တူဝ်တႅၼ်းသိုၵ်းမၢၼ်ႈလႄႈ ၸုမ်းဢူၺ်းလီပွတ်းႁွင်ႇ 3 ၸုမ်းႁူပ်ႉၵၼ်တီႈမိူင်းၶႄႇ ပဵၼ်ပွၵ်ႈၵမ်း 4

ဝၼ်းတီႈ 01-03/03/2024 တူဝ်တႅၼ်းသိုၵ်းမၢၼ်ႈလႄႈ တူဝ်တႅၼ်းၸုမ်းဢူၺ်းလီပွတ်းႁွင်ႇ 3 ၸုမ်း ႁူပ်ႉဢုပ်ႇၵၼ်တီႈဝဵင်းလူင် ၶုၼ်ႊမိင်ႊ ၸႄႈမိူင်းယုၼ်ႊၼၢၼ်ႊ မိူင်းၶႄႇ။ ပဵၼ်ဢၼ်ႁူပ်ႉထူပ်းၵၼ် ၵမ်းထူၼ်ႈ 3 ဝၢႆးလင် ၽႅၼ်ယၼ်ႇသိုၵ်း 1027 ။ ဢုပ်ႇၵၼ်လွင်ႈၵိုတ်းတိုၵ်းၵၼ်၊ လွင်ႈၵၢၼ်ၵႃႉၶၢႆၸွမ်းလႅၼ်လိၼ်၊ တႃႇၽဵဝ်ႈမူၺ်ႉၵၢၼ်လွၵ်ႇလႅၼ်တၢင်းဢွၼ်ႊလၢႆႊၵျႃးၽျႅၼ်ႉ၊ တႃႇႁႂ်ႈလႆႈလွင်ႈၵတ်းယဵၼ် ဝဵင်းဢၼ်မီးၽၵ်းတူလႅၼ်လိၼ် ၸဵမ်ၸိူဝ်းၼႆႉ။

ၵူၼ်းမိူင်းၶဝ်ႈဝႆႈသႃ ထၢတ်ႈတေႃႇၽြႃး တီႈဝဵင်းၵဵင်းမႂ်ႇ ၵိုၼ်းၶွၼ်ႈ  

လူင်ပွင်ၸိုင်ႈထႆး ပၢင်းထၢတ်ႈတေႃႇ ၽြႃးပဵၼ်ၸဝ်ႈ၊ ထၢတ်ႈတေႃႇ ၸဝ်ႈသႃႇရိပုတ်ႉတြႃႇလႄႈ ၸဝ်ႈမႁႃႇမွၵ်ႇၵလၢၼ်ႇ ပိၵ်ႉသၢႆႉၶႂႃ မိုဝ်းၽြႃး ပဵၼ်ၸဝ်ႈတီႈမိူင်းၵြႃးဢိၼ်ႊတီႊယႃႊ ယေႃးမႃးမိူင်းထႆး ႁႂ်ႈၵူၼ်းမိူင်း ထႆး လႆႈၶဝ်ႈႁူမ်ႈဝႆႉသႃ။ ထၢတ်ႈတေႃႈၸဝ်ႈၼႆႉ ဝၼ်းတီႈ 05 – 08/03/2024 ပၢင်းဢဝ်မႃးဝႆႉ တီႈႁေႃၶမ်း လူင် ၼႂ်းသူၼ်မွၵ်ႇရၢတ်ႉၶျၽရိုၵ်း ဝဵင်းၵဵင်းမႂ်ႇ ၸိုင်ႈထႆး။ ၵူၼ်းၼႂ်းမိူင်းထႆးၵူၺ်းဢမ်ႇၵႃး ၵူၼ်းမိူင်းတႆး ပွတ်းၸၢၼ်း – ပွတ်းဢွၵ်ႇၵေႃႈ ၶၢမ်ႈလႅၼ်လိၼ်ထႆးသေ ၶဝ်ႈႁူမ်ႈဝႆႈသႃၼမ်။ 

