ၸုမ်းယိပ်းၵွင်ႈၵၢင်ႇ ၶဝ်ႈလူမ်ႇပိုတ်းယိုဝ်း ၵဵတ်ႉ/လၢၼ်ႇ သိုၵ်းမၢၼ်ႈလႄႈပလိၵ်ႈမၢၼ်ႈ ဢၼ်မီးၼွၵ်ႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း မိူဝ်ႈဝၼ်းတီႈ 14/11/2024 ယၢမ်းဝၢႆးဝၼ်း ၊ သိုၵ်းမၢၼ်ႈပလိၵ်ႈမၢၼ်ႈမၢတ်ႇၸဵပ်းလူႉတၢႆၼမ်။
ၵဵတ်ႉ/လၢၼ်ႇၵူတ်ႇထတ်း ဢၼ်သိုၵ်းမၢၼ်ႈလႄႈပလိၵ်ႈမၢၼ်ႈႁူမ်ႈၵၼ်တင်ႈဝႆႉ ဢၼ်ၺႃးလူမ်ႇ ယိုဝ်းၼႆႉ မီးၾၢႆႇၼွၵ်ႈဝဵင်းယႂႃႇငၢၼ်ႇ ဢၼ်လုၵ်ႉဝဵင်းလိူဝ်ႇ – ႁၢၼ်ႇမျိၼ်ႉမူဝ်ႇ – ယႂႃႇငၢၼ်ႇ – ဢွင်ႇပၢၼ်း။ ပလိၵ်ႈၾၢႆႇယႃႈမဝ်းၵမ်တၢႆ 6 ၵေႃႉလႄႈပလိၵ်ႈမၢၼ်ႈတၢႆ ၵေႃႉၼိုင်ႈ။
ယွၼ်ႉပၢင်လူမ်ႈတိုၵ်းႁဵတ်းႁႂ်ႈသိုၵ်းမၢၼ်ႈပလိၵ်ႈမၢၼ်ႈတၢႆၼႆႉသေ ရူတ်ႉၵႃး ၵူၼ်းမိူင်းမၢၼ်ႈတူင်ႈ ပဵင်း ဢၼ်တေမႃးၶဝ်ႈပွႆးလိူၼ်သိပ်းသွင် ဝဵင်းတူၼ်ႈတီး လႆႈၵိုတ်းၶမ်ဝႆႉၸွမ်းတၢင်း ၼပ်ႉႁူဝ်ပၢၵ်ႇလမ်း၊ သိုၵ်းမၢၼ်ႈမႃးၵူတ်ႇထတ်းပိုၼ်ႉတီႈ ႁိုင်မွၵ်ႈ 2-3 ၸူဝ်ႈမူင်း။
ၸဝ်ႈၵႃး ဢၼ်မႃးၵိုတ်းၶမ်ဝႆႉၸိူဝ်းၼၼ် ႉယင်းလႆႈငိၼ်းသဵင်ယိုဝ်းၵၼ်ယူႇ ဝႃႈၼႆ။
ဢၼ်ၶဝ်ႈလူမ်ႇယိုဝ်းၵဵတ်ႉပလိၵ်ႈမၢၼ်ႈ ၵမ်းၼႆႉ ပဵၼ်ၸုမ်းယိပ်းၵွင်ႈၸုမ်းလႂ်တႄႉ ဢမ်ႇႁူႉတႅတ်ႈတေႃး။
ဝဵင်းယႂႃႇငၢၼ်ႇၼႆႉ ၵူႈပွၵ်ႈပဵၼ်ဝဵင်းဢၼ်ဢမ်ႇမီးၸုမ်းလုၵ်ႉၽိုၼ်ႉလႄႈ ပဵၼ်ဝဵင်းဢၼ်မီး တၢင်းႁၢင်ႈလီလႄႈၵတ်းယဵၼ်ဝဵင်းၼိုင်ႈ။ ၵွပ်ႈၼႆ သိုၵ်းမၢၼ်ႈၵေႃႈဢမ်ႇမႃးပၵ်းတပ်ႉယူႇသဝ်း။ ၵူၺ်းၵႃႈ ၸူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ၵူၼ်းပိုၼ်ႉတီႈ ၶဝ်ႈထိူၼ်ႇယိပ်းၵွင်ႈ ယိုဝ်းသိုၵ်း မၢၼ်ႈလႄႈ ယၢမ်းလဵဝ် သိုၵ်းမၢၼ်ႈပလိၵ်ႈမၢၼ်ႈ ဢမ်ႇပၵ်းတပ်ႉသေတႃႉ မိူဝ်းတင်ႈၵဵတ်ႉ/လၢၼ်ႇ သေပႂ်ႉၵူတ်ႇထတ်းၵူၼ်းၵႂႃႇမႃးဝႆႉ။
သိုၵ်းမၢၼ်ႈတၢၼ်းသူၺ်ႇဢွၼ်ႁူဝ်တႅမ်ႈပိူင်ငဝ်ႈပိုင်းမိူင်း 2008 ၼၼ်ႉ ဢဝ်ဝဵင်းယႂႃႇငၢၼ်ႇ ၶဝ်ႈပႃးဝႆႉၼႂ်းၼႃႈလိၼ်ၽွင်းတူဝ်ၵဝ်ႇၸၢဝ်းထၼု။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