တႄႇဢဝ် ဝၼ်းတီႈ 16/12/2024 ၼႆႉၵႂႃႇ ႁွင်ႈၵၢၼ်ၽွင်းလူင် ၾၢႆႇၵူၼ်းႁဵတ်းၵၢၼ် တႂ်ႈသိုၵ်းမၢၼ်ႈ ႁၢင်ႈႁႅၼ်း တေၵူတ်ႇထတ်း ၸုမ်း Agency ႁႃပၼ်ၵၢၼ်ၼွၵ်ႈမိူင်း ၵဵဝ်ႇလူၺ်ႈလွင်ႈ ႁႅင်းၵၢၼ်မိူင်းမၢၼ်ႈ ၸိူဝ်းၵႂႃႇႁဵတ်းၵၢၼ်ၼွၵ်ႈမိူင်း ၸွင်ႇမီးလွင်ႈသူင်ႇငိုၼ်းၶဝ်ႈမႃးၼႂ်းမိူင်း – ဝႃႈၼႆ။

တႄႇဢဝ်လိူၼ်မေႊထိုင် လိူၼ်ဢေႃႊၵတ်ႊသ် ပီ 2024 ၼႂ်းၶၢဝ်းတၢင်း 4 လိူၼ်ၼႆႉ ယူႇတီႈ ၸုမ်း Agency  ႁႃပၼ် ၵၢၼ်ၼွၵ်ႈမိူင်း 426 ဢၼ်သေ လႆႈသူင်ႇႁႅင်းၵၢၼ်မိူင်းမၢၼ်ႈ မီး 56,860 ၵေႃႉ ၵႂႃႇႁဵတ်းၵၢၼ် တီႈမိူင်းၵျပၼ်ႊ၊ ၵူဝ်ႊရီႊယိူဝ်ႊၸၢၼ်း၊ သိင်ႊၵပူဝ်ႊ၊ မလေးသျႃး၊ မိူင်းထႆး၊ မိူင်းလၢဝ်းလႄႈ ၸိုင်ႈမိူင်း ၼႂ်း ဝၼ်းဢွၵ်ႇၵၢင် ၸိူဝ်းၼၼ်ႉ ၵမ်ႈ ၽွင်ႈ။

ႁႅင်းၵၢၼ်မိူင်းမၢၼ်ႈ ၸိူဝ်းၵႂႃႇႁဵတ်းၵၢၼ်ၼွၵ်ႈမိူင်း လူၺ်ႈမႅၼ်ႈတၢင်းၵၢၼ်ၼၼ့် တေလႆႈဢဝ်ငိုၼ်း တီႈဢေႇသုတ်း 25% ၼႂ်းငိုၼ်းလိူၼ် ဢမ်ႇၼၼ် 25% ၼႂ်းငိုၼ်းလိူၼ် တႃႇ 3 လိူၼ်သေ တေလႆႈသူင်ႇၸူး ၵူၼ်းတီႈႁိူၼ်း ဢၼ်မီးဝႆႉၼႂ်းမိူင်းမၢၼ်ႈ လူၺ်ႈလၢႆးသူင်ႇငိုၼ်း ဢၼ်မႅၼ်ႈတၢင်းၵၢၼ်။ ႁႅင်းၵၢၼ်ၶဝ် ၸွင်ႇသူင်ႇငိုၼ်းႁိုဝ် ဢမ်ႇသူင်ႇ ၼႆ ၼၼ်ႉ ယူႇတီႈ ၸုမ်း Agency ႁႃပၼ်ၵၢၼ်ၼွၵ်ႈမိူင်းၶဝ် တေလႆႈဢဝ်သၢၵ်ႈသေႇလၵ်းထၢၼ်သေ ယိုၼ်ႈတၢင်ႇၼႄသိုၵ်းမၢၼ်ႈ ဝႃႈၼႆ။

လွင်ႈၼႆႉ ႁွင်ႈၵၢၼ်ၽွင်းလူင်ၾၢႆႇၵူၼ်းႁဵတ်းၵၢၼ်သိုၵ်းမၢၼ်ႈ တေတႄႇၵူတ်ႇထတ်းၵႂႃႇ ၼႂ်းဝၼ်းတီႈ 16 – 27/12/2024 ၼႆႉ။ ၼိုင်ႈပွၵ်ႈ တေႁွင်ႉ 50 ၸုမ်း။

ၼႂ်းလိူၼ်ၼူဝ်ႊဝႅမ်းပိူဝ်ႊ ပူၼ်ႉမႃးၼႆႉ ၸုမ်း Agency  ႁႃပၼ်ၵၢၼ်ၼွၵ်ႈမိူင်း ၸိူဝ်းဢမ်ႇသူင်ႇသဵၼ်ႈမၢႆ လွင်ႈႁႅင်းၵၢၼ် သူင်ႇငိုၼ်းၼၼ်ႉ မီး 118 ၸုမ်း။ သင်ဢမ်ႇသူင်ႇပၼ် ႁႂ်ႈၶိုတ်းၶၢဝ်းယၢမ်းၸိုင် တေၺႃး တၢမ်ႇမႂ်ငိုၼ်းလႄႈ တေထုၵ်ႇပိၵ်ႉဢိုတ်းပႃး သုၼ်ႇယိုၼ်ႈတၢင်ႇလိၵ်ႈႁွင်ႉၵၢၼ် ဢၼ်မႂ်ႇ (Demand Letter) ဝႃႈၼႆ။

ၼႂ်းလိူၼ်ၼူဝ်ႊဝႅမ်ႊပိူဝ်ႊ ၼႆႉၵူၺ်းၼင်ႇၵဝ်ႇ ႁွင်ႈၵၢၼ်ၽွင်းလူင် ၾၢႆႇၵူၼ်းႁဵတ်းၵၢၼ်သိုၵ်းမၢၼ်ႈ ႁွင်ႉဢဝ်ၸဝ်ႈၵၢၼ် ၶွမ်ႊပၼီႊ၊ ၸုမ်း Agency  ႁႃပၼ်ၵၢၼ်ၼွၵ်ႈမိူင်း ဢိၵ်ႇပႃး ႁႅင်းၵၢၼ် ၸိူဝ်းတေၵႂႃႇႁဵတ်း ၵၢၼ်ၼွၵ်ႈမိူင်း မႃးလူင်းလၢႆးမိုဝ်းႁူမ်ႈၵၼ် ၵဵဝ်ႇလူၺ်ႈလွင်ႈ သင်လူဝ်ႇႁၢပ်ႇၵၢၼ်သိုၵ်းမႃးၸိုင် ၸုမ်းႁႃပၼ်ၵၢၼ် တေလႆႈႁပ်ႉပုၼ်ႈၽွၼ်း ႁွင်ႉႁႅင်း ၵၢၼ်ပွၵ်ႈမႃးၶိုၼ်း – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။