တႄႇႁူဝ်လိူၼ် တီႊသႅမ်ႊပိူဝ်ႊၼႆႉမႃး ၸဝ်ႈသူၼ်တီႈထုင်ႉၸၢမ်ၵႃး ၸႄႈဝဵင်းယွင်ႁူၺ်ႈ ၸိုင်ႈတႆး ပွတ်းၸၢၼ်း ၽုၵ်ႇမၢၵ်ႇၶိူဝ်သူမ်ႈဢမ်ႇပဵၼ်ၵၢၼ်လႄႈ လႆႈဢွၼ်ၵၼ်လႅၵ်ႈလၢႆႈ ၽုၵ်ႇသွမ်ႈတၢင်ႇပိူင်၊ သမ်ႉၺႃးပျီႇတူႉၸိတ်ႉပဢူဝ်း ၵဵပ်းၶွၼ်ႇႁႅင်း ႁဵတ်းႁႂ်ႈယၢပ်ႇၽိုတ်ႇ။
ဢိင်ၼိူဝ်လွင်ႈ ၵၢၼ်မိူင်းၵၢၼ်သိုၵ်းဢမ်ႇယဵၼ်ၵူၺ်းဢမ်ႇၵႃး ၼမ်ႉသမ်ႉထူမ်ႈပႃးထႅင်ႈလႄႈ ၸဝ်ႈသူၼ် ၵူၼ်းမိူင်းဝဵင်းၸၢမ်ၵႃးလႆႈလႅၵ်ႈလၢႆႈၵၢၼ်ၽုၵ်ႇသွမ်ႈ ယႃႈၾိၼ်ႇ။
ပျီႇတူ့ၸိတ့်ပဢူဝ်းသမ်ႉၸွမ်းၵဵပ်းၶွၼ်ႇ သူၼ်ယႃႈ ၼိုင်ႈဢေႊၶိူဝ်ႊ 3 သႅၼ်ပျႃး ၊ လွၵ်ႇငိုတ်ႈပႃးဝႃႈ ပေႃး ဢမ်ႇပၼ် တေယိုတ်းဢဝ်တီႈလိၼ်သူၼ်ႁႆႈၼႃး ဝႃႈၼႆထႅင်ႈ၊ ၸဝ်ႈသူၼ်ယႃႈတိုၵ်ႉ ႁူမ်ႈၵၼ် ဢုပ်ႇဢူဝ်း ငူပ်ႉငိ ႁႂ်ႈလူတ်းယွမ်းၶွၼ်ႇပၼ်ၽွင်ႈယူႇဝႃႈၼႆ။
ၸဝ်ႈသူၼ်မၢၵ်ႇၶိူဝ်သူမ်ႈထုင့်ၸၢမ်ၵႃးလၢတ်ႈၽူႈတွႆႇႁွၵ်ႈဝႃႈ – “တႄႇႁူဝ်လိူၼ်ထူၼ်ႈ 11 ပူၼ်ႉမႃး ၸဝ်ႈသူၼ် မၢၵ်ႇၶိူဝ်သူမ်ႈ တီႈထုင့် ၸၢမ်ၵႃးလႅၵ်ႈၽုၵ်ႇ ယႃႈမႃးၼမ် ။ ပျီႇတူ့ၸိတ့် ပဢူဝ်း ၶဝ် ၵပ်းငိုၼ်း ၸဝ်ႈသူၼ်ယႃႈ ၼိုင်ႈဢေႊၶိူဝ်ႊ 3သႅၼ် ပျႃး ပေႃးဢမ်ႇပၼ်တေယိုတ်းတီႈ လိၼ် ။ယၢမ်းလဵဝ်ၸဝ်ႈသူၼ်ယႃႈ ငူပ့်ငီ့ၵၼ်တင်းၸုမ်းပျီတူ့ၸိတ့်ပဢူဝ်း ဝႃႈႁႂ်ႈလႆႈပၼ် 1 ဢေႊၶိူဝ်ႊ 2 သႅၼ်ပျႃးၵူၺ်းၼႆယူႇဢေႃႈ”- ဝႃႈၼႆ ။
ၵၢၼ်ၽုၵ်ႇမၢၵ်ႇၶိူဝ်သူမ်ႈပီၼႆႉ လႆႈလူင်းငိုၼ်းတိုၼ်းလၢင်းၼမ် ၊ ပူၼ်ႉမႃး3-4 လိူၼ်ၼမ်ႉသမ်ႉထူမ်ႈဝႆႉႁၢဝ်ႈႁႅင်းလႄႈ ထိုင်ၶၢဝ်းမၢၵ်ႇၶိူဝ်သူမ်ႈဢွၵ်ႇတူၼ်ႈမႃးၵမ်းၼႆႉ မီးမူင်ႈမႅင်းၶူပ်းယႃႉ ထိုင်တီႈဢမ်ႇပဵၼ်တူၼ်ႈ ပဵၼ်မၢၵ်ႇလႆႈ။ မၢင်ၸဝ်ႈ လႆႈပွႆႇလူႉပႅတ်ႈတင်းသူၼ် ၵေႃႈမီး။ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵိၼ်းၸႂ်။
