သိုၵ်းမၢၼ်ႈတင်း သိုၵ်းတဢၢင်း TNLA ႁၢမ်ႈၵူၼ်းမိူင်း တေႃႉသူင်ႇၶူဝ်းၵုၼ်ႇ – ၽၵ်းၶဵဝ် ၵႂႃႇမႃးၼႂ်းၵႄႈၼမ်ႉၶမ်း – မူႇ ၸေႊ ၸိုင်ႈတႆးပွတ်းႁွင်ႇ။

တႄႇဢဝ် ဝၼ်းတီႈ 02/12/2024 ၼႆႉမႃး သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA တင်ႈၵဵတ်ႉ/ လၢၼ်ႇ ၵူတ်ႇထတ်းႁႄႉႁၢမ်ႈ ၵူၼ်းမိူင်းၵႂႃႇမႃး ၼႂ်းၵႄႈဝဵင်းၼမ်ႉၶမ်း – ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ယၢမ်းလဵဝ် ႁၢမ်ႈတေႃႉသူင်ႇပႃး ၽၵ်းၶဵဝ် ၸိူဝ်းၼႆႉထႅင်ႈလႄႈ ႁဵတ်းႁႂ်ႈတုမ်ႉတိူဝ်ႉၸဝ်ႈသူၼ်ႁႆႈၼႃး ယၢပ်ႇၽိုတ်ႇထႅင်ႈ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈၽူႈတွႆႇႁွၵ်ႈဝႃႈ – “သိုၵ်းလွႆၶဝ် ပိၵ်ႉပွတ်းၼိုင်ႈ၊ သိုၵ်းမၢၼ်ႈသမ်ႉ ပိၵ်ႉပွတ်းၼိုင်ႈ မၼ်းဢမ်ႇၸၢင်ႈၵႂႃႇမႃးယဝ်ႉ။ တေႃႈၼင်ႇ ၵူၼ်းၶၢႆၽၵ်း (သေးတႄႇ) ဢၼ်တၢင်ႇရူတ်ႉၶိူင်ႈ ဢႅဝ်ႇၶၢႆၸိူဝ်းၼၼ်ႉ ၶဝ်ယင်းဢမ်ႇပၼ်ၵႂႃႇ လႆႈဝၢႆႇႁူဝ်ရူတ်ႉၶိူင်ႈ မႃးၶၢႆၼႂ်းၵၢတ်ႇၼမ်ႉၶမ်းၶိုၼ်း ၸိူင်ႉၼၼ်ဢေႃႈ”- ဝႃႈၼႆ။

လိူဝ်ၼၼ်ႉ မိူၼ်ၼင်ႇ ၸဝ်ႈသူၼ်ႁႆႈၼႃး တၢင်းဝဵင်းၼမ်ႉၶမ်း ၸိူဝ်းၼႆႉၵေႃႈ တုမ်ႉတိူဝ်ႉႁႅင်း ယွၼ်ႉဢမ်ႇ ၸၢင်ႈတေႃႉသူင်ႇၶၢႆ တၢင်းဝဵင်းမူႇၸေႊ ဝႃႈၼႆ။

“ဢၼ်တေထူပ်းတၢင်းယၢပ်ႇသုမ်းၼမ်တႄႉ တေပဵၼ်ၸိူဝ်းၸဝ်ႈသူၼ်ၽၵ်း ၼႆႉၶႃႈဢေႃႈ။ ယွၼ်ႉမၼ်းဢမ်ႇၸၢင်ႈတေႃႉၵႂႃႇၶၢႆ တၢင်းဝဵင်းမူႇၸေႊ။ လိူဝ်သေ လႆႈတေႃႉၶၢႆတီႈၼမ်ႉၶမ်းၼႆႉၵူၺ်း ၵူႈပွၵ်ႈ ပေႃးၵႂႃႇၶၢႆ တၢင်းမူႇၸေႊၼၼ်ႉ မၼ်းၶၢႆလီ ၵူၼ်းၵိုၼ်းငိုၼ်းၶွၼ်ႈ။ မိူဝ်ႈလဵဝ်ၼႆႉ ပေႃးမႃးၶၢႆ တီႈၼမ်ႉၶမ်းၼႆ ၵူၼ်းၵေႃႈဢမ်ႇၵိုၼ်း ၵူၼ်းသိုဝ်ႉဢေႇ”- ၵူၼ်းၼမ်ႉၶမ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၽွင်းၶၼ်ၶူဝ်းၵုၼ်ႇၶွင်ၵိၼ်ယႅမ်ႉၵႃႈၶိုၼ်ႈၼႆႉ ၶၼ်ၽၵ်းၶဵဝ် ၼႂ်းၸႄႈဝဵင်းၼမ်ႉၶမ်းၵေႃႈ ၵႃႈ ၶိုၼ်ႈၸွမ်း။ လွင်ႈၼႆႉ ပဵၼ်ယွၼ်ႉပေႃႈၵႃႉမႄႈၵႃႉၶဝ် ၶိုၼ်ႈၵႃႈၶၼ်သေ သိုဝ်ႉၶၢႆလႄႈ ႁဵတ်းႁႂ်ႈၵူၼ်းမိူင်း ၸိူဝ်းဢမ်ႇမီးသူၼ်ၽၵ်း လႆႈသိုဝ်ႉၵႃႈၸွမ်း ဝႃႈၼႆ။

