ဝၼ်းတီႈ 1/1/2025 ၼႆႉ သိုၵ်းမၢၼ်ႈ ပိုၼ်ၽၢဝ်ႇဢွၵ်ႇပိူင်ႁူမ်ႇလူမ်ႈသၢႆႊပႃႊ ဢမ်ႇပၼ်ၸႂ်ႉ ဢိၼ်ႊထိူဝ်ႊၼႅတ်ႊ လွတ်ႈလႅဝ်း။ ၼႂ်းပိူင်ၼၼ်ႉ တမ်းဝၢင်းမၢႆမီႈတႃႇတီႉၺွပ်း ပၼ်တၢမ်ႇၵူၼ်းၸိူဝ်းၸႂ်ႉ သၢႆႊပႃႊလႄႈ VPN ဢၼ်ဢမ်ႇထုၵ်ႇ ၼင်ႇပိူင်ၶဝ်တမ်းဝၢင်း။

သင်ဝႃႈ ပူၼ်ႉပႅၼ်ယႃႉၵဝ်းပၵ်းပိူင်ၸိူဝ်းတမ်းဝၢင်းဝႆႉ ၸိူဝ်းၼၼ်ႉၼႆၸိုင် တၵ်းၺႃး တၢမ်ႇၶွၵ်ႈတၢမ်ႇငိုၼ်း တင်းၼမ် သေဢမ်ႇၵႃး တၵ်းၺႃးယိုတ်းပႃး ၶိူင်ႈၶူဝ်းၸႂ်ႉသွႆ ဢၼ်ၵဵဝ်ႇၶွင်ႈၸွမ်းၸိူဝ်းၼၼ်ႉလူး ၵွၼ်ႇ ၼႆယဝ်ႉ ။

သင်ဢမ်ႇႁူႉ ၸွမ်းပိူင်ဢၼ်သိုၵ်းမၢၼ်ႈ တိုၵ်ႉဢွၵ်ႇဝႆႉၼႆၸိုင် ၸၢင်ႈတူၵ်းလွၵ်းၶဝ်သေ ထူပ်းၽေး။ သင်ဝႃႈ ၵႂႃႇတုမ်ႉတိူဝ်ႉမႅၼ်ႈပိူင်ၶဝ်တမ်းဝႆႉၼႆၸိုင် သိုၵ်းမၢၼ်ႈၸၢင်ႈပၼ်တူတ်ႈတၢမ်ႇ 1 လိူၼ် ထိုင် 3 လိူၼ် တၢမ်ႇငိုၼ်း 10 သႅၼ်ပျႃး ထိုင် 100 သႅၼ်ပျႃး ဢမ်ႇၼၼ် တၢမ်ႇငိုၼ်းတၢမ်ႇၶွၵ်ႈ ၸိူဝ်းၼႆႉထႅင်ႈၼႆလႄႈ လႆႈဝႃႈ မိပ်ႇငႅၼ်းၵူၼ်းမိူင်းၵူၺ်းၼႆ တင်းၼမ်ႁၼ်ထိုင်ၼင်ႇၼႆ။

ပိူင်ႁူမ်ႇလူမ်ႈသၢႆႊပႃႊၼႆႉ ဢမ်ႇၸႂ်ႈတိုၵ်ႉၶူင်ဢွၵ်ႇပၢၼ်မိၼ်းဢွင်ႇလၢႆႇ ၼႆႉၵူၺ်း မၼ်းပဵၼ်ပိူင် ဢၼ်ၶူင်ဝႆႉမိူဝ်ႈပၢၼ် လူင်ပွင်ၸိုင်ႈပႃႇတီႇၼူၵ်ႉယုင်း။ မိူဝ်ႈပၢၼ်ၼၼ်ႉတႄႉ ပိူင်လူင်မၼ်းတႃႇႁႄႉၵင်ႈလႆႈ လွင်ႈမၢပ်ႇၼႄးသၢင်းၽႅပ်ႉၵၼ်လႄႈ လွင်ႈလႃႇႁၢႆႉၸႃႉဝႃႈတေႃႇၵၼ် ၼိူဝ်ဢွၼ်ႊလၢႆႊ ၼၼ်ႉၵူၺ်း။ ၵူၺ်းၵႃႈ ဢမ်ႇၸႂ်ႈဝႃႈ တႃႇမႃးပိၵ်ႉဢိုတ်းၶေႃႈမုလ်းၶၢဝ်ႇသၢၼ်လႄႈ လွင်ႈၸႂ်ႉ VPN မိူၼ်ၼႆ။

