ၵႃႈၶၢတ်ႈႁိူၼ်းၶၢတ်ႈႁွင်ႈ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ပုင်ႈၶိုၼ်ႈလၢႆလၢႆပုၼ်ႈ ၵူၼ်းပၢႆႈၽေးသိုၵ်း ဢိၵ်ႇပႃး ၵူၼ်းမိူင်းတၢင်ႇတီႈသီႇလႅၼ်ႇ ၸိူဝ်းမႃးၶၢတ်ႈယူႇသဝ်း ယၢပ်ႇၽိုတ်ႇတႃႇတေၶၢတ်ႇယူႇၶၢဝ်းႁိုင်။

မိူဝ်ႈပီပၢႆၼၼ်ႉ ၵႃႈၶၢတ်ႈႁိူၼ်း ဢၼ်လႆႈပၼ် 2-3 သႅၼ်ၼၼ်ႉ ထိုင်မႃးၼႂ်းႁၢင်ပီ 2024 ၼႆႉ ပုင်ႈၶိုၼ်ႈမႃး ထိုင်မွၵ်ႈ 6 သႅၼ် ၸွမ်းၼင်ႇ ႁိူၼ်းလဵၵ်ႉယႂ်ႇ ႁွင်ႈၶၢတ်ႈလဵၵ်ႉယႂ်ႇသေ ၵႃႈၶၢတ်ႈတႄႉ ပိူင်ႈၵၼ် ဝႃႈၼႆ။

မငႄႇ ၽူႈႁဵတ်းၵၢၼ် ၾၢႆႇၸွႆႈႁႃႁွင်ႈၶၢတ်ႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈၵူၼ်းပၢႆႈၽေးသိုၵ်းလွႆၶေႃ တၢင်းမိူင်းယၢင်းလႅင် ပၢႆႈမႃးသေ ႁႃၶၢတ်ႈႁိူၼ်းယူႇသဝ်းၼၼ်ႉ ၵႃႈၶၢတ်ႈႁိူၼ်း ပႆႇၶိုၼ်ႈလႆႈပၼ် 250,000 ပျႃး။ ဝၢႆးၵူၼ်းပၢႆႈၽေးသိုၵ်း တၢင်းဝဵင်းလႃႈသဵဝ်ႈ ပၢႆႈမႃးႁႃၶၢတ်ႈႁိူၼ်းၼႆႉ ၸဝ်ႈႁိူၼ်းၶဝ် ၸင်ႇၶိုၼ်ႈၵႃႈၶၢတ်ႈဢေႃႈ။ ၵွပ်ႈၼႆလႄႈ သင်ႁိူၼ်း ၼၼ်ႉၶိုၼ်ႈ 10 သႅၼ်ၼႆ ႁိူၼ်းၼႆႉၵေႃႈ ၶိုၼ်ႈၸွမ်း ၸိူင်ႉၼၼ်ဢေႃႈ”- ဝႃႈၼႆ။

သင်ပဵၼ် ႁိူၼ်းၸၼ်ႉလဵဝ်ၼႆ တီႈဢႄႇသုတ်းလႆႈပၼ် 6 သႅၼ်၊ သင်ပဵၼ်ႁိူၼ်းသွင်ၸၼ်ႉ လႆႈပၼ်ဢမ်ႇယွမ်း 8 သႅၼ်၊ သင်ပဵၼ်ႁွင်ႈၶၢတ်ႈၼႆၸိုင် ၼိုင်ႈႁွင်ႈ တီႈဢႄႇသုတ်းလႆႈပၼ် 150,000 ပျႃး၊ ယူႇတီႈ ႁွင်ႈလဵၵ်ႉႁွင်ႈယႂ်ႇသေ ၵႃႈၶၢတ်ႈႁွင်ႈၵေႃႈ ပိူင်ႈၵၼ်ဝႆႉ။

ယၢမ်းလဵဝ် ယွၼ်ႉၵၢၼ်မိူင်းဢမ်ႇၼိမ်သဝ်းသေ ၵၢၼ်ႁႃၵိၼ်လဵင်ႉတွင်ႉဢမ်ႇပဵၼ်ၵၢၼ် ၵူၼ်းပၢႆႈၽေးသိုၵ်း ယၢပ်ႇၽိုတ်ႇလိူဝ်ႁႅင်း။

ဢိင်ၼိူဝ် လွင်ႈၼႆႉသေ ယူႇတီႈ ၵူၼ်းပၢႆႈၽေးသိုၵ်းၶဝ် ၶႂ်ႈႁႂ်ႈၸဝ်ႈၶွင်ႁိူၼ်း တူၺ်းထိုင်ပၼ် တၢင်းယၢပ်ႇၽိုတ်ႇၵူၼ်းပၢႆႈၽေးသိုၵ်းၽွင်ႈ ဢၼ်လႆႈပွႆႇၽႃႈႁိူၼ်းယေး တီႈယူႇၵၼ်သေ ပၢႆႈမႃးယၢပ်ႇယဵၼ်းၶၢၼ်ၸႂ်ၼၼ်ႉ ဝႃႈၼႆ။

ၵူၼ်းပၢႆႈၽေးသိုၵ်း တီႈဝဵင်းၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ – “ႁဝ်းၶႃႈ ပၢႆႈမႃးတီႈတူၼ်ႈတီးၼႆႉ မီး 3 ပီ ယဝ်ႉ။ ပွၵ်ႈၼႆႉ ၵႃႈၶၢတ်ႈႁိူၼ်းပုင်ႈၶိုၼ်ႈသုင်။ ငိုၼ်းၶဝ်ႈလႄႈ ငိုၼ်းဢွၵ်ႇ ဢမ်ႇငၢမ်ႇၵၼ်။ သင်ဝႃႈ ၵႃႈၶၢတ်ႈႁိူၼ်း တိုၵ်ႉသိုပ်ႇၶိုၼ်ႈထႅင်ႈယူႇၸိုင် ႁဝ်းၶႃႈ ဢမ်ႇၸၢင်ႈၶၢတ်ႈႁိူၼ်းယူႇယဝ်ႉ။ ငိုၼ်းဢၼ်ႁႃမႃးၼႆႉ တေႃႉတႄႉပေႃးၵိၼ်ၵူၺ်း။ ငိုၼ်းၶဝ်ႈႁဝ်းသမ်ႉ ဢမ်ႇတိူဝ်းၶိုၼ်ႈမႃး ၵႃႈၶၢတ်ႈႁိူၼ်းသမ်ႉတိူဝ်းၶိုၼ်ႈ ႁဵတ်းၼႆဢေႃႈ”- ဝႃႈၼႆ။

လိူဝ်ၼၼ်ႉ ၵႃႈၶၼ် ၶူဝ်းၶွင်ၵိၼ်ယႅမ်ႉ ၶိူင်ႈၸႂ်ႉတိုဝ်းၸိူဝ်းၼႆႉၵေႃႈ ပုင်ႈၶိုၼ်ႈမႃးႁႅင်း။