EAO 7 ၸုမ်း ႁူပ်ႉဢုပ်ႇၵၼ် တီႈၵဵင်းမႂ်ႇ

ဝၼ်းတီႈ 17-19/03/2024 ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၸိူဝ်းၵိုတ်းတိုၵ်းဝႆႉ 7 ၸုမ်း ႁူပ်ႉထူပ်းဢုပ်ႇဢူဝ်းၵၼ် တီႈဝဵင်းၵဵင်းမႂ်ႇ ၸိုင်ႈထႆးသေ ယူႇတီႈ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ RCSS ႁဵတ်းၽူႈ ၼင်ႈၸိုင်ႈ မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႂႃႇဝႃႈ – ၸုမ်းၵိုတ်းတိုၵ်း 7 ၸုမ်းၼႆႉ တေတႄႇပိူင်ၽွင်းငမ်းတူဝ်ၵဝ်ႇ ၵႂႃႇၼႂ်းပိုၼ်ႉတီႈၽႂ်မၼ်းယဝ်ႉ ဝႃႈ ၼႆ။

တီႈပၢင်ၵုမ်ၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်း ဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ့်ၸိုင်ႈမိူင်း NCA ၼၼ်ႉ ဢုပ်ႇဢူဝ်းတူၵ်းလူင်းၵၼ်သေ ၶွတ်ႇၽွတ်ႈ ၸုမ်းဢူၺ်းလီ 7 EAO Alliance ။ ပဵၼ်ၶွင်ႇသီႇ ဢဝ်ၶိုၼ်းၸိုင်ႈတႆး RCSS ၊ ပႃႇတီႇမိူင်းမွၼ်းမႂ်ႇ MNSP ၊ သိုၵ်းရၶႅင်ႇ ALP ၊ သိုၵ်းလႃးႁူႇ LDU ၊ သိုၵ်းယၢင်း ၽိူၵ်ႇၵမ်ႉၸွႆႈတီႇမူဝ်ႇၶရေႇသီႇ DKBA ၊ သိုၵ်းယၢင်းၽိူၵ်ႇ KNLA – PC လႄႈ သိုၵ်းပဢူဝ်း PNLO ၸိူဝ်းၼႆႉ။

သိုၵ်းဝႃႉ ပိုၼ်ၽၢဝ်ႇ ႁၢမ်ႈသိုၵ်းၸုမ်းလႂ် ၶဝ်ႈၵဵပ်းၶွၼ်ႇ ၼႂ်းဢိူင်ႇမိူင်းၵႅတ်ႈ  

လိူၼ်မၢတ်ႊၶျ် 2024 ၼႆႉ ယူႇတီႈ ၸုမ်းဢူၺ်းလီ ပွတ်းႁွင်ႇ 3 ၸုမ်း မိူၼ်ၼင်ႇ – သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းရၶႅင်ႇ AA ဢၼ်တိုၵ်းယိုဝ်းသိုၵ်းမၢၼ်ႈလႄႈ ပျီႇတူႉၸိတ်ႉတီႈ ဢိူင်ႇ မိူင်းၵႅတ်ႈ ၽွင်းၽႅၼ်ယၼ်ႇသိုၵ်း 1027 သေ ဢွင်ႇပေႉဝႆႉၼၼ်ႉ  တူၵ်းလူင်းမွပ်ႈပၼ် သိုၵ်းဝႃႉ UWSA ၶဝ်ႈၵုမ်းၵမ် ပူၵ်းပွင် ပၼ်ၵူၼ်းမိူင်း ၼႂ်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၵႂႃႇ။ ယၢမ်းလဵဝ် သိုၵ်းဝႃႉ UWSA ၶဝ်ႈၵုမ်း ၼႂ်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈဝႆႉသေ ပိုၼ်ၽၢဝ်ႇ ႁၢမ်ႈသိုၵ်းၸုမ်းလႂ် မႃးၵဵပ်းၶွၼ်ႇ တႃႇ 3 ပီ ဝႃႈၼႆ။

