇႁူဝ် ၼႂ်းႁၢၼ်ႉ ၵႅတ်းၶူၼ်ႁူဝ် “ၼိၼ်းၼိၼ်း” (နှင်းနှင်းဆံပင်ညှင်ဆိုင်) တီႈပွၵ်ႉၼိူဝ် ဝဵင်းမူႇၸေႊ ၼၼ်ႉၵေႃႈ ၺႃးၽူႈၸၢႆးၵေႃႉၼိုင်ႈ ဢမ်ႇႁူႉၾၢႆႇ ၶဝ်ႈၼႂ်းႁၢၼ်ႉသေ ဢဝ်ၵွင်ႈၸမ်ႈမၼ်းၼၢင်း ၸူၼ်ဢဝ်ၵႃးၵႂႃႇ လမ်းၼိုင်ႈ။

လိူဝ်ၼၼ်ႉ ယင်းပႆႇႁိုင် မိူဝ်ႈဝၼ်းတီႈ 5/1/2025 ယၢမ်းႁူဝ်ၶမ်ႈမွၵ်ႈ 5 မူင်း ၼၼ်ႉၵေႃႈ မီးၸုမ်းဢမ်ႇႁူႉၾၢႆႇ 4 ၵေႃႉ ၶီႇ ၵႃးမႃးၸွမ်းၵၼ်လမ်းၼိုင်ႈသေ ၶဝ်ႈၸူၼ်ႁိူၼ်းယေး ၵူၼ်းမိူင်းပွၵ်ႉ 2 တီႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း ၸဝ်ႈၶွင်ႁိူၼ်း ၽူႈၸၢႆးဢႃယု 50 ပၢႆ ၵေႃႉၼိုင်ႈ ၺႃးယိုဝ်းတၢႆ။