သင်ဝႃႈ ပဵၼ်ၵူၼ်းၸႂ်ႉဢႅပ်ႊပလီႊၶေႊသျိၼ်ႊ ဢၼ်တူၺ်းငဝ်းတူင်ႉ ၸိူဝ်းၼၼ်ႉၵေႃႈ တၵ်းလႆႈ ယွၼ်းဝႂ်ၶႂၢင်ႉသေ ၸင်ႇတေပၼ်တူၺ်း။ တေႃႈၼင်ႇ ဢႅပ်ႊပလီႊၶေႊသျိၼ်ႊမႁႃႇ (မဟာ) ဢၼ် ၵူၼ်းမိူင်းမၢၼ်ႈ ၵမ်ႈၼမ် တူၺ်းၸိူင်းယူႇ ၸိူဝ်းၼၼ်ႉၵေႃႈ သိုၵ်းမၢၼ်ႈၶဝ် ႁႂ်ႈၸဝ်ႈၶွင်မၼ်း ၵဵပ်း ၶေႃႈမုလ်းလႄႈ သဵၼ်ႈသၢႆမၢႆပၼ် လွင်ႈဝႃႈ ၵူၼ်းတူၺ်းမီးၵႃႈႁိုဝ် ပဵၼ်ၵူၼ်းမိူင်းလႂ် ယူႇတီႈလႂ်သေ တူၺ်း ၸဵမ်ၸိူဝ်းၼႆႈ။ ၵဵဝ်ႇလူၺ်ႈလွင်ႈၼႆႉ ၽူႈႁဵတ်းၵၢၼ်ၾၢႆႇဢၢႆႊထီႊ ၵေႃႉ ၼိုင်ႈ လၢတ်ႈၼႄဝႆႉ ၼင်ႇၼႆ –

“သင်ဝႃႈ ၶဝ်မီးလွင်ႈထၢင်ႇထိူမ် ဢႅပ်ႊပလီႊၶေႊသျိၼ်ႊ သေဢၼ်ဢၼ်မႃးၼႆ ပေႃးဝႃႈ ၶဝ်ယွၼ်းၵူတ်ႇထတ်းတူၺ်း တၵ်းလႆႈပၼ်ထတ်းၶေႃႈမုလ်းတင်းသဵင်ႈၼႆဢေႃႈ။ မိူၼ်ၼၼ်ၼင်ႇၵဝ်ႇၶႃႈ ႁဝ်းၶႃႈ ၸႂ်ႉဢႅပ်ႊဢၼ်လႂ် ၸႂ်ႉ Operator ဢၼ်လႂ်ၵေႃႈယဝ်ႉ ပေႃးဝႃႈၶဝ်ယွၼ်းၼႆ တၵ်းလႆႈပၼ်ၶဝ် ထတ်းမူတ်း။ ယွၼ်ႉၼၼ် ဢၼ်ယၢပ်ႇၸႂ်တႄႉ ၵူၼ်းႁဵတ်းၵၢၼ်မိူင်းႁႃႉ ၵူၼ်းႁဵတ်းၵၢၼ်လုၵ်ႉၽိုၼ်ႉႁႃႉၼႆ တေယၢပ်ႇတေလႆႈၾၢင်ႉတႄႉ ၾၢင်ႉဝႃႈယဝ်ႉ။ ပွင်ႇဝႃႈတႄႉ သိုၵ်းမၢၼ်ႈ ၸၢင်ႈတီႉလႆႈငၢႆႈ တီႈတူင်ႉၼိုင်ႈလႄႈ လွင်ႈႁဵတ်းသၢင်ႈၵူၼ်းမိူင်း တေမီးတီႈမၼ်းၵႅပ်ႈမႃးလွႆးလွႆးယဝ်ႉဢေႃႈ”- ဝႃႈၼႆ။