ဢိူင်ႇမိူင်းၵႅတ်ႈၼႆႉ မီးၾၢႆႇဢွၵ်ႇဢိူင်ႇမိူင်းယေႃ မွၵ်ႈ 20 လၵ်း။ မီးၾၢႆႇဢွၵ်ႇလႃႈသဵဝ်ႈမွၵ်ႈ 60 လၵ်း။ ဢိူင်ႇမိူင်းၵႅတ်ႈ ၼႆႉ မီး 13 ဝၢၼ်ႈ။ ဢၼ်ၺႃးၽေးသိုၵ်းၵမ်းသိုဝ်ႈၼႆႉ ပဵၼ်ဝၢၼ်ႈၵၢတ်ႇတင်း ဝၢၼ်ႈလူင် ယွၼ်ႉပဵၼ်ဝၢၼ်ႈတိတ်းၸပ်းတပ်ႉသိုၵ်းမၢၼ်ႈ။ လင်ႁိူၼ်းတင်းမူတ်းမွၵ်ႈ 150 လင်။ ႁူဝ်ၵူၼ်းမွၵ်ႈ 600 ၵေႃႉ။ ပဵၼ်လႅၼ်လိၼ် ဢၼ်တိတ်းၸပ်းၵၼ်တၢင်း သႅၼ်ဝီ – ၵုၼ်လူင်။ ဢၼ်လုၵ်ႉမိူင်းၵႅတ်ႈ လူင်းၵႂႃႇတႃႈၶူင်း – တႃႈတိုင်းတၼ်။ သင်ဝႃႈ ၶၢမ်ႈၶူင်းယဝ်ႉ ၵႂႃႇပွင်ႇထိုင်တၢင်း ၵုၼ်လူင် – ႁူဝ်ပၢင်ႇ – ဝဵင်းၼမ်ႉၽႃႈ (ၶျိၼ်ႊသူၺ်ႊႁေႃႇ) ၵမ်းသိုဝ်ႈ။  

သၽႃးလၢင်ႈမိူင်းထႆး မၵ်းမၼ်ႈပိူင်ယုၵ်းယၢင်ႇ သုၼ်ႇလႆႈ LGBT ယိင်းၸၢႆးၽဵင်ႇပဵင်း

သၽႃးလၢင်ႈ လူင်ပွင်ၸိုင်ႈမိူင်းထႆး ၸတ်းႁဵတ်းပၢင်ၵုမ် ဝၼ်းတီႈ 27/03/2024 ဢုပ်ႇၵုမ်ၵၼ် လွင်ႈၽဵင်ႇပဵင်း ၼႂ်း ၵၢၼ်ၵူပ်ႉၵူႈၵိၼ်ၶႅၵ်ႇ။  ၼႂ်းၼၼ်ႉပႃးသုၼ်ႇလႆႈ ၵူၼ်းငႅင်ႈလဵဝ်ၵၼ် ၵူပ်ႉၵူႈၵၼ်သေ လႆႈၸႂ်တူၵ်းလူင်းၵၼ် တႃႇသႂ်ႇ ၼႂ်းပိူင်ပိုင်းလၵ်းမိူင်း။ ဝၢႆးၼၼ်ႉ သူင်ႇယိုၼ်ႈထိုင် ၸဝ်ႈမုၼ်ယႂ်ႇၶုၼ်ႁေႃၶမ်းထႆး လႆႈ လူင်းလၢႆးမိုဝ်းပၼ်လီငၢမ်းၽွင်းလိူၼ်သႅပ်ႉထႅမ်ႊပိူဝ်ႊပူၼ်ႉမႃး။ ၼႂ်းလိူၼ်ၵျႅၼ်ႊၼိဝ်ႊရီႊ 2025 ၼႆႉ ၼႂ်းမိူင်းထႆး ၵူၼ်းငႅင်ႈလဵဝ်ၵၼ် တေၵူပ်ႉၵူႈသွၼ်ႉမိင်ႈၵၼ်ပဵၼ်တၢင်းၵၢၼ် 200 ၵူႈ ။

သိုၵ်းမၢၼ်ႈ ႁွင်ႉၵူၼ်းၼုမ်ႇၵႂႃႇၾိုၵ်းၵၢၼ်သိုၵ်း ၸဝ်ႉလိူဝ်ဢၼ်ပိုၼ်ၽၢဝ်ႇဝႆႉ

သိုၵ်းမၢၼ်ႈ ပိုၼ်ၽၢဝ်ႇဝႃႈ ၵူၼ်းၼုမ်ႇၾိုၵ်းၵၢၼ်သိုၵ်းၸွမ်းသိုၵ်းမၢၼ်ႈၸုပ်ႈႁႅၵ်ႈ တေပဵၼ်ၼႂ်းလိူၼ်မေႊ ဝႃႈၼႆသေတႃႉ ဝၢႆးလင်ၵဵပ်းသဵၼ်ႈၸိုဝ်ႈယဝ်ႉ ၵိုင်ႉၵၢင်ႉႁွင်ႉ ၵူၼ်းၼုမ်ႇၵႂႃႇၾိုၵ်းၵၢၼ်သိုၵ်း မိူဝ်ႈဝၼ်းတီႈ 29 /03/2024 ၼၼ်ႉလႄႈ ႁဵတ်းႁႂ်ႈၵူၼ်းမိူင်းတူၵ်းၸႂ် တိုၼ်ႇသၢၼ်ႈ။ ပၢင်ၾိုၵ်းၵၢၼ်သိုၵ်းၼႆႉ ၼိုင်ႈၸုပ်ႈၾိုၵ်းပၼ် ၼိုင်ႈလိူၼ်ၵူၺ်း ၊ ၼိုင်ႈၸုပ်ႈ မီးႁႅင်းၵူၼ်း 5,000 ၵေႃႉ။

