မိူဝ်ႈၼႆႉ ဝၼ်းတီႈ 25/11/2024 ယၢမ်းဝၢႆးဝၼ်း 2 မူင်းပၢႆ ၸၢႆးပဝ်း ဢႃယု 17 ပီ ၵူၼ်းဝၢၼ်ႈပၢင်ႇလႅင်း ဢိူင်ႇၼွင်လႅင် ဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၽိတ်းမေႃးၵၼ် တင်းၵေႃႉပဵၼ် ပေႃႈသိုပ်ႇ (ပေႃႈၼႃႉ) သေ ထိုင်တီႈၽၼ်းတၢႆ ဝႃႈၼႆ။

ၵူၼ်းဝၢၼ်ႈ ပၢင်ႇလႅင်း ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၶဝ်ၽိတ်းမေႃးၵၼ် ၸဵမ်မိူဝ်ႈၵၢင်ၼႂ်ယဝ်ႉ ၶဝ်ၽိတ်းၵၼ် လွင်ႈသင်တႄႉ ဢမ်ႇႁူႉ။ ထိုင်မႃး ယၢမ်းဝၢႆးဝၼ်းၵေႃႈ ၶဝ်တိုၵ်ႉၽိတ်းၵၼ်ယူႇ။ ၵမ်းၼႆႉ ၸၢႆးပဝ်းၼၼ်ႉ ဢဝ်ၽႃႉၽၼ်း ၵေႃႉပဵၼ်ပေႃႈသိုပ်ႇမၼ်း လုင်းဝၼ်း ဢႃယု 48 ပီ လူႉတၢႆထင်တီႈဢေႃႈ”- ဝႃႈၼႆ။

ယၢမ်းလဵဝ် တူဝ်တၢႆလုင်းဝၼ်းၼၼ်ႉ ၾၢႆႇပလိၵ်ႈၶဝ် မႃးဢဝ်တူဝ်ၵႂႃႇဝႆႉ တီႈႁူင်းယႃ ဝဵင်းပၢင်လူင်ယဝ်ႉ။ တွၼ်ႈတႃႇ တူဝ်ၸၢႆးပၢဝ်း ၼၼ်ႉတႄႉ ယၢမ်းလဵဝ် ပၢႆႈလွတ်ႈဝႆႉ ဝႃႈၼႆ။

ဝၢၼ်ႈပၢင်ႇလႅင်း မီးၼႂ်းဢိူင်ႇၼွင်လႅင် ယၢၼ်ၵႆဝဵင်းပၢင်လူင်မွၵ်ႈ  7 လၵ်း မီးၼိူဝ်သဵၼ်ႈတၢင်းလူင် ဝဵင်းပၢင်လူင် – ဝဵင်းလၢႆးၶႃႈ။

ပူၼ်ႉမႃး မိူဝ်ႈဝၼ်းတီႈ 21/01/2024 ၼၼ်ႉၵေႃႉ ၼုမ်ႇၸၢႆး ယွင်ႇယႃႈမဝ်းၵမ် ၵေႃႉၼိုင်ႈ ဢဝ်ၽႃႉၽၼ်း ၼၢင်းယိင်း ဢႃယု 50 ပီ မိူဝ်ႈၽွင်းတိုၵ်ႉၵႂႃႇႁႃၽိုၼ်း တီႈႁိမ်းႁေႃၸဝ်ႈမိူင်း ပွၵ်ႉသူၺ်ႇပီႇတႃႇ ၼၼ်ႉၵေႃႈ ပွၵ်ႈၼိုင်ႈ။

လိူဝ်ၼၼ်ႉ မိူဝ်ႈဝၼ်းတီႈ 27/12/2023 ယၢမ်းႁူဝ်ၶမ်ႈ ၼၼ်ႉၵေႃႈ ၵူၼ်းႁၢႆႉ ဢဝ်ၵွင်ႈမႃးယိုဝ်း တီႈႁၢၼ်ႉဢူးတိၼ်ႇထုၼ်း ဢၼ်ပိုတ်ႇႁၢၼ်ႉၶၢႆ ၶိူင်ႈၾႆးၾႃႉလႄႈ ၾူၼ်း ၼၼ်ႉၵေႃႈ လူႉတၢႆ 4 ၵေႃႉ။

တင်ႈတႄႇ သိုၵ်းမၢၼ်ႈ ယိုတ်းမိူင်းမႃးၼႆႉ ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ၵၢၼ်တေႃႇလွင်ႈလႄႈ လွင်ႈသူႇသမ်း ၵိၼ်ယႃႈမဝ်းၵမ်ၵေႃႈ လိူင်ႇၼမ် ႁဵတ်းႁႂ်ႈၵူၼ်းမိူင်း ၵႂႃႇမႃးႁႃၵိၼ်ယၢပ်ႇ ၵူၺ်းဢမ်ႇၵႃး တႃႇလွင်ႈႁူမ်ႇလူမ်ႈသၢႆၸႂ်ၸဝ်ႈ ၵဝ်ႇၵေႃႈ မီးလွင်ႈမႆႈၸႂ်ဝႆႉ တင်းၼမ်။