သိုၵ်းမၢၼ်ႈတႄႉ ၼႄၶေႃႈဢၢင်ႈဝႃႈ တႃႇႁႄႉၵင်ႈ ၵူတ်ႇထတ်းတီႉၺွပ်း ၵူၼ်းၸိူဝ်းၸႂ်ႉ ဢီႊလထရေႃႊၼိတ်ႉ၊ ဢဝ်သၢႆႊပႃႊသေ ယႃႉၵဝ်းႁႂ်ႈၵၢၼ်ဢႃႇၼႃႇၽွင်းငမ်းလႄႈ လွင်ႈၵတ်းယဵၼ်ၼိမ်တဵင်ႈ ၸိုင်ႈမိူင်းလူႉၼၼ်ႉ တေပၼ်တူတ်ႈတၢမ်ႇၼၵ်းၼႃ ၼႆယဝ်ႉ။

ၼႂ်းပိူင်ၼၼ်ႉ ပႃးဝႆႉထႅင်ႈဝႃႈ ၽႂ်သေဢမ်ႇဝႃႈ သင်ၸႂ်ႉလွၵ်းပိူင်ဢွၼ်ႊလၢႆႊ သေဢၼ်ဢၼ် လွၵ်ႇလႅၼ်ၵိၼ်ငိုၼ်းသေၵေႃႉၵေႃႉၸိုင် တၵ်းၺႃးတၢမ်ႇၶွၵ်ႈ ဢေႇသုတ်း 2 ပီ ၼမ်သုတ်း 7 ပီ လိူဝ်ၼၼ်ႉ တၢမ်ႇငိုၼ်းထႅင်ႈ။

မိူၼ်ၼင်ႇ VPN ၵေႃႈ သင်ႇၸႂ်ႉလူၺ်ႈဢမ်ႇလႆႈၶႂၢင်ႉၼႆၸိုင် တၵ်းၺႃးတၢမ်ႇၶွၵ်ႈ 6 လိူၼ် ဢမ်ႇၼၼ် တၢမ်ႇငိုၼ်းတႅမ်ႇသုတ်း 10 သႅၼ်ပျႃး ထိုင် 100 သႅၼ်ပျႃး ဢမ်ႇၼၼ် တၢမ်ႇငိုၼ်းတၢမ်ႇၶွၵ်ႈၸွမ်းၵၼ် ။ သင်ဝႃႈ မီးၶိူင်ႈၸႂ်ႉသွႆ ဢၼ်ၽိတ်းမၢႆမီႈၵေႃႈ တၵ်းတေယိုတ်းဢဝ်။

သင်ဝႃႈ ဢမ်ႇလႆႈၶႂၢင်ႉသေ ပိုတ်ႇပၢင်တေႃႇလွင်းၼိူဝ်ဢွၼ်ႊလၢႆႊၸိုင် တၢမ်ႇၶွၵ်ႈတႅမ်ႇသုတ်း 6 လိူၼ်ထိုင် 1 ပီ ၊ တၢမ်ႇငိုၼ်း 50 သႅၼ်ပျႃး ထိုင် 200 သႅၼ်ပျႃး ဢမ်ႇၼၼ် တၢမ်ႇၶွၵ်ႈတၢမ်ႇငိုၼ်း ၸွမ်းၵၼ်လႄႈ ယိုတ်းပႃးၶိူင်ႈၸႂ်ႉသွႆ။

ၼႂ်းပိူင်ၼၼ်ႉ ပႃးဝႆႉထႅင်ႈဝႃႈ ၽႂ်ဢဝ်ၶေႃႈမုလ်း ဢၼ်ၵူၼ်းမိူင်းဢမ်ႇၵိုင်ႇႁူႉ ဢမ်ႇၵိုင်ႇႁၼ် ၸိူဝ်းၼၼ်ႉ ပိုၼ်ၽႄႈ သူင်ႇတေႃႇၵၼ် ၶၢႆတေႃႇၵၼ်ၼႆၸိုင် တၵ်းၺႃးတူတ်ႈတၢမ်ႇၶွၵ်ႈ တႅမ်ႇသုတ်း 1 လိူၼ်ထိုင် 6 လိူၼ် တၢမ်ႇငိုၼ်းတႅမ်ႇသုတ်း 10 သႅၼ်ပျႃး ထိုင် 100 သႅၼ်ပျႃး။

