ၵူၼ်းၸၢႆး သႅၼ်းပၢၼ်ၶၢဝ်ႉၵေႃႉၼိုင်ႈ ထုၵ်ႇၶႃႈႁႅမ်တၢႆ တီႈၸႄႈဝဵင်းယႂႃႇငၢၼ်ႇ ၽွင်းမၼ်းၸၢႆး ၵႂႃႇတေႃႇၽၢႆႉ တီႈပၢင် ၸႃႉယဝ်ႉသေပွၵ်ႈၶိုၼ်းႁိူၼ်း။
ဝၼ်းတီႈ 2/1/2025 ၼၼ်ႉ ၵူဝ်ႇတႃးငႄႇၵျီး ဢႃယု 50 ပၢႆ ၵူၼ်းယူႇပွၵ်ႉၵၢတ်ႇ ဝဵင်းယႂႃႇငၢၼ်ႇ ၵႂႃႇလဵၼ်ႈၽၢႆႉ (တေႃႇလွင်း) တီႈပၢင်ၸႃႉ ဝၢၼ်ႈပူၺ်းၼၽႃး ၼႂ်းဢိူင်ႇၼပၢၼ်းၵျီး ဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ၽွင်းမၼ်းၸၢႆးတေႃႇ ၽၢႆႉ ပေႉပိူၼ်ႈယဝ်ႉသေ ပွၵ်ႈႁိူၼ်းၶိုၼ်းၼၼ်ႉ ၺႃးၶႃႈႁႅမ်တၢႆ ၼႂ်းၵႄႈဝၢၼ်ႈၼပၢၼ်းၵျီးလႄႈ ဝၢၼ်ႈပူၺ်းၼၽႃး။
ၽူႈၸၢႆးသႅၼ်းပၢၼ်ၶၢဝ်ႉ ၵူၼ်းၸမ်ၸႂ် (ၵူဝ်ႇတႃးငႄႇၵျီး) လၢတ်ႈၽူႈတွႆႇႁွၵ်ႈဝႃႈ -“မၼ်းပဵၼ်ၵူၼ်းသူင် လဵၼ်ႈလွင်ႈတေႃႇလွင်း။ ပေႃးမၼ်းလဵၼ်ႈၽၢႆႉ လဵၼ်ႈလွင်းသမ်ႉၵႆႉပေႉပိူၼ်ႈၼႃႇ။ တေႃႈလဵဝ်ၵေႃႈ မၼ်း လဵၼ်ႈပေႉပိူၼ်ႈသေလႄႈ ပွၵ်ႈႁိူၼ်းၶိုၼ်းလႄႈ ၺႃးၶႃႈႁႅမ်တၢႆပႅတ်ႈ ၽွင်းပႆႇထိုင်ႁိူၼ်း။ တီႈတူဝ်တၢႆ မၼ်း ၸၢႆး ပဵၼ်ႁွႆးမိတ်ႈလၢႆလၢႆ”- ဝႃႈ ၼႆ။
လွင်ႈၵူၼ်းဝၢၼ်ႈ ထုၵ်ႇၶႃႈႁႅမ်တၢႆၼႆႉ ဢမ်ႇမီးၽႂ်ဢဝ်လိူင်ႈဢဝ်လၢဝ်းပၼ်။ ပဵၼ်ၽႂ်ၵေႃႉ လူင်းမိုဝ်းၶႃႈႁႅမ် တၢႆၵေႃႈ ဢမ်ႇပႆႇႁူႉတေႃႇထိုင်ဝၼ်းမိူဝ်ႈၼႆႉ။
ဝဵင်းယႂႃႇငၢၼ်ႇၼႆႉ ပဵၼ်ဝဵင်းဢၼ်ယူႇလိုၵ်ႉ/ ၵႆသဵၼ်ႈတၢင်းၵႃး။ ၵႃႈၵွၼ်ႇပူၼ်ႉမႃး ပဵၼ်ဝဵင်းဢၼ်ၵတ်းယဵၼ် ဢမ်ႇမီးၶဵၼ်သင်လႄႈ ဢမ်ႇမီးၸုမ်းယိပ်းၵွင်ႈၵၢင်ႇ သၢၼ်ၶတ်းသိုၵ်းမၢၼ်ႈ။ ၵူၺ်းၵႃႈ ဝၢႆးသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ ထုင်ႉဝဵင်းယႂႃႇငၢၼ်ႇ ပၢင်တိုၵ်းသိုၵ်းသိူဝ်ၵေႃႈလိူင်ႇ၊ ဝၢႆးလင် သိုၵ်းမၢၼ်ႈပိုၼ်ၽၢဝ်ႇ ၵူၼ်းမိူင်းႁၢပ်ႇၵၢၼ်သိုၵ်း ၼႆႉ ၵူၼ်းႁၢႆၵေႃႈၼမ် ဢၼ်ၶႃႈႁႅမ်ၵၼ်ၵေႃႈ ၼမ်မႃး။ ၼုမ်ႇႁၢႆးၸၢႆးယိင်း ၵူၼ်းမိူင်းဝဵင်းယႂႃႇငၢၼ်ႇ ဢမ်ႇမီးလွင်ႈႁူမ်ႇလူမ်ႈလႄႈ ဢမ်ႇႁတ်းၵႂႃႇမႃးၵေႃႉလဵဝ်။
“ယၢမ်းလဵဝ် ၵႆႉလႆႈငိၼ်း လွင်ႈၶႃႈႁႅမ်ၵၼ်ၼႃႇလႄႈ ဢမ်ႇပေႃးႁတ်းၵႂႃႇတၢင်းလႂ်၊ မိူဝ်ႈဢွၼ်တၢင်းတႄႉ ပေႃးပွၵ်ႈၵၢၼ်မႃးယဝ်ႉၵေႃႈ ၵႂႃႇပိတ်ႉမၢၵ်ႇၼင်ၸွမ်းတႆးၵေႃႉ။ ၵၢင်ၶမ်ႈၵေႃႈ ဢွၵ်ႇလႄႇတႃႇသေႇ။ တေႃႈလဵဝ်တႄႉ ၵႂႃႇၵၢၼ်ၵေႃႈ လူဝ်ႇၼႅတ်ႈၵႂႃႇၼႅတ်ႈမႃး၊ ၵၢင်ၶမ်ႈမႃးၵေႃႈ ပွၵ်ႈၶိုၼ်းႁိူၼ်းၵူၺ်းယဝ်ႉ။ ပေႃးၵေႃႉလဵဝ်တႄႉ ဢမ်ႇႁတ်းၵႂႃႇတၢင်းလႂ်ယဝ်ႉ ”- ဝႃႈၼႆ။
ယၢမ်းလဵဝ် တီႈၸႄႈဝဵင်းယႂႃႇငၢၼ်ႇ သိုၵ်းမၢၼ်ႈ မႃးတင်ႈတပ်ႉဝႆႉႁူဝ်ဝၢၼ်ႈ။ ပၢင်တိုၵ်းတႄႉ ယဵၼ်ဝႆႉသေတႃႉ ၵူၼ်းဝၢၼ်ႈၵႂႃႇမႃး ၺႃးသိုၵ်းမၢၼ်ႈၵူတ်ႇထတ်း ထဵတ်ႈထၢမ်ႁၢဝ်ႈႁႅင်း ဝႃႈၼႆ။
ဝၼ်းတီႈ 26/11/2024 ယၢမ်းၵၢင်ၶမ်ႈ 6 မူင်း ၽွင်းၵၢင်ႉၵႄႇဝၢၼ်ႈၽယႃးၵျီးၵူင်း ဝဵင်းယႂႃႇငၢၼ်ႇ ၸိုဝ်ႈႁွင်ႉ ဢူးၸေႃႇမဵဝ်းၼၢႆႇ တိုၵ်ႉဢုပ်ႇၵၼ်တင်းၵူၼ်းဝၢၼ်ႈ ၵေႃႉၼိုင်ႈယူႇၼၼ်ႉ မီးၽူႈၸၢႆး ဢမ်ႇႁူႉၾၢႆႇ 2 ၵေႃႉ ၶဝ်ႈႁိူၼ်းမႃးယိုဝ်းတၢႆထင်တီႈ တင်း 2 ၵေႃႉ။
ပူၼ်ႉမႃး မိူဝ်ႈဝၼ်းတီႈ 13/10/2024 ၵေႃႈ တေႃႈၼင်ႇၼၼ်။ သွင်ၽူဝ်မေး ၽူႈၵွၼ်းဝၢၼ်ႈတဵင်ႇၵူင်း ၸႄႈဝဵင်းယႂႃႇငၢၼ်ႇ ၼၼ်ႉၵေႃႈ ၺႃးၸုမ်းဢမ်ႇႁူႉၾၢႆႇ ၶဝ်ႈယိုဝ်းတၢႆၵိုၵ်းႁိူၼ်း ၼင်ႇၵဝ်ႇ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