ၵူၼ်းမိူင်းထၢႆႊဝၼ်ႊ ၵေႃႉၼိုင်ႈ ဢွၵ်ႇၶၢဝ်းတၢင်းတွင်ႈတဵဝ်းမိူင်းထႆးသေ ၺႃးတီႉၺွပ်းႁဵတ်းပဵၼ်တူဝ်ယိူဝ်ႇဝႆႉၼႆ ႁွင်ႈၵၢၼ် ၽွင်းလူင်ၾၢႆႇၼွၵ်ႈမိူင်း မိူင်းထၢႆႊဝၼ်ႊ ပိုၼ်ၽၢဝ်ႇဝႆႉ ၼႂ်းဝၼ်းတီႈ 2/1/2025 ၼႆႉ ၼင်ႇၼႆ။

ၵူၼ်းမိူင်းထၢႆႊဝၼ်ႊ ဢၼ်ၺႃးတီႉၺွပ်း ပဵၼ်တူဝ်ယိူဝ်ႇဝႆႉၼၼ်ႉ ပဵၼ်ၵူၼ်းၼုမ်ႇမီးဢႃယု 27 ပီသေ မိူဝ်ႈဝၼ်းတီႈ 25/12/2024 ၼၼ်ႉ လႆႈတင်းၵပ်းသိုပ်ႇ တင်းပေႃႈမႄႈၵူၼ်းႁိူၼ်း လိုၼ်းသုတ်း ဝႃႈၼႆ။

ဝၢႆးၼၼ်ႉ ၵူၼ်းႁိူၼ်းမၼ်း ၺႃးလွၵ်ႇငိုတ်ႈယွၼ်းငိုၼ်း ၼပ်ႉႁူဝ်ႁဵင်တေႃႊလႃႊ။ လိူဝ်ၼၼ်ႉ ၺႃးတဵၵ်းၶၢၼ်းၸႂ်ႉႁဵတ်း ၼႂ်းၵၢၼ်ၵပ်းသိုပ်ႇ လွၵ်ႇလႅၼ်ငိုၼ်းတၢင်းဢွၼ်ႊလၢႆႊဝႆႉၼႆ ပလိၵ်ႈမိူင်းထၢႆႊဝၼ်ႊ လၢတ်ႈဝႆႉၼင်ႇၼႆ။

မိူဝ်ႈၽူႈမီးပုၼ်ႈၽွၼ်းၶဝ် ၸွပ်ႇႁႃၸွမ်းသၢႆၾူၼ်းမၼ်းၼၼ်ႉ ၼႄဝႆႉဝႃႈ မီးဝႆႉတီႈမိူင်းမၢၼ်ႈ။

ဝၢႆးၼၼ်ႉ ပေႃႈမႄႈပီႈၼွင်ႉ လႆႈတိူင်ႇလၢတ်ႈဝႆႉတီႈ လုမ်းၽွင်းတၢင် ထၢႆႊဝၼ်ႊ ဢၼ်မီးတီႈမိူင်းမၢၼ်ႈ။ ဢိင်ၼိူဝ်လွင်ႈၼႆႉသေ ၸဝ်ႈၼႃႈတီႈမိူင်းထၢႆႊဝၼ်ႊ တိုၵ်းသူၼ်းပၼ်ၾၢင်ႉၵူၼ်းမိူင်းၶဝ်ဝႆႉဝႃႈ ႁႂ်ႈၾၢင်ႉလွင်ႈၵႂႃႇမႃးတွင်ႈတဵဝ်း တီႈမိူင်းၸဵင်ႇၸၢၼ်းဝၼ်းဢွၵ်ႇဢေႊသျႃႊ၊ မိူၼ်ၼင်ႇ တီႈမိူင်းမၢၼ်ႈၼႆႉ မီးလွင်ႈတီႉၺွပ်း ႁဵတ်းပဵၼ်တူဝ်ယိူဝ်ႇသေ တဵၵ်းၶၢၼ်းၸႂ်ႉႁဵတ်းၵၢၼ်ၽိတ်းပၵ်းပိူင်ဝႆႉ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။