ဢိင်ၼိူဝ် လွင်ႈလႅၵ်ႈလၢႆႈဝႆးၸိူဝ်းၼႆႉသေ ႁဵတ်းႁႂ်ႈၵူၼ်းမိူင်းၵူၼ်းၼုမ်ႇ ဢမ်ႇၶႂ်ႈႁဵတ်းသိုၵ်းမၢၼ်ႈလႄႈ ယိင်ႈၶႅၼ်း ဢွၼ်ၵၼ်ပၢႆႈဢွၵ်ႇမိူင်း တီႈၶူင်ႇႁိူဝ်းမိၼ်လႄႈ တႃႈရူတ်ႉတႃႈၵႃးသမ်ႉ ပေႃးၵိုၼ်းၶွၼ်ႈၵႂႃႇမူတ်း။

ၽူႈၼမ်း ၸုမ်းၵူၼ်းၼုမ်ႇတႆး TYO လႆႈႁပ်ႉသူး ၸဝ်ႈသုၸၼ်ႇတီႇ ၵေႃႉထူၼ်ႈ 16

ဝၼ်းတီႈ 31/03/2024 ၼၢင်းယိင်းၼွင်ႉ ႁူဝ်ပဝ်ႈ ၸုမ်းၵူၼ်းၼုမ်ႇတႆး (Tai Youth Organization – TYO) လႆႈႁပ်ႉသူးၵူၼ်းၼုမ်ႇ ၽူႈဢွၼ် ႁူဝ် ၸဝ်ႈၼၢင်းသုၸၼ်ႇတီႇ Sao Thusandi Leadership Award တွၼ်ႈ တႃႇ ပီ 2023 ။ မၼ်းၼၢင်းပဵၼ် ၽူႈလႆႈႁပ်ႉသူးၼႆႉ ၵေႃႉထူၼ်ႈ 16 ။

ၽူႈလႆႈႁပ်ႉသူးရၢင်းဝလ်း ၸဝ်ႈသုၸၼ်ႇတီႇ ၵေႃႉႁႅၵ်ႈ မိူဝ်ႈပီ 2008 ၼၼ်ႉ ပဵၼ်ၸၢႆးၽူးမိူင်း၊ ပီ 2009 ၸၢႆးသႅင် ၽၼ်း၊ 2010 ၼၢင်းမွၼ်းၵဵင်၊ 2011 မေႃယႃ ၸၢႆးပေႇတႃႉ၊ 2012 ၸဝ်ႈၶူးသီႇရိ ဝတ်ႉၾႃႉ ဝဵင်း ဢိၼ်း၊ 2013 ၸၢႆးသၢမ်ၾူၼ်သႅင်၊ 2014 မေႃယႃၼၢင်းလႃႈ၊ 2015 ၼၢင်းၼူၼ်းႁွမ်၊ 2016 ၸၢႆးသူႉ၊ 2017 ၸၢႆးသီၶိူဝ်း (သဵင်ႈ)၊ 2018 ၸၢႆး ၵွၼ်းသႅင်၊ 2019 ၸဝ်ႈ ၶူးမိင်ႇတၵ၊ 2020 ၶူးသွၼ်ၼၢင်းမူၺ်ၶိူဝ်း၊ 2021 သမ်ႉ ယူႇတီႈ ၶွမ်ႊပတီႊဢမ်ႇပိုၼ်ၽၢဝ်ႇၸိုဝ်ႈ ၽူႈလႆႈႁပ်ႉသူးလႄႈ ပဵၼ်ၽႂ်ဢမ်ႇလႆႈႁူႉ (ၵမ်ႈၼမ် လိုဝ်း ၵၼ်တႄႉ ပဵၼ်ၼၢင်းယိင်း) ၊ 2022 ၸဝ်ႈၶူး ဢေႃးၸေႇယ ထမ်ႇမႃႇၽိပႃႇလလႄႈ ပီ 2023 ၼႆႉသမ်ႉ ၼၢင်းယိင်းၼွင်ႉ။

သိုၵ်းမၢၼ်ႈ ပိုၼ်ၽၢဝ်ႇ ပေႃးဢမ်ႇမီးဝႂ်သမၢတ်ႉၵၢတ်ႉ တေဢမ်ႇပၼ်ၶၢမ်ႈလႅၼ်လိၼ်

ႁူဝ်လိူၼ်ဢေႊပရိူဝ်ႊ ပီ 2024 ၼႆႉ ႁွင်ႈၵၢၼ်ၾၢႆႇၵူတ်ႇထတ်း ၵူၼ်းၶဝ်ႈမိူင်း (လဝၵ) ဢၼ်ယူႇတႂ်ႈ သိုၵ်းမၢၼ်ႈ ၵုမ်းၵမ် ပိုၼ်ၽၢဝ်ႇဝႆႉဝႃႈ ပေႃးထိုင်မႃး ဝၼ်းတီႈ 01/05/2024 ၼႆႉ ၵူၼ်းမိူင်း ၸိူဝ်းဢမ်ႇမီး ဝႂ်သမၢတ်ႉၵၢတ်ႉ (Unique Identify Number – UIN) ၸိုင် တေဢမ်ႇပၼ်ၶႂၢင်ႉ ၶၢမ်ႈလႅၼ်လိၼ်ၶဝ်ႈ ၸိုင်ႈ မိူင်းႁိမ်းႁွမ်း မိူၼ်ၼင်ႇ – မိူင်းထႆး၊ မိူင်ၶႄႇလႄႈ မိူင်းဢိၼ်ႊတီႊယိူဝ်ႊ ၸိူဝ်းၼၼ်ႉ။ လွင်ႈၼႆႉ ပဵၼ်လွင်ႈ သိုၵ်းမၢၼ်ႈ တေယိပ်းသဵၼ်ႈမၢႆႁူဝ်ၵူၼ်း တႃႇ ၵူၼ်းၶဝ်ႈဢွၵ်ႇ မိူင်းလႆႈတႅတ်ႈတေႃးလႄႈ ၸင်ႇတဵၵ်းၸႂ်ႉ ႁဵတ်းဝႂ်သမၢတ်ႉၵၢတ်ႉ UID ပၼ်ၵူၼ်းမိူင်းၵူႈၵေႃႉလႄႈ ႁဵတ်းႁႂ်ႈၵူၼ်းမိူင်း မီးလွင်ႈၶွင်ႈၶမ်လၢႆလွင်ႈ ဝႃႈၼႆ။

သိုၵ်းမၢၼ်ႈ တႄႇပၢင်ၾိုၵ်းၵၢၼ်သိုၵ်း ၸုပ်ႈႁႅၵ်ႈ ၼႂ်းမိူင်းတႆး မီး 3 တီႈ

တႄႇဢဝ် ဝၼ်းတီႈ 8 လိူၼ်ဢေႊပရိူဝ်ႊၼႆႉၵႂႃႇ သိုၵ်းမၢၼ်ႈ တႄႇၾိုၵ်းၵၢၼ်သိုၵ်း ပၼ်ၵူၼ်းသိုၵ်းမႂ်ႇ ၸုပ်ႈႁႅၵ်ႈ ႁူင်း ႁဵၼ်းပူင်သွၼ်ၵၢၼ်သိုၵ်း ဢၼ်မီးတီႈဝဵင်းလူင်တႃႈၵုင်ႈ၊ ဝဵင်းလိူဝ်ႇ၊ တိူင်းၼမ်ႉၵဵဝ်၊ ၼေႇပျီႇတေႃႇ၊ ပႃႇၵိူဝ်၊ မၵူၺ်း၊ ၸႄႈၵႅင်း၊ မိူင်းမွၼ်း၊ မိူင်းတႆး ၸိူဝ်းၼႆႉ။

ၼႂ်းဝၼ်းတီႈ 1 ထိုင် ဝၼ်းတီႈ 7 ၼႆႉ ၵူတ်ႇထတ်းပၢႆးယူႇလီ ၸႅၵ်ႇပၼ်ၶူဝ်းၼုင်ႈတၢင်းဝႂ် ၵူၼ်းၾိုၵ်းၵၢၼ် သိုၵ်းမႂ်ႇ ဝၼ်းတီႈ 8 ပိုတ်ႇပၢင်သွၼ်သေ တႄႇၾိုၵ်းၵၢၼ်သိုၵ်းပၼ်။  

