ဝၢႆးသေ ပွႆးဝၼ်းၵိူတ်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ၸတ်းႁဵတ်းတီႈမိူင်းၽူင်း ၸႄႈဝဵင်းတႃႈၶီႈလဵၵ်း ယဝ်ႉတူဝ်ႈလီငၢမ်းယဝ်ႉ ၸဝ်ႈတေယေႃးမုၼ် ၵႂႃႇၸတ်းတီႈဝဵင်းၵႅဝ်ႈ ၸိုင်ႈထႆးထႅင်ႈ ဝႃႈၼႆ။

ပေႃးထိုင်မႃး ဝၼ်းတီႈ 7-9/1/2025 ၼႆႉ တေယူႇတီႈ သင်ၶၸဝ်ႈလႄႈ တၵ်ႉၵႃႇသတ်ႉထႃး လုၵ်ႈၼွင်ႉတပေးပွင်ႈပၢႆ ႁူမ်ႈၵၼ် ၸတ်းႁဵတ်းပၢင်ပွႆးယုၵ်ႉယွင်ႈ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢႃယုၶွပ်ႈတဵမ် 61 ပီ တီႈဝတ်ႉၽရႃႉထၢတ်ႈ ဝဵင်းၵႅဝ်ႈ ၸႄႈဝဵင်းၵဵင်းသႅၼ် ၸႄႈတွၼ်ႈၵဵင်းႁၢႆး ၼႂ်းၸိုင်ႈထႆး။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လႆႈငိၼ်းဝႃႈ ပေႃးယဝ်ႉ တီႈမိူင်းၽူင်းယဝ်ႉ တေသိုပ်ႇၵႂႃႇထႅင်ႈ တီႈဝဵင်းၵႅဝ်ႈ ၼႂ်းဝၼ်းတီႈ 7 တေႃႇထိုင် 9 ၼႆၶႃႈဢေႃႈ”- ဝႃႈၼႆ။

ပၢင်ပွႆး ဝၼ်းၵိူတ်ႇၶူးဝႃးဝုၼ်းၸုမ်ႉ တီႈဝဵင်းၵႅဝ်ႈ ပီၵၢႆၼႆႉ ၸတ်းႁဵတ်းၼႂ်းဝၼ်းတီႈ 7-9/1/2024 မိူၼ်ၵၼ် ပီၼၼ်ႉ ၵေႃႈ မီးတၵ်ႉၵႃႇထႆးလႄႈ ႁႅင်းၵၢၼ်တႆးၸိူဝ်းၼႆႉ ၶဝ်ႈႁူမ်ႈဝႆႈသႃ ၵိုၼ်းၶွၼ်ႈၼမ် ၼႆယဝ်ႉ။

ပွႆးဝၼ်းၵိူတ်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢၼ်ၸတ်းႁဵတ်းတီႈဝတ်ႉၽရႃႇထၢတ်ႈသီႇၻွၼ်ႊရိူင်း ဢိူင်ႇမိူင်းၽူင်း(ၵ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ ၸတ်းႁဵတ်းမႃး တင်ႈတႄႇဝၼ်းတီႈ 1-6/1/2025 ၼႆယဝ်ႉ။

“ပီၼႆႉ လႆႈဝႃႈ ၵိုၼ်းၶွၼ်ႈလိူဝ်ပီပူၼ်ႉဢေႃႈ။ မိူဝ်ႈဝၼ်းတီႈ 3 – 4 – 5  ရူတ်ႉၵႃး တိတ်းၶပ်ႉၵၼ်ပေႇၸႂ် ၼၼ်ႉယဝ်ႉ ၵိုၼ်းတႄႉၵိုၼ်းဝႃႈ ၵူၼ်းတႄႉ။ မိူဝ်ႈၼႆႉ ဝၼ်းတီႈ 6 သမ်ႉ မႃးၸတ်းတီႈထၢတ်ႈပုတ်ႉထၵႃႇယ ၼႂ်းမိူင်းၽူင်းၵူၺ်းၼင်ႇၵဝ်ႇ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

ဝၼ်းၵိူတ်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉၼႆႉ တူၵ်းမႅၼ်ႈဝၼ်းတီႈ 5 လိူၼ်ၵျႅၼ်ႊၼိဝ်ႊရီႊ။ ပေႃးႁွတ်ႈထိုင်မႃး ဝၼ်းၵိူတ်ႇၼႆႉ ၸဝ်ႈဢတိတ်ႉထၢၼ်ႇဝႆႉ တေဢမ်ႇလၢတ်ႈၵႂၢမ်းတႃႇ 1 ဝၼ်း ၼႆယဝ်ႉ။  

ၸဝ်ႈသိလ်ထမ်း ၶူးဝႃးဝုၼ်းၸုမ်ႉၼႆႉ ၸႃတိတီႈၵိူတ်ႇ ပဵၼ်ဝၢၼ်ႈမႄႈၶမ်းၼွင်မူဝ် ဢိူင်ႇမႄႈၶမ်း ၸႄႈဝဵင်းမႄႈၸၼ်း ၸႄႈတွၼ်ႈၵဵင်းႁၢႆး။ ပဵၼ်လုၵ်ႈပေႃႈ သႅင်လႃႈလႄႈ မႄႈၶမ်းလႃႈ။ ၽွင်းဢႃယုၸဝ်ႈ 4 ပီ ထိုင် 10 ပီၼၼ်ႉ လႆႈၶဝ်ႈႁူင်းႁဵၼ်းထႆး။ ထိုင်မႃးဢႃယု 11 ပီၼၼ်ႉ ၶိုၼ်ႈပဵၼ်ၸဝ်ႈသၢင်ႇ။ ဢႃယု 12 ပီ တၵ်ႉၵႃႇသတ်ႉထႃး ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း ၸင်ႇၵႂႃႇယိုၼ်ႈမွၵ်ႇ ယေႃးၸဝ်ႈမႃးပူၵ်းပွင်သႃသၼႃ တီႈဝတ်ႉၽရႃႉထၢတ်ႈသီႊတွၼ်ႊရိူင်း (သီရိတွၼ်းႁိူင်း) ၸႄႈဝဵင်းတႃႈၶီႈလဵၵ်း တေႃႇထိုင်ဝၼ်းမိူဝ်ႈၼႆႉ။