သိုၵ်းမၢၼ်ႈ ဢထမ်ႇမ ၶၢၼ်းဢဝ်ၵႃးၵူၼ်းမိူင်းယႂႃႇငၢၼ်ႇ ၵႂႃႇၸႂ်ႉၼႂ်းၵၢၼ်သိုၵ်း သင်ဢမ်ႇပၼ်ၸႂ်ႉတိုဝ်းၸိုင် ၸဝ်ႈၵႃးၶဝ် ၺႃးပေႃႉထုပ်ႉ။
တႄႇဢဝ် ၵၢင်လိူၼ်တီႊသႅမ်ႊပိူဝ်ႊ 2024 ၼၼ်ႉမႃး သိုၵ်းမၢၼ်ႈ ယိုတ်းမိူင်းတင်း ၸုမ်းပိဝ်ႇၸေႃးထီး ၶၢၼ်းၸႂ်ႉရူတ်ႉ ၵႃး ၵူၼ်းမိူင်းတၢင်းၾၢႆႇဢွၵ်ႇဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ၼိုင်ႈဝၢၼ်ႈလႂ် ယွၼ်းၵႃးၸႂ်ႉ 3 လမ်း ဝႃႈၼႆ။
ၵူၼ်းပိုၼ်ႉတီႈ ဝဵင်းယႂႃႇငၢၼ်ႇ လၢတ်ႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ မႃးတဵၵ်းၶၢၼ်း ရူတ်ႉၵႃး တီႈၵူၼ်းဝၢၼ်ႈ။ ၵူၼ်းဝၢၼ်ႈဢမ်ႇပၼ် ထဵင်ၶိုၼ်းလႄႈ ထိုင်တီႈၶဝ် ပေႃႉထုပ်ႉၸဝ်ႈၵႃးဢေႃႈ။ ယဝ်ႉၵေႃႈ ဢဝ်ၵႃးၵႂႃႇ ၶဝ်ဝႃႈ တေဢဝ်ၵႂႃႇၸႂ်ႉ 4 ဝၼ်းသေ တေမႃးသူင်ႇပၼ်ၶိုၼ်း ႁၢၼ်ႉတေႃႇထိုင်ယၢမ်းလဵဝ် ၶဝ်ယင်းပႆႇမႃးသူင်ႇၶႃႈ”- ဝႃႈၼႆ။
ယဝ်ႉၵေႃႈ သိုၵ်းမၢၼ်ႈၼႆႉ ပၢႆပၵ်းတပ်ႉဝႆႉၼႂ်းဝၢၼ်ႈထႅင်ႈသေ လွၵ်ႇငိုတ်ႈၵူၼ်းဝၢၼ်ႈဝႃႈ သင်ဢွၵ်ႇႁိူၼ်းယေး ယၢမ်းၵၢင်ၶမ်ႈၵၢင်ၶိုၼ်းၸိုင် တေၺႃးတီႉၺွပ်းႁၢပ်ႇၶျေႃး ဝႃႈၼႆ။
မိူၼ်ၼႆၼင်ႇၵဝ်ႇ ၸုမ်းပိဝ်ႇၸေႃးထီး ဢၼ်ယူႇၾၢႆႇတႂ်ႈသိုၵ်းမၢၼ်ႈ ၵုမ်းၵမ် ၼၼ်ႉၵေႃႈ ယိပ်းၵွင်ႈၵၢင်ႇသေ လွၵ်ႇငိုတ်ႈၵဵပ်းငိုၼ်း၊ ၶဝ်ႈသၢၼ် ၵူၼ်းဝၢၼ်ႈ ၸိူဝ်းၼႆႉထႅင်ႈ။
ၵူၼ်းပိုၼ်ႉတီႈ ၽူႈယိင်းၵေႃႉၼိုင်ႈ ဝဵင်းယႂႃႇငၢၼ်ႇ လၢတ်ႈၽူႈတွႆႇႁွၵ်ႈဝႃႈ – “ၼႂ်းမူႇဝၢၼ်ႈသမ်ႉ ၸုမ်းပိဝ်ႇၸေႃးထီးၶဝ် ယိပ်းၵွင်ႈၵၢင်ႇသေ ၵဵပ်းငိုၼ်းၵူၼ်းဝၢၼ်ႈ။ သင်ၶဝ်ၵဵပ်းၵႃႈႁိုဝ် ႁဝ်းၶႃႈ ၵူၼ်းဝၢၼ်ႈလႆႈပၼ်ၵႃႈၼၼ်ႉ။ ယဝ်ႉၵေႃႈ ၶဝ်ႈသၢၼ် ၸိူဝ်းၼႆႉထႅင်ႈ။ တီႈႁိူၼ်းၶႃႈၼႆႉ ၶဝ်မႃးယွၼ်း လႆႈပၼ်ငိုၼ်း 5 မိုၼ်ႇပျႃးဢေႃႈ။ ၵူဝ်ၶႃႈဢေႃႈ ၶဝ်ႁဵတ်းၸိူင်ႉ ၼႆၼႆႉ”- ဝႃႈၼႆ။
ယၢမ်းလဵဝ် ပဵၼ်ၶၢဝ်းလူဝ်ႇပိတ်းမၢၵ်ႇၸွၵ်းယဝ်ႉလႄႈ ဢိင်ၼိူဝ် လွင်ႈသိုၵ်းမၢၼ်ႈ ၸုမ်းပိဝ်ႇၸေႃးထီး တူင်ႉၼိုင်ယူႇၸွမ်း ၼႂ်းမူႇဝၢၼ်ႈ ၸိူင်ႉၼႆၼႆႉ ႁဵတ်းႁႂ်ႈတုမ်ႉတိူဝ်ႉၵူၼ်းမိူင်းယၢပ်ႇၽိုတ်ႇ ဢမ်ႇႁတ်းၵႂႃႇႁဵတ်းၵၢၼ် ပိတ်းမၢၵ်ႇၸွၵ်း ၼႆယဝ်ႉ။
လိူဝ်ၼၼ်ႉ တၢင်းၶဝ်ႈဢွၵ်ႇဝဵင်းယႂႃႇငၢၼ်ႇၼႆႉ သိုၵ်းမၢၼ်ႈ တင်ႈၵဵတ်ႉ/ လၢၼ်ႇသေ ပႂ်ႉၵူတ်ႇထတ်းရူတ်ႉၵႃးတၢင်ႇၵုၼ်ႇၵႂႃႇမႃး ၼိူဝ်သဵၼ်ႈတၢင်းယႂႃႇငၢၼ်ႇ – ဝဵင်းလိူဝ်ႇ ႁၢဝ်ႈႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