ၵူၼ်းဝၢၼ်ႈလွႆယၢင်း ၸႄႈဝဵင်းမိူင်းၵိုင် ၵႂႃႇလဵင်ႉၵႂၢႆး ၽွင်းၼၼ်ႉမၢၵ်ႇသမ်ႉတႅၵ်ႇ၊ SSPP ႁႄႉၵူၼ်းလဵင်ႉၵႂၢႆးဢၢၼ်းၵူတ်ႇထတ်း သမ်ႉလႅၼ်ႈပၢႆႈလႄႈ ယိုဝ်း- တိူဝ်ႉၵူၼ်းလဵင်ႉၵႂၢႆးတၢႆ ဝႃႈၼႆ။

လွင်ႈၼႆႉပဵၼ်ၵႂႃႇမိူဝ်ႈဝၼ်းတီႈ 19/05/2023 တီႈႁိၼ်းဝၢၼ်ႈလွႆယၢင်း ၸႄႈဝဵင်းမိူင်းၵိုင် ၸိုင်ႈတႆး ပွတ်းၸၢၼ်း။ SSPP လၢတ်ႈဝႃႈ ယွမ်းႁပ်ႉလွင်ႈလႆႈယိုဝ်းမႅၼ်ႈ။ တုၵ်းယွၼ်းပႃးဝႃႈ  ပွၵ်ႈတေမႃး သင်ႁႄႉၵိုတ်း ယႃႇလႅၼ်ႈပၢႆႈသေၵမ်းဝႃႈၼႆ။

ၶုၼ်သိုၵ်းလူင် သီႇႁရႃႇၸႃႇ ၽူႈၶၢၼ်ပၢၵ်ႇ SSPP  လၢတ်ႈတီႈၽူႈတွႆႇႁွၵ်ႈဝႃႈ – “ ၸုမ်းႁဝ်းၵေႃႈ ဢၼ်လႆႈပၼ်ၾၢင်ႉၵူၼ်းမိူင်းၵေႃႈ မီးဝႆႉယူႇ။ပေႃးၵႂႃႇႁဵတ်းၵၢၼ် တီႈသူၼ် ႁႆႈ ၼႃးၼႆ ႁႂ်ႈၵႂႃႇ ၸွမ်းၵၼ်ပဵၼ်မူႇပဵၼ်ၾုင်၊ ပေႃးၺႃးၵူၼ်းသိုၵ်းႁဝ်းၶႃႈႁွင်ႉၸႅတ်ႈႁွင်ႉထၢမ်ၼႆ ႁႂ်ႈၵိုတ်းပၼ် သေ တွပ်ႇပၼ်လီလီ။ ယႃႇပေလႅၼ်ႈပၢႆႈၶႃႈ။ ပေႃးလႅၼ်ႈပၢႆႈၼႆႉ ၸွမ်းၼင်ႇမူႇပိူင်ႁဝ်းၶႃႈမီးဝႆႉၼၼ်ႉ ပေႃးတၢၼ်ႇယိုဝ်းၵေႃႈ ႁဝ်းၶႃႈတေလႆႈယိုဝ်းၶႃႈဢေႃႈ။ ထႅင်ႈလွင်ႈၼိုင်ႈ တီႈမိူင်းၵိုင်ၼႆႉ မၢင် ပိုၼ်ႉ တီႈၼႆႉဢိင်ၼိူဝ်ငဝ်းလၢႆးသေ ႁဝ်းၶႃႈပိုၼ်ၽၢဝ်ႇ မႃႊသျႄႊလေႃး (ႁၢမ်ႈဢွၵ်ႇၼွၵ်ႈ ႁိူၼ်း ၶၢဝ်းယၢမ်းၵၢင်ၶမ်ႈၵၢင်ၶိုၼ်း) ။ ၵွပ်ႈၼႆလႄႈ ႁႂ်ႈဝႆႉၼၵ်းၼိူဝ်ၶေႃႈပိုၼ်ၽၢဝ်ႇသေ ႁႂ်ႈၾၢင်ႉၶၢဝ်းယၢမ်းၵႂႃႇႁဵတ်းၵၢၼ် သေၵမ်း” – ဝႃႈၼႆ။

ပိုၼ်ႉတီႈဢၼ်ပဵၼ်ၵႂႃႇၼႆႉၵေႃႈပဵၼ်ပိုၼ်ႉတီႈ မၢၵ်ႇၵႆႉတႅၵ်ႇလႄႈ SSPP ႁၢမ်ႈဝႆႉဢမ်ႇႁႂ်ႈ ၵူၼ်းမိူင်းၵႂႃႇမႃး။

ၵူၼ်းဝၢၼ်ႈဢၼ်ၵႂႃႇ လဵင်ႉၵႂၢႆးသေ ၺႃးၵူၼ်းသိုၵ်း SSPP ယိုဝ်းၼႆႉၸိုဝ်ႈႁွင်ႉ   လုင်းပေႃႇထူၺ်း ဢႃယု 50 ပီ ပဵၼ်ၵူၼ်းဝၢၼ်ႈလွႆယၢင်း။  

