သိုၵ်း TNLA ပိုၼ်ၽၢဝ်ႇ ယိုတ်းလႆႈ မိူင်းငေႃႉ

ဝၼ်းတီႈ 29-31/12/2023 သိုၵ်းတဢၢင်း TNLA တင်း တပ်ႉသိုၵ်းမၢၼ်ႈ ပဵၼ်ပၢင်တိုၵ်းၵၼ် ၼႂ်းၵိင်ႇၽႄၸႄႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁၢဝ်ႈႁႅင်း တုမ်ႉတိူဝ်ႉၵူၼ်းမိူင်း လႆႈပၢႆႈၽေးသိုၵ်း တင်းၼမ်လၢႆ။ TNLA ပိုၼ်ၽၢဝ်ႇဝႃႈ – ဝၼ်းတီႈ 01/01/2024 ၼႆႉ ယိုတ်းလႆႈ တပ်ႉမၢၼ်ႈတပ်ႉၶလယ 253 လႄႈ 237 ဢၼ်ယူႇတႂ်ႈတပ်ႉမ 101 တီႈၼႂ်းမိူင်းငေႃႉ။ လိူဝ်ၼၼ်ႉ ၵုမ်းလႆႈပႃး လုမ်းပလိၵ်ႈမၢၼ်ႈတင်း လုမ်းႁွင်ႈၵၢၼ်လူင်ပွင်ၸိုင်ႈ ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ် တင်းမူတ်း ၼႂ်းမိူင်းငေႃႉယဝ်ႉ ဝႃႈၼႆ။

သိုၵ်းၵဝ်ႈၵၢင်ႉ ယႃႉၵွင်းမူး ဢၼ်သိုၵ်းမၢၼ်ႈ သၢင်ႈဝႆႉတီႈလၢဝ်ႇၵၢႆး

ဝၼ်းတီႈ 08/01/2024 ႁၢင်ႈ VDO လွင်ႈသိုၵ်းၵဝ်ႈၵၢင်ႉ ထုပ်ႉယႃႉၵွင်းမူးလူင် ဢၼ်သိုၵ်းမၢၼ်ႈ သၢင်ႈဝႆႉတီႈပွႆႉ (ပွိုင့်) 2202 တီႈဝဵင်းလၢဝ်ႇၵၢႆး ၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းၵဝ်ႈၵၢင်ႉ MNDAA ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၽႄႈလၢမ်းမႃးတၢင်း Social Media ။ သိုၵ်းၵဝ်ႈၵၢင်ႉ လၢတ်ႈဝႃႈတေ ပၼ်တူတ်ႈတၢမ်ႇ တၢင်းၽိတ်းၽူႈပူၼ်ႉပႅၼ်ၼၼ်ႉ ဝႃႈၼႆ။

NCA 7 ၸုမ်းတင်း သိုၵ်းမၢၼ်ႈ ႁူပ်ႉၵၼ် တီႈၼေႇပျီႇတေႃႇ

ဝၼ်းတီႈ 09/01/2024 ယၢမ်းၵၢင်ၼႂ် ၸုမ်းငမ်းယဵၼ် ၶွင်ႇသီႇသိုၵ်မၢၼ်ႈ NSPNC ဢၼ်ၸွမ်သိုၵ်း ယႃႇ ပျေႉ ဢွၼ်ႁူဝ်ၼၼ်ႉ ႁူပ်ႉထူပ်းဢုပ်ႇဢူဝ်းၵၼ်တင်း ၸုမ်းလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA 7 ၸုမ်း ဢၼ်ပဵၼ်ၶွင်ႇသီႇဢဝ်ၶိုၼ်းၸိုင်ႈတႆး RCSS ၊ သိုၵ်းပဢူဝ်း PNLO ၊ သိုၵ်းလႃးႁူႇ LDU ၊ သိုၵ်းရၶႅင်ႇ ALP ၊ သိုၵ်းယၢင်းၽိူၵ်ႇ KNU/ KNLA-PC ၊ သိုၵ်းယၢင်းၽိူၵ်ႇၵမ်ႉၸွႆႈ တီႇမူဝ်ႇၶရေႇသီႇ DKBA လႄႈ ပႃႇတီႇမိူင်းမွၼ်းမႂ်ႇ NMSP ၸိူဝ်းၼႆႉ တီႈၼေႇပျီႇတေႃႇ။

ႁေႃလူင်ၵဵင်းတုင် လင်မႂ်ႇ ၵေႃႇသၢင်ႈယဝ်ႉတူဝ်ႈလီငၢမ်း

ႁေႃလူင်ၵဵင်းတုင် လင်မႂ်ႇ ဢၼ်ယူႇတီႈ ၸွမ်ၸိၵ်းသိုၵ်းမၢၼ်ႈ ယိုတ်းမိူင်း မိၼ်းဢွင်ႇလၢႆႇ ပဵၼ်ၸဝ်ႈတႃႇ ၼ ဢွၼ်ႁူဝ် ၵေႃႇသၢင်ႈမႃးၼၼ်ႉ ယၢမ်းလဵဝ် ၵေႃႇသၢင်ႈယဝ်ႉတူဝ်ႈလီငၢမ်း။

