ပၢင်လိူၵ်ႈတင်ႈ ပီ 2025 ၼႆႉ ပေႃးပဵၼ်တႄႉၵေႃႈ တေႁဵတ်းတႃႇ 161 ၶဵတ်ႇသဵင်ၵူၺ်းၵေႃႈ 2025 ၼႆႉ လႅပ်ႈတေပဵၼ်ၶၢဝ်းလိူၵ်ႈတင်ႈၵႂႃႇတင်းပီယဝ်ႉ။ ဢိင်ၼိူဝ် ငဝ်းလၢႆးလိူင်ႈႁူမ်ႇလူမ်ႈသေ တေႁဵတ်းၵႂႃႇၵမ်းတွၼ်ႈတွၼ်ႈ တေႃႇပေႃးတဵမ် 161 ၶဵတ်ႇသဵင်ၼၼ်ႉယဝ်ႉ။

ပီ 2025 ၼႆႉ ပေႃးဢဝ် Calendar ၵၢၼ်မိူင်းတႅၼ်းၽွင်းဝႃႈတႄႉ မႅၼ်ႈယၢမ်းလီလႆႈႁဵတ်းပၢင်လိူၵ်ႈတင်ႈတႄႉယူႇ။ ၵူၺ်းၵႃႈ ၾိင်ႈၾႃႉၵၢၼ်မိူင်းၼႆႉ ဢမ်ႇၸႂ်ႈပိူင်ၽဵၼ်ႈလူး၊ ၶႂ်ႈႁဵတ်းတၢၼ်ႇလႂ်ၼိုင်ႈၵေႃႈ ၸွင်ႇသမ်ႉ တေပဵၼ်တူဝ်တႄႉယူႇႁိုဝ်ၼႆ ဢမ်ႇလပ်ႉလွင်းလႆႈ။ ၸင်ႇၼၼ် ပႃႇတီႇသၢင်ႇသီႈ (USDP) လၢတ်ႈဝႃႈ တေသူင်ႇၵူၼ်းမိုၼ်ႇၼိုင်ႈ ယိပ်းၵွင်ႈၵၢင်ႇသေ ပႂ်ႉၵႅတ်ႇၶႄ၊ တႃႇသၢမ်ႁဵင် တေယိပ်းၵွင်ႈ၊ ထႅင်ႈၸဵတ်းႁဵင်သမ်ႉ တေပႃးၶွၼ်ႉပႃးၶၢင်ယဝ်ႉ ယူႇယၢၼ်ၵႆႁႃႈပၢၵ်ႇဝၢႆႈသေ ဢဝ်လိူင်ႈႁူမ်ႇလူမ်ႈၼႆ။ ပေႃးႁဵတ်းၼင်ႇၼၼ် ၵၢၼ်လိူၵ်ႈတင်ႈၼႆႉ ၸွင်ႇသမ်ႉတေႁဵတ်းႁႂ်ႈၵူၼ်းမိူင်း ထၢင်ႇႁၢင်ႈလူမ်ၸႂ်ပၼ် သဵင်လႆႈယဝ်ႉႁိုဝ်ၼႆ မီးမႃးၶေႃႈထၢမ်ယူႇယဝ်ႉ။

ပၢင်လိူၵ်ႈတင်ႈ 2025 ၼႆႉ ယွၼ်ႉမိူင်းၶႄႇ ယိပ်းယႅဝ်ၵႅဝ်ပၢင်သေ တေၸၢင်ႈႁဵတ်းပဵၼ်ယူႇဝႃႈၼႆၵွၼ်ႇလႃႈ၊ တၢမ်တူဝ် SAC ၸုမ်းသိုၵ်းမၢၼ်ႈၼႆႉ ဢမ်ႇမီးတၢင်းလိူၵ်ႈလႄႈ ၵႃႈလႆႈယွမ်းႁပ်ႉၵူၺ်း။ ဢမ်ႇၸႂ်ႈဝႃႈ မၼ်းႁၢင်ႈႁႅၼ်းတူဝ်ႈတၼ်းဝႆႉ ငဝ်းလၢႆးၾၢႆႇမၼ်းၼႆႉ ဢမ်ႇၸႂ်ႈယူႇၼိူဝ်လၢင်းတႅင်းၸၢင်ႉ။