ၸဝ်ႈသူၼ်မၢၵ်ႇၶိူဝ်သူမ်ႈလၢတ်ႈၽူႈတွႆႇႁွၵ်ႈဝႃႈ -“ မၢၵ်ႇၶိူဝ်သူမ်ႈဢမ်ႇပဵၼ်ၵၢၼ်လႄႈ ၸင်ႇလႅၵ်ႈၽုၵ်ႇယႃႈ။ ငိုၼ်းတိုၼ်းလၢင်းၵေႃႈသုမ်းၼမ်ၼႃႇယဝ်ႉ၊ ပျီႇတူႉၸိတ်ႉသမ်ႉတိုၵ်ႉၸွမ်းမႃးယွၼ်းၶွၼ်ႇထႅင်ႈယူႇ။ ၵူၼ်းမိူင်းၼႆႉၵိၼ်းယဝ်ႉၵိၼ်းထႅင်ႈ” -ဝႃႈၼႆ ။
တီႈထုင်ႉၸၢမ်ၵႃးၼႆႉ ၵူၼ်းမိူင်းလႆႈၸႂ်ႉႁိူဝ်းၸၢၵ်ႈ ၵႂႃႇမႃးႁႃၵၼ်၊ လိူဝ်သေ ၶွၼ်ႇသူၼ်ယႃႈ 1 ဢေႊၶိူဝ်ႊ 3 သႅၼ် ယဝ့် ယင်းယွၼ်းပႃး ၶွၼ်ႇႁိူဝ်းၸၢၵ်ႈထႅင်ႈ 1 လိူၼ် 15000 ပျႃး ၊ ၶွၼ်ႇရူတ်ႉၵႃး ပေႃးပဵၼ်ၵႃးဢွၼ်ႇ 5 မိုၼ်ႇပျႃး ၊ ပေႃးပဵၼ်ၵႃးလူင် 10 လေႃႉၶိုၼ်ႈၼိူဝ် 1 သႅၼ်ပျႃး ၊ ငိုၼ်းတႃႇၵမ်ႉၸွႆႈၵၢၼ်ၾိုၵ်းၵၢၼ်သိုၵ်းသမ်ႉ 1 ႁိူၼ်း 2 မိုၼ်ႇပျႃး ။ ငိုၼ်းၶွၼ်ႇလၢႆလၢႆၵူၺ်း ၶႂ်ႈတူၵ်း 10 သႅၼ်ယူႇယဝ်ႉ ၵူၼ်းပိုၼ့်တီႈလၢတ်ႈၼင်ၼႆ ။
“ ၶွၼ်ႇ သူၼ်ယႃႈဢမ်ႇၵႃး ၊ ၶွၼ်ႇၵႃး ၊ ၶွၼ်ႇႁိူဝ်းၸၢၵ်ႈ ၊ ၶွၼ်ႇၸၢင်ႈၵူၼ်းတႃႇၵႂႃႇၾိုၵ်းၵၢၼ်သိုၵ်းၸိူဝ်းၼႆ့ပဵၼ်ဢၼ်ၶဝ်ယွၼ်းမႃးထႅင်ႈ။ ၶွၼ်ႇၵဝ်ႇၶွၼ်ႇမႂ်ႇ လႆႈပၼ်လူင်ၵႂႃႇၵူႈမဵဝ်း။ ပေႃးၵူၼ်းမိူင်းၵႂႃႇယွၼ်းႁႂ်ႈလူတ်းယွၼ်ႇပၼ်သမ်ႉလွၵ်ႇငိုတ်ႈၵူၼ်းမိူင်းတေယိုတ်းဢၼ်ၼႆႉဢၼ်ၼၼ်ႉ ။ ပေႃးယဝ်ႉၵေႃႈ ၵႆ့ယိုဝ်းၵွင်ႈလဵၵ်ႉၵွင်ႈယႂ်ႇလူင်ၵႂႃႇ သီႇႁူးႁႃႈတၢင်း လႄႈ ၵူၼ်းမိူင်းသမ်ႉပေႃးလႆႈတူၵ်းၸႂ်ၵူဝ်ႁႄဝႆႉယူႇတႃႇသေႇယဝ်ႉ ”- ဝႃႈၼႆ ။
လွင်ႈၼႆႉ ၽူႈတွႆႇႁွၵ်ႈၶတ်းၸႂ်တိတ်းတေႃႇၸူး PNO ယူႇၵေႃႈ တိတ်းတေႃႇဢမ်ႇလႆႈ။
ယၢမ်းလဵဝ်တီႈထုင့်ၸၢမ်ၵႃးၼႆႉ သူၼ်မၢၵ်ႇၶိူဝ်သူမ်ႈဢၼ်လႅၵ်ႈ ၽုၵ်ႇယႃႈၵႂႃႇၼႆႉ တေမီးယူႇမွၵ်ႈ 300 ဢေႊၶိူဝ်ႊ ။ ပဵၼ်သူၼ်ၼႂ်း ဝၢၼ်ႈသႃႇယႃႇၵုင်း၊ ဝဵင်းၵဝ်ႇ၊ ၼမ်ႉႁူး၊ တူင်ႈၵႃႈ၊ ႁၢႆးသၢၵ်ႇ၊ ပႃႇမူင်ႈ(တယႅတ်ႉဢူၵ်ႉ)၊ ဝၢၼ်ႈမႆႈၵူတ်ႉ( တိပ်ႉပိၼ်ႇၵဝ်ႉ)၊ မူၵ်ႉဢူး ၸိူဝ်းၼႆႉ။
တႅမ်ႈ- ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ် )