ၶုၼ်သိုၵ်းလူင် သီႇႁရႃႇၸႃႇ ၽူႈၶၢၼ်ပၢၵ်ႇ SSPP လၢတ်ႈတီႈၽူႈတွႆႇႁွၵ်ႈဝႃႈ – “   ပဵၼ်ပိုၼ်ႉတီႈမၢၵ်ႇၵႆႉတႅၵ်ႇလႄႈ ႁဝ်းၶႃႈၸင်ႇလႆႈဝႆႉၼၵ်းသေ ပႂ်ႉၵူတ်ႇထတ်း။ ပိူင်လူင် လုင်းပေႃႇထူၺ်းၼၼ်ႉသမ်ႉ မၼ်းပႃးၵွင်ႈ။ ၽိူဝ်ႇႁွင်ႉသမ်ႉလႅၼ်ႈလႄႈ ႁဝ်းၵေႃႈ ထၢင်ႇဝႃႈ ပဵၼ်ၵူၼ်း RCSS ၸႂ်ႉမႃးၾင်မၢၵ်ႇမႅင်းႁႃႉၼႆလႄႈ ၸင်ႇယိုဝ်းသႂ်ႇၼၼ်ႉၼႃႇ။တၢႆတီႈၼၼ် ၵမ်းလဵဝ်ယဝ်ႉ”- ဝႃႈၼႆ။

ဝၢႆးလင် ၼၼ်ႉ ယူႇတီႈ ၽူႈမီးပုၼ်ႈၽွၼ်း SSPP ၵႂႃႇႁူပ်ႉထူပ်းလုၵ်ႈမေးၵူၼ်းႁိူၼ်း မၼ်းၸၢႆးသေ ၸွႆႈထႅမ်ငိုၼ်းတွင်းၶိုၼ်းယူႇဝႃႈၼႆသေတႃႉ ၸွႆႈၵႃႈႁိုဝ်ႁဵတ်းႁိုဝ်ၼႆတႄႉ ၶုၼ်သိုၵ်းလူင် သီႇႁရႃႇၸႃႇ ဢမ်ႇလႆႈလၢတ်ႈပႃး။

 ပီ 2022 ပူၼ်ႉမႃးၼႆႉ သိုၵ်း SSPP လႄႈ RCSS ၶဵင်ႈၶႅင်ၵၢၼ်သိုၵ်းၵၼ် ပိုတ်းယိုဝ်းၵၼ်ၼႂ်း ၸႄႈဝဵင်း ၵျွၵ်ႉမႄး သီႇပေႃႉ ၼမ်ႉလၼ်ႈ မိူင်းၵိုင် လၢႆးၶႃႈ ပၢင်လူင် ႁူဝ်ပူင်း လွၵ်ႉၸွၵ်ႇ ႁၢဝ်ႈႁႅင်း။ ၵူၼ်းမိူင်းပိုၼ်ႉတီႈလႆႈပၢႆႈၽေးသိုၵ်း ၼပ်ႉမိုၼ်ႇ။ ၵမ်ႈၽွင်ႈယင်းပႆႇၸၢင်ႈ ပွၵ်ႈၶိုၼ်း ႁိူၼ်းယေးဝၢၼ်ႈသူၼ်တေႃႇထိုင်ယၢမ်းလဵဝ်။

ယၢမ်းလဵဝ်သိုၵ်း 2 ၸုမ်း ဢမ်ႇပိုတ်းယိုဝ်းၵၼ်၊ သဵင်ၵွင်ႈယဵၼ်ဝႆႉသေတႃႉ ၶဵင်ႈၶႅင်ၵၢၼ်သိုၵ်းတေႃႇၵၼ်ပဵၼ်တီႈ၊ ႁၢင်ႈၵၢင်မၢၵ်ႇတေႃႇၵၼ်ၶိူဝ်းယႂ်းလႄႈ  ၵူၼ်းမိူင်းၼႂ်းပိုၼ်ႉတီႈ ထူပ်းတၢမ်ႇသိုၵ်းသိူဝ်။ ယဵပ်ႇၺႃးမၢၵ်ႇမႅင်းၾင်လိၼ်သေ မၢတ်ႇၸဵပ်းလူႉတၢႆၵေႃႈမီး။ ဢၼ်ႁၢင်ႈႁၢႆႉလႄႈၶၢၼ်ၸႂ်ႁႅင်းတႄႉ ယွၼ်ႉသိုၵ်း 2 ၸုမ်းဢမ်ႇထုၵ်ႇၵၼ်သေ ၵူၼ်းမိူင်းပိုၼ်ႉတီႈ တူၵ်းပဵၼ်ၶိူင်ႈမိုဝ်း၊  ထုၵ်ႇၼႄး ပဵၼ်ၸႂ်ၸုမ်းၼၼ်ႉၸုမ်းၼႆႉ၊ ထုၵ်ႇတီႉၺွပ်းၶႃၸႂ် ၊ ၺႃးၸၢၵ်ႇၶီႈသူမ်ႈသေတၢႆၸွမ်းၵေႃႈ မီးမႃးဢမ်ႇၼပ်ႉဢမ်ႇဢၢၼ်ႇလႆႈယဝ်ႉ။