ဝၢႆးလင် 25/11/2024 SAC လႆႈၵိုတ်းယင်ႉလွင်ႈၸႂ်ႉႁိူဝ်းမိၼ်ပွႆႇမၢၵ်ႇသေ ၶိုင်ဢုပ်ႇၸွမ်း EROs ပွတ်းႁွင်ႇမႃး ၊ လိူၼ်တီႊသႅမ်ႊပိူဝ်ႊ ဝၼ်းတီႈ 1,3, 5, 9,15 ဢုပ်ႇၸွမ်း AA, UWSA, TNLA, KIA လႄႈ MNDAA တီႈၶုၼ်ႊမိင်ႊ လူၺ်ႈမိူင်းၶႄႇ ၵႅဝ်ပၢင်။ ယွၼ်ႉပိူဝ်ႈ မိူင်းၶႄႇ ႁဵတ်းတႅပ်းႁႃႈတႅပ်း ၸဵမ်တၢင်ႇ လၢႆးလႄႈ EROs ၶဝ် ဢွၼ်ႁပ်ႉဢုပ်ႇၸွမ်း SAC ယူႇသေတႃႉ လႅပ်ႈပႆႇလႆႈၶေႃႈတူၵ်းလူင်းၵၼ်တႄႉ တႄႉဝႃႈဝႃႈ၊ KIA လႄႈ AA တိုၵ်ႉသိုပ်ႇပိုတ်းတိုၵ်းယူႇ၊ (ရမခ) ငဝ်ႈငုၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ၊ (နပခ) ငဝ်ႈငုၼ်းတိူင်းသိုၵ်းပွတ်းဝၼ်းတူၵ်း ၵူၼ်ႇပင်းယူႇယဝ်ႉၵေႃႈ SAC ၼႆႉ လႅပ်ႈတေတိုဝ်ႁူဝ် လေႃႇယူႇ။

လူင်ပွင်ၸိုင်ႈၶႄႇၵေႃႈ ယၼ်ၼိူဝ်ၽွၼ်းပၢင်ႈမၢၵ်ႈမီးလႄႈ တၢင်းလူဝ်ႇၵၢၼ်မိူင်းမၼ်းသေ တေသိုပ်ႇ ၵႅဝ်ပၢင်ၵႂႃႇ ၵႃႈဢမ်ႇပဵၼ်ဢမ်ႇၸူးယဝ်ႉၼႆ လၢမ်းႁၼ်လႆႈယူႇ။ တႃႇတေပၼ်ၶိုၼ်း လႃႈသဵဝ်ႈ၊ သႅၼ်ဝီ၊ သီႇပေႃႉ၊ ၵျွၵ်ႉမႄးလႄႈ ထွႆဢွၵ်ႇ ၼွင်ၶဵဝ်ၼၼ်ႉတႄႉ တေပႆႇၵိုင်ႉၵၢင်ႉၸၢင်ႈဢုပ်ႇၵၼ်။ ပိူင်ယႂ်ႇသုတ်း AA လႄႈ KIA ယႃႇႁႂ်ႈလႆႈသိုပ်ႇတိုၵ်းၶႂၢၵ်ႈထႅင်ႈ ၼႃႈတီႈမႂ်ႇမႂ်ႇသေ ၽွင်းႁဵတ်းပၢင်လိူၵ်ႈတင်ႈယူႇ ၸိူဝ်း ၼႃႈလိၼ်ဢမ်ႇၶဝ်ႈပႃးလႆႈၼၼ်ႉ ယႃႇႁႂ်ႈသဵင်ၵွင်ႈတႅၵ်ႇထႅင်ႈ ၵူၺ်းၵေႃႈမီးမီးယဝ်ႉ။