ပၢင်သွၼ်ၵၢၼ်သိုၵ်းၼႆႉ တေပဵၼ်ပိုၼ်ႉထၢၼ် ၵၢၼ်သိုၵ်း 5 တီႈ၊ ပၢင်သွၼ်ၸၼ်ႉသုင် 10 တီႈ၊ ပၢင်သွၼ် ၵႅမ်ၶုၼ် ႁၢၼ်လႄႈ ႁူဝ်သိုၵ်းလူင်တင်း ပၢင်သွၼ် ၵဵဝ်ႇလူၺ်ႈၶွမ်ႊပိဝ်ႊတႃႊလႄႈ ပၢႆးသၢႆႈ ၸိူဝ်းၼႆႉ။ ပၢင် သွၼ် ၼႂ်းၸိုင်ႈတႆးပွတ်းၸၢၼ်းသမ်ႉ ပၢင်သွၼ်ၵၢၼ်သိုၵ်း သိုၵ်းမၢၼ်ႈ မီးတီႈဝဵင်းၼမ်ႉၸၢင်၊ ပႃႉထူး လႄႈ ႁူဝ်ပူင်း 3 တီႈ။ 

ၵူၼ်းၸၢႆးမိူင်းယႆ 8 ၵေႃႉ ၺွပ်းၵၼ်ႉၸၼ် ဢွၼ်ႇယိင်း ဢႃယု 18 ပီ

ဝၼ်းတီႈ 14/04/2024 ယၢမ်းဝၢႆးဝၼ်း 2 မူင်း ဢွၼ်ႇယိင်း ဢႃယု 18 ပီ ၵူၼ်းဢိူင်ႇမိူင်းပၢတ်ႇ ၸႄႈဝဵင်းတၢင်ႉယၢၼ်း ၵႂႃႇလဵၼ်ႈၼမ်ႉ တီႈတၢတ်ႇႁၢႆးပူႉ ပွၵ်ႈမႃးၵေႃႉလဵဝ် မႃးၺႃး ၵူၼ်းၸၢႆးၽုင်ၼိုင်ႈ ႁူဝ်ၼပ်ႉ ၵူၼ်းမီး 8 ၵေႃႉ ၵိၼ်လဝ်ႈမဝ်း တီႈႁိမ်းဝၢၼ်ႈၼွင်လူမ်ႇ ၼႂ်းဢိူင်ႇႁူဝ်ယ ၸႄႈဝဵင်းမိူင်းယႆၼႆႉ ၺႃးၺွပ်း ဢဝ်မၼ်းၼၢင်းၵႂႃႇ ပေႃႉထုပ်ႉၵၼ်ႉၸၼ်လူလၢႆ တီႈၼႂ်းပႃႇထိူၼ်ႇ။ ဝၢႆးၼၼ်ႉ ၵူၼ်းၸၢႆး 8 ၵေႃႉၼႆႉ ၺႃး သိုၵ်း SSPP/ SSA တီႉၺွပ်းၵုမ်းတူဝ်ၵႂႃႇ လႆႈႁူႉၼင်ႇၼႆ။

UWSA ၸတ်းႁဵတ်းမၢႆတွင်း ဝၼ်းၶွပ်ႈၶူပ်ႇ 35 ပီတဵမ်

ဝၼ်းတီႈ 17/04/2024 ၼႆႉ တူၵ်းမႅၼ်ႈ ဝၼ်းၵေႃႇတင်ႈ တပ်ႉသိုၵ်းဝႃႉ UWSA ၶွပ်ႈၶူပ်ႇ 35 ပီတဵမ် ၸတ်း ႁဵတ်းတီႈမၢႆတွင်း ဝၼ်းၶွပ်ႈၶူပ်ႇ တီႈငဝ်ႈငုၼ်း ဝဵင်းပၢင်သၢင်း (ပၢင်ၶမ်း) ၼႂ်းၸိုင်ႈတႆးပွတ်းဢွၵ်ႇၶူင်း။ မီး ၸုမ်းဢူၺ်းလီ မႃးၶဝ်ႈႁူမ်ႈၸွမ်း။ ယူႇတီႈ NUG ၵေႃႈ လႆႈသူင်ႇလိၵ်ႈယိုၼ်ႈထိုင်ဝႃႈ တႃႇၽဵဝ်ႈမူၺ်ႉ လႆႈ ၸဝ်ႈဢႃႇၼႃႇသိုၵ်းမၢၼ်ႈၼၼ်ႉ တေယွၼ်းႁူမ်ႈမိုဝ်းၵၼ်တင်းသိုၵ်းဝႃႉၵႂႃႇ ဝႃႈၼႆ။