မိူဝ်ႈဢွၼ်တၢင်း ယင်းပႆႇဢွၵ်ႇပၵ်းပိူင်မၢႆမီႈ ဢၼ်ၵဵဝ်ႇၶွင်ႈသၢႆႊပႃႊၼႆႉ သမ်ႉပေႃးၶႂ်ႈဢဝ်တၢင်းၽိတ်း ၵူၼ်းမိူင်းယူႇယဝ်ႉလႄႈ ပေႃးမီးမႃးၸိူင်ႉၼႆ ယိင်ႈၶႅၼ်းတေႁၢႆႉႁႅင်းလိူဝ်ၵဝ်ႇယဝ်ႉၼႆ ၵူၼ်းႁဵတ်းၵၢၼ် ၾၢႆႇဢၢႆႊထီႊ ၵေႃႉၼိုင်ႈ လၢတ်ႈ ၼႄဝႆႉၼင်ႇၼႆ –

“ယွၼ်ႉၼၼ်လႄႈ ဢၼ်လႂ်လီသိူင်ႇ ဢၼ်လႂ်လီၸႂ်ႉ ၼႆၸိူဝ်းၼႆႉ။ ပေႃးတေၵႂႃႇတၢင်းၼွၵ်ႈၵေႃႈ ပိၵ်ႉ VPN သေ ဢၼ်လႂ်ထုၵ်ႇလီမွတ်ႇၵေႃႈ မွတ်ႇပႅတ်ႈသေၵွၼ်ႇ။ ၶႅပ်းႁၢင်ႈ ဢၼ်တေပဵၼ်ၽေးတုမ်ႉ တိူဝ်ႉတေႃႇႁဝ်းၶိုၼ်း ၸိူဝ်းၼႆႉၼႆၵေႃႈ ထုၵ်ႇလီမွတ်ႇပႅတ်ႈၵေႃႈမွတ်ႇ။ ပေႃးပဵၼ်လႆႈ ဢႅပ်ႊ Operator မိူၼ်ၼင်ႇ Ooredo MPT လႄႈ လၢႆလၢႆဢၼ်ၸိူဝ်းၼၼ်ႉ ၸၢင်ႈၺႃးၵူတ်ႇထတ်းသေ ပေႃးႁၼ်ၽိတ်း ပိူင်ၶဝ်ၼႆ ၶဝ်ၸၢင်ႈတီႉၺွပ်းလႆႈၵမ်းလဵဝ် ယွၼ်ႉဝႃႈ ပၵ်းပိူင်ဢွၵ်ႇၼႂ်းဝၼ်းတီႈ 1 လိူၼ်ၵျႅၼ်ႊၼိဝ်ႊ ရီႊၼၼ်ႉယဝ်ႉ”- ဝႃႈၼႆ။

မိူဝ်ႈပူၼ်ႉမႃး ပီ 2023 လိူၼ်ၵျူႊလၢႆႊၼၼ်ႉၵေႃႈ ယၢမ်ႈပိုၼ်ၽၢဝ်ႇဢွၵ်ႇပိူင် ၵဵဝ်ႇလူၺ်ႈလွင်ႈ ၵၢၼ်ၵႃႉၶၢႆၼိူဝ်ဢွၼ်ႊလၢႆႊ။ ၼႂ်းၼၼ်ႉ ပႃးဝႆႉဝႃႈ ၼႂ်းၶၢဝ်းတၢင်း 6 လိူၼ် တၵ်းလႆႈယွၼ်းတၢင်ႇမၢႆၾၢင်။ ၽႂ်ဢမ်ႇတၢင်ႇ တၵ်းၺႃးတူတ်ႈ ၶွၵ်ႈ 6 လိူၼ်ထိုင် 3 ပီ တၢမ်ႇငိုၼ်း ဢမ်ႇတႅမ်ႇလိူဝ် 5 သႅၼ်ပျႃး ဝႃႈၼႆဝႆႉ။ မိူဝ်ႈၼၼ်ႉၵေႃႈ ၵူၼ်းမိူင်းဢွၼ်ၵၼ် တူင်ႉတိုၼ်ႇဢွၵ်ႇသဵင်ဝႃႈ သိုၵ်းမၢၼ်ႈ ႁႃလၢႆးတၢင်းႁႄႉႁၢမ်ႈ တၢင်းၶိုၼ်ႈယႂ်ႇမၢၵ်ႈမီးၵူၼ်းမိူင်းၵူၺ်း ၼႆယူႇ။