ဝဵင်းၼမ်ႉၶမ်း – မူႇၸေႊၼႆႉ ယၢၼ်ၵၼ် 19 လၵ်း။ ၼႂ်း 19 လၵ်းၼႆႉ မီးဝႆႉတပ်ႉသိုၵ်းမၢၼ်ႈ၊ သိုၵ်းတဢၢင်း TNLA လႄႈ သိုၵ်းတႆး SSPP ၸိူဝ်းၼႆႉ တင်ႈလၢၼ်ႇၵူတ်ႇထတ်းဝႆႉ ဢမ်ႇယွမ်း 5 တီႈ။

ယၢမ်းလဵဝ် ဢၼ်သိုၵ်းမၢၼ်ႈ ႁႄႉႁၢမ်ႈသမ်ႉ တီႈၶူဝ်ပၢင်ႇၶမ်း၊ လွႆၵိဝ်ႇလွၵ်ႇ ၼႂ်းၸႄႈဝဵင်းမူႇၸေႊ။ သိုၵ်းတဢၢင်းသမ်ႉ တီႈပွၵ်ႉမၢၼ်ႈၶမ်း၊ တူဝ်းၵဵတ်ႉ ဢေႊသျႃႊဝေႃႊလႄႈ ဝၢၼ်ႈသၢႆးၶၢဝ် ၼႂ်းၸႄႈဝဵင်းၼမ်ႉၶမ်း ။ တေႃႈၼင်ႇ ၵူၼ်းၸေႊလၢၼ်ႉ တေတေႃႉၽၵ်းၶဵဝ် ၵႂႃႇၶၢႆတၢင်းပၢင်ႇၶမ်း – မူႇၸေႊ ၸိူဝ်းၼၼ်ႉ သိုၵ်းမၢၼ်ႈ ယင်းဢမ်ႇပၼ်ၵႂႃႇၶၢႆ – ၵူၼ်းပိုၼ်ႉတီႈလၢတ်ႈ။

ပူၼ်ႉမႃး မိူဝ်ႈၵၢင်လိူၼ်ၼူဝ်ႊဝႅမ်ႊပိူဝ်ႊ ၼၼ်ႉၵေႃႈ သိုၵ်းမၢၼ်ႈ ဢၼ်ပႂ်ႉတီႈၶူဝ်ပၢင်ႇၶမ်းၼၼ်ႉ ႁၢမ်ႈရူတ်ႉၵႃးတၢင်ႇ ၵုၼ်ႇ ဢၼ်လုၵ်ႉဝဵင်းမူႇၸေႊ ၵႂႃႇဝဵင်းၼမ်ႉၶမ်းယဝ်ႉ ပွၵ်ႈၼိုင်ႈ။

ယၢမ်းလဵဝ် ရူတ်ႉၵႃးတၢင်ႇၶူဝ်းၵုၼ်ႇ ဢၼ်လုၵ်ႉတၢင်းမိူင်းၶႄႇၶဝ်ႈမႃး ၼႂ်းဝဵင်းမူႇၸေႊ – ၼမ်ႉၶမ်းၼႆႉၵေႃႈ ယင်းမီးလွင်ႈမၵ်းၶၢၼ်း ၼိုင်ႈဝၼ်းလႂ် ဢမ်ႇပၼ်ပူၼ်ႉ 50 လမ်း။ လွင်ႈၼႆႉ ႁဵတ်းႁႂ်ႈၵူၼ်းမိူင်းၸိူဝ်း တေႃႉတၢင်ႇၶူဝ်းၵုၼ်ႇၶဝ် လႆႈထူပ်းလွင်ႈယၢပ်ႇၽိုတ်ႇဝႆႉ လၢႆလွင်ႈ။