မိူၼ်ၸိူင်ႉ မိူင်းၶျၢင်းလႄႈ ယၢင်းလႅင် ၸိူဝ်းၼၼ်ႉတႄႉ ယွၼ်ႉဢမ်ႇၵဵဝ်ႇၸွမ်းၽွၼ်းပၢင်ႈမၢၵ်ႈမီးၶွင်ၶႄႇ ၵမ်းသိုဝ်ႈလႄႈ ဢမ်ႇပႆႇၼပ်ႉပႃး ၼႂ်းၶူင်းၵၢၼ်လိူၵ်ႈတင်ႈ တွၼ်ႈထီႉၼိုင်ႈၵေႃႈ တေပႆႇတုမ်ႉတိူဝ်ႉ တၢင်းၾၢႆႇၶွင် SAC ၊ မိူင်းယၢင်းလႄႈ မိူင်းမွၼ်းၵေႃႈ တေပႃးၼႂ်းသဵၼ်ႈမၢႆ ဝဵၼ်ႉလႆႈဝႆႉ ၵူၺ်းၵွၼ်ႇ။ ၸႄႈၵႅင်း၊ မၢၼ်းတလေး၊ မၵူၺ်း ၸိူဝ်းပႃးၼႂ်းသဵၼ်ႈၸိုဝ်ႈ ဢၺႃႇၿမႃႇပျီႇၼႄႇလႄႈ တၼၢဝ်းသီ ဢၼ်မီးၵၢၼ်လုၵ်ႉၽိုၼ်ႉယူႇၼၼ်ႉၵေႃႈ ယူႇတီႈ SAC တေဢမ်ႇၸၢင်ႈဝႆႉၼမ်ႉၼၵ်း ၼပ်ႉသွၼ်ႇပႃး။ လမ်ႇလွင်ႈသုတ်းတႃႇမၼ်းတႄႉ ၼေႇပျီႇတေႃႇ၊ တိူင်းဢေႇယႃႇဝတီႇ၊ တႃႈၵုင်ႈ၊ ပႃႇၵိူဝ်လႄႈ ဝဵင်းလိူဝ်ႇ၊ မိူင်းတႆးပွတ်းၸၢၼ်းလႄႈ ပွတ်းဢွၵ်ႇ ၸိူဝ်းၼႆႉၵူၺ်း။

မၢႆထိုင်ဝႃႈ ၶဵတ်ႇလိူၵ်ႈတင်ႈ ပၢၵ်ႇႁူၵ်းသိပ်းပၢႆၼႆႉ ႁဵတ်းႁႃၼႂ်းၼႃႈလိၼ် ၸိူဝ်းဝႃႈမႃးၼႆႉ လႆႈယူႇတႃႇ မၼ်း ငၢႆႈငၢႆႈလူမ်လူမ်ၼၼ်ႉယဝ်ႉ။ ပေႃးတူၺ်းမိူင်းၶႄႇ ဢၼ်ၵႅဝ်ပၢင်ယူႇၼႆ မၼ်းၵေႃႈ ဢမ်ႇလႆႈၸႂ် ၼိူဝ်မိၼ်းဢွင်ႇလၢႆႇ၊ ၵွပ်ႈပိူဝ်ႈ ၼမ်ႉၵတ်ႉႁႅင်းပွင်မၼ်းၸၢႆးဢမ်ႇသုင်လႄႈ ယိုတ်းမိူင်းမႃး 4 ပီ ယင်းပႆႇ ၵုမ်းႁႂ်ႈၼိမ်တဵင်ႈလႆႈ။

