ဝၼ်းတီႈ 4 ၼႆႉ ပဵၼ်ဝၼ်းလွတ်ႈလႅဝ်းသဝ်းၶေႃ မိူင်းမၢၼ်ႈၼႆသေ သိုၵ်းမၢၼ်ႈ ပိုၼ်ၽၢဝ်ႇ ပဵၼ်တၢင်းၵၢၼ်ဝႆႉဝႃႈ တေပွႆႇပၼ်ၵူၼ်းတူၵ်းၶွၵ်ႈၵၢၼ်မိူင်း မွၵ်ႈ 600 ၵေႃႉၼႆသေ ဢၼ်ပူၼ်ႉလွတ်ႈဢွၵ်ႇမႃးသမ်ႉမီး 344 ၵေႃႉၵူၺ်း – ၼႅင်ႈသၢၼ်ၵူၼ်းတူၵ်းၶွၵ်ႈၵၢၼ်မိူင်း မိူင်းမၢၼ်ႈ (PPNM) ပိုၼ်ၽၢဝ်ႇဝႆႉ ၼႂ်းဝၼ်းတီႈ 6/1/2025 ၼႆႉၼင်ႇၼႆ။
ၸုမ်း PPNM ပၵ်းတႃပႂ်ႉတူၺ်းၵဵပ်းသဵၼ်ႈမၢႆ တီႈၶွၵ်ႈၶင် 40 ပၢႆ တူဝ်ႈမိူင်းမၢၼ်ႈပတ်းပိုၼ်ႉသေ ယိုၼ် ယၼ်လၢတ်ႈဝႃႈ – ၵူၼ်းတူၵ်းၶွၵ်ႈၵၢၼ်မိူင်း ဢၼ်လွတ်ႈဢွၵ်ႇမႃး မီး 344 ၵေႃႉ။ ၼႂ်းၼၼ်ႉ ၸၢႆး 208 ၵေႃႉ၊ ယိင်း 131 ၵေႃႉ၊ ဢၼ်ပႆႇယိုၼ်ယၼ်ၸၢႆး/ယိင်းလႆႈသမ်ႉ မီး 5 ၵေႃႉ ဝႃႈၼႆ။
ၼင်ႇႁိုဝ် တေပဵၼ်တီႈမၢႆတွင်း ဝၼ်းလွတ်ႈလႅဝ်းသဝ်းၶေႃ မိူင်းမၢၼ်ႈ ၶွပ်ႈတဵမ် 77 ပီ ၼႆသေ မိူဝ်ႈဝၼ်းတီႈ 4/1/2025 ယၢမ်းၵၢင်ၼႂ်ၼၼ်ႉ သိုၵ်းမၢၼ်ႈပိုၼ်ၽၢဝ်ႇဝႃႈ တူဝ်ႈမိူင်းမၢၼ်ႈပတ်းပိုၼ်ႉ ပွႆႇပၼ်ၵူၼ်းတူၵ်း ၶွၵ်ႈၸၢႆး/ယိင်း 5,864 ၵေႃႉ ဝႃႈၼႆ။
ၼႂ်းၶၢဝ်းတၢင်းသိုၵ်းမၢၼ်ႈ ယိုတ်းဢႃႇၼႃႇမႃး ၸမ် 4 ပီၼႆႉ သိုၵ်းမၢၼ်ႈ ပွႆႇပၼ်ၵူၼ်းတူၵ်းၶွၵ်ႈ 16 ၵမ်း၊ ၵူၼ်းတူၵ်း ၶွၵ်ႈ ဢၼ်ပူၼ်ႉလွတ်ႈတၢမ်ႇတၢင်းၽိတ်း မီး 101,729 ၵေႃႉ၊ ၼႂ်းၼၼ်ႉ ပႃးၵူၼ်းတူၵ်းၶွၵ်ႈၵၢၼ်မိူင်း 8,762 ၵေႃႉၼႆ ISP – Myanmar ပိုၼ်ၽၢဝ်ႇဝႆႉ ၼႂ်းဝၼ်းတီႈ 6 ၼႆႉၼင်ႇၼႆ။
ဢၢင်ႈဢိင် – RFA
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