ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ယူႇတီႈ ၸုမ်းလုၵ်ႉၽိုၼ်ႉၶဝ် ယိုတ်းၵုမ်းလႆႈဝႆႉ 87 ဝဵင်း ၼႂ်းမိူင်းမၢၼ်ႈ ပတ်းပိုၼ်ႉယဝ်ႉ ဢၼ်ၸုမ်းလုၵ်ႉၽိုၼ်ႉ ယိုတ်းၵုမ်းလႆႈ လိုၼ်းသုတ်းၼႆႉ ပဵၼ်ဝဵင်းၽီႇမေႃႇ ဢၼ်မီးတီႈလႅၼ်လိၼ်မိူင်းၶၢင် – မိူင်း ၶႄႇ။

တီႈဝဵင်းၽီႇမေႃႇ (ဖီမော်) ၼႆႉ တပ်ႉသိုၵ်းၶၢင် KIA ၶဝ် လေႃႇတိုၵ်း တပ်ႉသိုၵ်းမၢၼ်ႈသေ ယိုတ်းၵုမ်းလႆႈ မိူဝ်ႈဝၼ်းတီႈ 02/11/2024 ပူၼ်ႉမႃးၼႆႉ။

ပူၼ်ႉမႃး မိူဝ်ႈဝၼ်းတီႈ 14 ၼႆႉ ၼႂ်းၶေႃႈပိုၼ်ၽၢဝ်ႇ ဝၼ်းၶွပ်ႈတဵမ် ၽႅၼ်ယၼ်ႇသိုၵ်း ဢႃႇရတ်ႉၶ (အာရက္ခ)လႄႈ ပလႅတ်ႉဝႃႉ (ပလက်ဝ) တဵမ်ပီၼၼ်ႉ တပ်ႉသိုၵ်းရၶႅင်ႇ AA ယိုတ်းၵုမ်းလႆႈဝႆႉ ဝဵင်းၸဵင်ႇတလီႇ (ကျိန္တလီမြို့) ၼႂ်းမိူင်းရၶႅင်ႇယဝ်ႉ ဝႃႈၼႆ။

မီးၶၢဝ်ႇဢွၵ်ႇဝႆႉဝႃႈ ဝဵင်းၸဵင်ႇတလီႇၼႆႉ သိုၵ်းရၶႅင်ႇၶဝ် ယိုတ်းၵုမ်းလႆႈဝႆႉ ၸဵမ်မိူဝ်ႈလိူၼ်ဢေႃႊၵတ်ႊသ် ဝႃႈၼႆသေတႃႉ တိုၵ်ႉပိုၼ်ၽၢဝ်ႇဢွၵ်ႇပဵၼ်တၢင်းၵၢၼ် ၼႂ်းလိူၼ်ၼႆႉ။

မိူၼ်ၼႆ တႃႇတေလေႃႇတိုၵ်းယိုတ်းလႆႈ ဝဵင်းဢမ်း (အမ်း)၊ မွင်ႇတေႃး (မောင်တော)၊ ဝဵင်းၵႂႃႉ(ဂွ)လႄႈ တွင်ႇၵူတ်ႉ (တောင်ကုတ်) ၸိူဝ်းၼႆႉၵေႃႈ သိုၵ်းရၶႅင်ႇ AA တိုၵ်ႉသိုပ်ႇလေႃႇတိုၵ်း တပ်ႉသိုၵ်းမၢၼ်ႈ ႁၢဝ်ႈႁႅင်း။ တီႈမိူင်းၶျၢင်းသမ်ႉ ၸုမ်းႁူမ်ႈႁွမ်းသိုၵ်းၶျၢင်းၶဝ် လေႃႇတိုၵ်းတပ်ႉသိုၵ်းမၢၼ်ႈ တီႈဝဵင်းမိၼ်းတႅတ်ႉ (မင်းတပ်မြို့) တင်း ဝဵင်းၾလႅမ်း (ဖလမ်းမြို့)။

ၾၢႆႇသိုၵ်းမၢၼ်ႈ ယိုတ်းမိူင်းသမ်ႉ တႃႇယိုတ်းၵုမ်းလႆႈၶိုၼ်း ဝဵင်းမိူင်းပၢႆး ဢၼ်မီးတီႈလႅၼ်လိၼ်တႆး – ယၢင်းလႅင်ၼၼ်ႉ ထႅမ်ႁႅင်းသိုၵ်းတင်းၼမ်သေ ထူဝ်းသိုၵ်းလေႃႇတိုၵ်း ၸုမ်းလုၵ်ႉၽိုၼ်ႉဝႆႉ။ ဢၼ်သိုၵ်းမၢၼ်ႈ ထႅမ်ႁႅင်းသိုၵ်းယူႇ တီႈဝဵင်းမိူင်းပၢႆးၼႆႉ ပဵၼ်တပ်ႉၶမယ 422 ဝႃႈၼႆ။