သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈတရူၼ်း ပွႆႇလဵပ်ႈယၢမ်းၵၢင်ၶမ်ႈၵၢင်ၶိုၼ်း ၼႂ်းၸႄႈဝဵင်းလွႆၶေႃ မိူင်းယၢင်းလႅင် ၵူၼ်းမိူင်းပိုၼ်ႉတီႈ မႆႈၸႂ် ၵူဝ်သိုၵ်းမၢၼ်ႈ ပွႆႇမၢၵ်ႇ ဝႃႈၼႆ။

တီႈလႅၼ်လိၼ်တႆး – ယၢင်းလႅင်လႄႈ ၼႂ်းမိူင်းယၢင်းလႅင်ၼႆႉ ၸုမ်းႁူမ်ႈႁွမ်းသိုၵ်းယၢင်းလႅင် တႄႇၽႅၼ်ယၼ်ႇသိုၵ်း 1111 သေ လေႃႇတိုၵ်း သိုၵ်းမၢၼ်ႈ မႃးလၢႆလၢႆတီႈၼၼ်ႉ ၶွပ်ႈတဵမ်ပီၵႂႃႇ မိူဝ်ႈဝၼ်းတီႈ 11/11/2024 ၼႆႉ ဝႃႈၼႆ။

ၽွင်းၽႅၼ်ယၼ်ႇသိုၵ်း 1111 ၼၼ်ႉ ၼႂ်းၸႄႈဝဵင်းလွႆၶေႃ ၸုမ်းႁူမ်ႈႁွမ်း သိုၵ်းယၢင်းလႅင် ယိုတ်းၵုမ်းလႆႈၼႃႈတီႈတင်း ၼမ်သေတႃႉ ဝဵင်းလူင်လွႆၶေႃတႄႉ ဢမ်ႇယိုတ်းၵုမ်းလႆႈ။ ဝၢႆးလင်ၼႆႉ သိုၵ်းမၢၼ်ႈ ထႅမ်ႁႅင်းသိုၵ်း ႁႅင်းၵွင်ႈၵၢင်ႇၶိုၼ်း ဢဝ်တီႈယူႇၼႂ်းဝဵင်းဝႆႉသေ ၶဵင်ႈၶႅင်ၵၢၼ်သိုၵ်းတေႃႇ ၵၼ်မႃးတင်း သိုၵ်းယၢင်းလႅင် ႁၢဝ်ႈႁႅင်း။

ၵူၼ်းပိုၼ်ႉတီႈ လွႆၶေႃ လၢတ်ႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၶဝ် ၸႂ်ႉၶိူင်ႈတရူၼ်းၼမ်မႃးသေ ပွႆႇၶိုၼ်ႈယၢမ်းၵၢင်ၶမ်ႈၵၢင်ၶိုၼ်း ယွၼ်ႉသဵင်လင်ႁႅင်းသေ ႁဵတ်းႁႂ်ႈ ႁဝ်းၶႃႈ ၵူၼ်းမိူင်း ဢမ်ႇလႆႈလပ်းလႆႈၼွၼ်း ၵူဝ်ၶဝ်မႃးပွႆႇမၢၵ်ႇၶႃႈဢေႃႈ”- ဝႃႈ ၼႆ။

တႄႇႁူဝ်လိူၼ်ၼူဝ်ႊဝႅမ်ႊပိူဝ်ႊၼႆႉမႃး သိုၵ်းမၢၼ်ႈ ထႅမ်ႁႅင်း တင်းၼမ်သေ တူင်ႉၼိုင်မႃးၶိုၼ်းၼိူဝ် သဵၼ်ႈတၢင်းလူင် ပၢင်လွင်း၊ မိူင်းပၢႆး၊ ၾၢႆၶုၼ်၊ လွႆၶေႃ ဝႃႈၼႆ။ 

လိူဝ်ၼၼ်ႉ တီႈသဵၼ်ႈတၢင်း ဢၼ်လုၵ်ႉတီႈၸိုင်ႈတႆး ပွတ်းၸၢၼ်း ၵၢႆႇၸူးဝဵင်းလွႆၶေႃၼၼ်ႉ ပျီႇတူႉၸိတ်ႉပဢူဝ်း ႁူမ်ႈတင်း သိုၵ်းမၢၼ်ႈသေ တင်ႈၵဵတ်ႉလၢၼ်ႇ ပႂ်ႉၵူတ်ႇထတ်းၵူၼ်းမိူင်းႁၢဝ်ႈႁႅင်း၊ မၢင်တီႈ ဢမ်ႇပၼ်ၵူၼ်းမိူင်း တေႃႉၶူဝ်း ၵုၼ်ႇၶဝ်ႈဢွၵ်ႇၼမ် ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇ တႃႇၵႂႃႇမႃး ၼႆယဝ်ႉ။