ပူၼ်ႉမႃး ဝၼ်းတီႈ 12/11/2024 ၼႆႉ ထဝ်ႈၸၢႆး ၵေႃႉၼိုင်ႈ ႁေႃႈရူတ်ႉၵႃးၽႃႇသႂ်ႇ ၼႂ်းၽုင်ၵူၼ်းလႄႈ လူႉတၢႆ 35 ၵေႃႉ မၢတ်ႇၸဵပ်း 43 ၵေႃႉ ၽူႈမီးပုၼ်ႈၽွၼ်းမိူင်းၶႄႇ လၢတ်ႈၼင်ႇၼႆ။

လွင်ႈၼႆႉ ပဵၼ်ၵႂႃႇတီႈပၢင်ႇလဵၼ်ႈႁႅင်း ဝဵင်း Zhuhai ၸႄႈတွၼ်ႈ Guangdong မိူင်းၶႄႇ ပွတ်းၸၢၼ်း။ ၼႂ်းဝၼ်းတီႈ 11 ၼႆႉ မီးထဝ်ႈၸၢႆး ၸိုဝ်ႈႁွင်ႉ Fan ဢႃႇယု 62 ပီ ႁေႃႈရူတ်ႉၵႃး ၽႃႇသႂ်ႇ တီႈၼႂ်းၽုင် ၵူၼ်းၸိူဝ်းတိုၵ်ႉဢွၵ်ႇဢဵၼ်ႁႅင်း ပႆတၢင်းၵႂႃႇမႃး တီႈၼႂ်းပၢင်ႇလဵၼ်ႈႁႅင်းၼၼ်ႉ။

ဢိင်ၼိူဝ်လွင်ႈၼႆႉ မီးယိူင်းဢၢၼ်းၸိူင်ႉႁိုဝ်သေ ႁေႃႈရူတ်ႉၵႃးၽႃႇသႂ်ႇ ၼႂ်းၵႄႈၵၢင် ၵူၼ်းတင်းၼမ် ၼႆၼၼ်ႉတႄႉ ၾၢႆႇပလိၵ်ႈၶဝ် ဢမ်ႇလၢတ်ႈဝႆႉသင်၊ တိုၵ်ႉသိုပ်ႇၵူတ်ႇထတ်းဝႆႉယူႇ ဝႃႈၼႆ။

ပၢင်ႇလဵၼ်ႈႁႅင်း ဝဵင်း Zhuhai ၼႆႉ ပဵၼ်ဢွင်ႈတီႈ ဢၼ်ႁၢင်ႈႁႅၼ်းဝႆႉ တႃႇတေၸတ်းႁဵတ်းပၢင်ပွႆး ၼႄၾၢင်ႁၢင်ႈ တပ်ႉၵၢင်ႁၢဝ်မိူင်းၶႄႇ ဢၼ်ၸတ်းႁဵတ်းမႃးၵူႈပီ။

မိူဝ်ႈတႄႇပဵၼ်ၽေးၵိုင်ႉၵၢင်ႉၼၼ်ႉ လႆႈႁၼ်ၶႅပ်းႁၢင်ႈလႄႈ ငဝ်းႁၢင်ႈသဵင် ဢၼ်ၸုမ်းၸွႆႈထႅမ်ၶဝ် ၵႂႃႇၸွႆႈထႅမ်ပၼ် ၵူၼ်းၸိူဝ်းမၢတ်ႇၸဵပ်း တီႈၼိူဝ်သဵၼ်ႈတၢင်းၼၼ်ႉ ၸွတ်ႇၽႄႈဝႆႉၼိူဝ်သိုဝ်ႇတူင်ႇဝူင်းၵူၼ်း (Social Media) သေတႃႉ  ဝၢႆးလင်ၼၼ်ႉ မီးလွင်ႈပိၵ်ႉဢိုတ်းႁႄႉႁၢမ်ႈၶိုၼ်း – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။