သိုၵ်းမၢၼ်ႈပူတ်း ၵႅမ်ၸွမ်ၸိုင်ႈ ဢူးႁိၼ်ႇၼရီႇ ပၼ်ႇထိဝ်း ပၢၼ်လူင်ပွင်ၸိုင်ႈၼူၵ်ႉယုင်း

ဝၼ်းတီႈ 23/04/2024 သိုၵ်းမၢၼ်ႈ ပိုၼ်ၽၢဝ်ႇ ပူတ်းၼႃႈတီႈတၼ်းႁဵင်း ၵႅမ်ၸွမ်ၸိုင်ႈ ဢူးႁိၼ်ႇၼရီႇ ပၼ်ႇထိဝ်း သေ ပၼ်လိုဝ်ႈၵၢၼ်ယဝ်ႉ ဝႃႈၼႆ။

ၵႅမ်ၸွမ်ၸိုင်ႈ ဢူးႁိၼ်ႇၼရီႇ ပၼ်ႇထိဝ်းၼႆႉ လႆႈႁပ်ႉပဵၼ် ၵႅမ်ၸွမ်ၸိုင်ႈ ၸဵမ်မိူဝ်ႈပၢၼ် ပႃႇတီႇၼူၵ်ႉယုင်း NLD ဢွင်ႇပေႉပၢင်လိူၵ်ႈတင်ႈ ပဵၼ်လူင်ပွင်ၸိုင်ႈသေ သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၵေႃႈ ဢမ်ႇ ပူတ်းဢမ်ႇတီႉၺွပ်းပႃးမၼ်း၊ သိုပ်ႇပၼ်တီႈယူႇ ပဵၼ်ၵႅမ်ၸွမ်ၸိုင်ႈဝႆႉ မိူၼ်ၵၼ်တင်း ဢူးမျိၼ်ႉသူၺ်ႇ။

SSPP ၸတ်းပၢင်ၵႅဝ်ႈမၢႆတွင်း တပ်ႉသိုၵ်းၸိုင်ႈတႆး SSA ၶွပ်ႈတဵမ် 60 ပီ  

ဝၼ်းတီႈ 24/04/2024 ယၢမ်းၵၢင်ၼႂ် 6:30 မူင်းထိုင် 9:30 မူင်း ပႃႇတီႇမႂ်ႇသုင်ၸိုင်ႈတႆး SSPP  ၸတ်း ပၢင် ၵႅဝ်ႈ မၢႆတွင်း ဝၼ်းၵေႃႇတင်ႈ တပ်ႉသိုၵ်းၸိုင်ႈတႆး SSA ၶွပ်ႈတဵမ် 60 ပီ တီႈငဝ်ႈငုၼ်း ဝၢၼ်ႈႁႆး။

ၼႂ်းပၢင်ၵႅဝ်ႈ ဝၼ်းတပ်ႉသိုၵ်းၸိုင်ႈတႆး SSA ၶွပ်ႈတဵမ် 60 ပီၼႆႉ မီးၽူႈယႂ်ႇၵူၼ်းလူင်၊ ၵူႈတပ်ႉၵူႈႁွင်ႈၵၢၼ်၊ ၸုမ်းၼၢင်းယိင်း၊ သၢႆသိုၵ်း၊ တပ်ႉႁူမ်ႇလူမ်ႈ၊ ပေႃႈမႄႈၵူၼ်းမိူင်း၊ မေႃသွၼ်၊ ၵူၼ်းၼုမ်ႇ၊ မေႃယႃ၊ လုၵ်ႈႁဵၼ်း၊ ၽူႈၵွၼ်းၸႄႈဝဵင်း – ၸႄႈတွၼ်ႈ ၶွင် SSPP ၸိူဝ်းၼႆႉ မႃးၶိုၼ်ႈႁွတ်ႈ တင်းမူတ်း ႁူဝ်ၵူၼ်း 4,400 ပၢႆ ။