ၸၢမ်းႁႂ်ႈၸိုင်ႈမိူင်းတႅၵ်ႇ လႅဝ်ၵႂႃႇတႄႉ ဢမ်ႇႁၼ်ၸုမ်းၸၢဝ်းလႂ် တေႁပ်ႉႁွင်းပၼ်လႆႈ မၢၵ်ႈမီးတိုၼ်း လၢင်းၶွင်ၶႄႇ ဢၼ်ၾင်ဝႆႉလႄႈ ဢၼ်ယၼ်မိူင်းမၢၼ်ႈသေ တေၵၢႆႇၸူးတူဝ်ႈလူၵ်ႈၼၼ်ႉသႄႈ။ ယဝ်ႉၵေႃႈ ပေႃးဝႃႈမိၼ်းဢွင်ႇလၢႆႇ ၶိုၼ်ႈပဵၼ်ၸွမ်ၸိုင်ႈၼႆ တၵ်းထွမ်ႇၵႂၢမ်းမိူင်းၶႄႇ၊ ၸုမ်းၸၢဝ်းတီႇမူဝ်ႇၶရႅတ်ႉ ၸိူဝ်းမၼ်းႁၼ်ဝႃႈ ၸမ်ၸႂ်ၵၼ်တင်းမိူင်းဝၼ်းတူၵ်းၼၼ်ႉၵေႃႈ တေဢမ်ႇၸၢင်ႈယွၵ်ႉယႅၵ်ႉ ၸွမ်း ႁႂ်ႈပေႃးယွၼ်ႈထိုင်ၼႂ်းမိူင်းၶႄႇလႆႈ။ တႃႇ ERO ၸိူဝ်းယူႇတိတ်းၸပ်းမိူင်းမၼ်းတႄႉ တေပွႆႇႁႂ်ႈ ၵုမ်းၵွၼ်းၼႃႈတီႈၽႂ်မၼ်းသေ ဢမ်ႇၶႂ်ႈၶဝ်ႈပႃးၵေႃႈ ယႃႇႁႂ်ႈလႆႈယႃႉၵဝ်းပၢင်လိူၵ်ႈတင်ႈၼၼ်ႉ မိူင်းၶႄႇၼႆႉ ၵႃႈၼင်ႇမၼ်းပွင်ပဵၼ်လႆႈ လႅပ်ႈတေၶိုင်ယူႇယႂ်းယႂ်းယဝ်ႉ။

ၼွၵ်ႈလိူဝ်ၼႆႉ ယင်းမီးထႅင်ႈ ရတ်ႉသျႃး၊ ဢိၼ်ႊတီႊယိူဝ်ႊလႄႈ ၸိုင်ႈမိူင်းလုၵ်ႈၸုမ်း ASEAN ၵမ်ႈၽွင်ႈ လွမ်လွမ်ပၼ်ႁႅင်းၸွမ်း လၢႆးၵၢၼ်လိူၵ်ႈတင်ႈယူႇ။ ၼႂ်းၼႆႉ မိူင်းၶႄႇတေပဵၼ်ၵေႃႉတႅဝ်ႇမၢၵ်ႇ မၼ်းၼႆၵေႃႈ ဝႃႈလႆႈယဝ်ႉ။

တေႃႈၼင်ႇ ပၢင်ၵုမ်ၼွၵ်ႈတၢင်းၵၢၼ် ၶွင်ၽွင်းတၢင်ၶဝ် ဢုပ်ႇၸွမ်းလိူင်ႈမိူင်းမၢၼ်ႈ ဢၼ်ႁဵတ်းယူႇတီႈ မိူင်းထႆး ၼႂ်းမိူဝ်ႈဝၼ်းတီႈ 19 -20/12/24 ၼႆႉၵေႃႈ ၵႃႈဢမ်ႇမွၵ်ႇႁွင်ႉပႃး SAC ၶႄႇဢမ်ႇၸူးလႄႈ ယင်း လႆႈႁွင်ႉပႃးယူႇၼၼ်ႉယိုင်။