ႁေႃလူင်ၵဵင်းတုင် လင်မႂ်ႇၼႆႉ တႄႇၵေႃႇသၢင်ႈမႃး မိူဝ်ႈလိူၼ်ၵျုၼ်ႊ 2022 ၼၼ်ႉသေ ႁၢၼ်ႉတေႃႇထိုင် လိူၼ်ၵျႅၼ်ႊ ၼိဝ်ႊရီႊ 2024 ၶၢဝ်းတၢင်း 1 ပီပၢႆ 6 လိူၼ် လႆႈၵေႃႇသၢင်ႈယဝ်ႉတူဝ်ႈလီငၢမ်းယဝ်ႉ ဢွင်ႈတီႈ ၵေႃႇသၢင်ႈၼႆႉ ပဵၼ်တီႈဝၢင်းသၵဵတ်ႉ (ၵဝ်ႇ) ပွၵ်ႉ 5 ႁိမ်းၾင်ႇၼွင်တုင် ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။   

သိုၵ်းမၢၼ်ႈ ပိုၼ်ၽၢဝ်ႇမၵ်းမၼ်ႈ မၢႆမီႈၵဵပ်းသိုၵ်းၵူၼ်းမိူင်း သိုၵ်းတႆး 2 ၸုမ်းၵေႃႈ ပိုၼ်ၽၢဝ်ႇႁပ်ႉၵူၼ်း ႁၢပ်ႇၵၢၼ်

ဝၼ်းတီႈ 10/2/2024 သိုၵ်းမၢၼ်ႈ ယိုတ်းမိူင်း ဢွၵ်ႇမၢႆမီႈ ပိုၼ်ၽၢဝ်ႇဝႃႈ ၵူၼ်းမိူင်း ၸိူဝ်းဢႃယုတဵမ် 18 ပီ ၵူႈၵေႃႉ တၵ်းတေလႆႈႁၢပ်ႇၵၢၼ်သိုၵ်း။ သင်ဝႃႈ ဢမ်ႇႁဵတ်းၸွမ်းၶေႃႈၸီႉသင်ႇ ၶၢၼ်းႁွင်ႉၸိုင် တေၺႃး တၢမ်ႇၶွၵ်ႈ 5 ပီ ဝႃႈၼႆ။

မၢႆမီႈၼႆႉ ၸွမ်ၸိၵ်းသိုၵ်းမၢၼ်ႈ တၢၼ်းသူၺ်ႇ လူင်းလၢႆးမိုဝ်းပိုၼ်ၽၢဝ်ႇဝႆႉ ၸဵမ်မိူဝ်ႈပီ 2010 ပုၼ်ႉသေ ၸွမ်ၸိၵ်း သိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ၸင်ႇမႃးပိုၼ်ၽၢဝ်ႇမၵ်းမၼ်ႈပဵၼ်တၢင်းၵၢၼ်ဝႃႈ တႄႇ ၸႂ်ႉတိုဝ်း ဝၼ်းတီႈ 10 လိူၼ်ၾႅပ်ႊပိဝ်ႊရီႊ 2024 ၼႆႉၵႂႃႇ ဝႃႈၼႆ။

ထိုင်မႃး ဝၼ်းတီႈ 15/02/2024 ယူႇတီႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/ SSA ပိုၼ် ၽၢဝ်ႇ ပိုတ်ႇႁပ်ႉၵူၼ်းသိုၵ်းမႂ်ႇ ၼင်ႇႁိုဝ် တပ်ႉသိုၵ်းၸိုင်ႈတႆး ပေႃးတေမီးႁႅင်းၵႅတ်ႇၶႄ ႁူမ်ႇလူမ်ႈပၼ်လႆႈ ၵူၼ်းမိူင်း – ႁွင်ႈၵၢၼ် ၾၢႆႇပိုၼ်ၽၢဝ်ႇ SSPP ဢွၵ်ႇဝႆႉၼင်ႇၼႆ။

ဝၼ်းတီႈ 19/02/2024 သမ်ႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/ SSA) ဢွၵ်ႇပိူင် ႁၢပ်ႇထၢမ်း ၵၢၼ်သိုၵ်းလႄႈ ပိူင်တီႈလိၼ်။ တႄႇဢဝ် ဢႃယု 18 ပီ ထိုင် 45 ပီ မႃးႁၢပ်ႇၵၢၼ်သိုၵ်းလႆႈ တေသွၼ်ၵၢၼ်ပၼ် 1 ပီ ႁၢပ်ႇၵၢၼ် 5 ပီ ။ ၵူၼ်းမိူင်း ၸိူဝ်းဢၼ်ၵႂႃႇႁဵတ်းႁႃၵိၼ် ၼႂ်းမိူင်းထႆး၊ မိူင်းၶႄႇလႄႈ မိူင်းလၢဝ်း ၼၼ်ႉၵေႃႈ ႁႂ်ႈလႆႈႁူႉတူဝ် ႁူႉပုၼ်ႈၽွၼ်းသေ မႃးပၼ်သဵၼ်ႈၸိုဝ်ႈသၢႆမၢႆ တႃႇႁၢပ်ႇထၢမ်းၵၢၼ် ပုၼ်ႈၽွၼ်းၵႂႃႇ ႁင်းၽႂ်ႁင်းမၼ်း ဝႃႈၼႆ။