ငဝ်းလၢႆးၸိူဝ်းၼႆႉ ပဵၼ်လွင်ႈယၢပ်ႇၽိုတ်ႇ တႃႇၸိူဝ်းသၢၼ်ၶတ်းတေႃႇ ၵၢၼ်လိူၵ်ႈတင်ႈ ၸုမ်းသိုၵ်းမၢၼ်ႈဝႆႉယဝ်ႉ။ တီႈဝႃႈသၢၼ်ၶတ်းၼၼ်ႉ တေၸႂ်ႉလၢႆးၵွင်ႈၵၢင်ႇသေ ယႃႉၵဝ်းတႄႉ ႁူႉၺႃးၸိုင်ႈမိူင်းလႄႈ ၸုမ်းၸၢဝ်းၸိူဝ်းဝႆႉၼၵ်း ၼိူဝ်တီႊမူဝ်ႊၶရေႊၸီႊၼၼ်ႉ သႄႉသွမ်းမၢပ်ႇမႂ်ၶိုၼ်းယဝ်ႉလေႃႇ။

တႃႇတေယူႇ ၼႂ်းၶွပ်ႇဝိူင်းပၵ်းပိူင်ၾိင်ႈမိူင်းသေ သၢၼ်ၶတ်းတေႃႇ ၵၢၼ်လိူၵ်ႈတင်ႈ ၶွင် SAC ၼႆႉ တေလႆႈမီးၶေႃႈ ၸုၵ်းမၼ်ႈပၵ်းလဵဝ်ၵၼ် ဢၼ်ၵူၼ်းမိူင်းၵူႈၸၢဝ်းၶိူဝ်းၼႂ်းမိူင်းႁူမ်ႈတုမ် ယွမ်းႁပ်ႉႁၼ်လီ ၸွမ်းၼၼ်ႉၵွၼ်ႇယဝ်ႉ။

မိူၼ်ၸိူင်ႉဝႃႈ ၵၢၼ်လိူၵ်ႈတင်ႈၶဝ်ၼႆႉ တိုၼ်းဢမ်ႇပဵၼ်တၢင်းၵၢၼ်၊ တိုၼ်းဢမ်ႇပဵၼ်လႆႈ ၶေႃႈၵႄႈပၼ်ႁႃၵၢၼ်မိူင်း။ ထႃႈဢမ်ႇႁဵတ်းလႆႈ ပၢင်ၵုမ်ၵၢၼ်မိူင်းသေ ႁႃလႆႈဝႆႉ ၶေႃႈတူၵ်းလူင်း ၵၢၼ်မိူင်းဢၼ် တေပဵၼ်လၵ်း တႃႇၶဵၼ်ႇတႅမ်ႈပၵ်းပိူင်လၵ်းမိူင်းမႂ်ႇၼၼ်ႉၸိုင် ၵၢၼ်လိူၵ်ႈတင်ႈၼႆႉ ယင်းၸၢင်ႈႁဵတ်း ႁႂ်ႈပၼ်ႁႃယုင်ႈယၢင်ႈလိူဝ်တွၼ်းမႃး ၸဵမ်ၸိူဝ်းၼႆႉ တၵ်းလူဝ်ႇပၢႆးၼႄ ႁႂ်ႈၵူၼ်းမိူင်းလုမ်ႈၾႃႉ ဢိၵ်ႇပႃး လူင်ပွင်ၸိုင်ႈလၢႆလၢႆမိူင်း ပွင်ႇၸႅင်ႈလႅင်းၸႂ်ၸွမ်းၵွၼ်ႇ ၸင်ႇတေ ၸၢင်ႈသၢၼ်ၶတ်းပတ်းပူလႆႈ ၶၵ်ႉ ၵၢၼ်လိူၵ်ႈတင်ႈ ၶွင် SAC သိုၵ်းမၢၼ်ႈ ၼၼ်ႉယဝ်ႉ။