ၸဝ်ႈသိလ်ထမ်းၶူးဝႃးဝုၼ်းၸုမ်ႉ တေယေႃးၶိင်း ႁေႃးထမ်းတြႃးတီႈမိူင်းထႆး

ပေႃးထိုင်မႃး ဝၼ်းတီႈ 16/11/2024 ၼႆႉၸိုင် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တေလုၵ်ႉမိူင်းပူႊတၢၼ်ႊ (Bhutan) ယေႃးၶိင်းပွၵ်ႈမႃး တီႈမိူင်းထႆးသေ တေႁေႃးတြႃးပွၼ်ႈထမ်းပၼ် တၵ်ႉၵႃႇၵူၼ်းမိူင်းၵႂႃႇ ၼႆယဝ်ႉ။

ၸဝ်ႈၶူးလူင် ၺႃႇၼသီႇရိ ၵႅမ်ၽူႈမၢႆငဝ်ႈငုၼ်းမုၵ်ႉၸုမ်းသင်ႇၶႃႇၸိုင်ႈတႆး လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ ယူႇတီႈ ပဵၼ်သင်ၶၸဝ်ႈ လုၵ်ႈသိတ်ႇလုၵ်ႈၼွင်ႉၸဝ်ႈသၢမ်ပႃးသေ ႁူမ်ႈလူၺ်ႈတၵ်ႉၵႃႇမိူင်းၽူင်း ၵမ်ႈၽွင်ႈ ၵႂႃႇပၢင်းၶူးဝႃးပေႃႈ တေယေႃးၶိင်းမႃးၼႂ်းဝၼ်းတီႈ 16 ၼႆႉ။ ဢၼ်ၼႆႉ တၢမ်တူဝ်ၶူးဝႃးပေႃႈၵေႃႈ မွၵ်ႇ လၢတ်ႈပွင်ႇလႅင်းဝႆႉၸိူင်ႉၼႆဢိူဝ်ႈ။ တီႈမိူင်းထႆးတႄႉ တေမီးပၢင်တြႃးပႃးသေၵွၼ်ႇ။ တေမႃးၽႅဝ်ၵုင်းထဵပ်ႈ ဝၼ်းတီႈ 16 ယၢမ်းႁူဝ်ၶမ်ႈ။ ဝၼ်းတီႈ 17 သမ်ႉ တေႁေႃးတြႃးတီႈၵုင်းထဵပ်ႈ”- ဝႃႈၼႆ။

ဢၼ်ၶူးဝႃးၸဝ်ႈ ပွၵ်ႈမႃးၶိုၼ်းၼႆႉ လိူဝ်သေ တေပွၼ်ႈထမ်းတြႃးပၼ်တၵ်ႉၵႃႇၵူၼ်းမိူင်းယဝ်ႉ ယင်းတေၵူတ်ႇထတ်းပႃး လွင်ႈပၢႆးယူႇလီၸဝ်ႈ။ လွင်ႈတႃႇတေဢွၵ်ႇၶၢဝ်းတၢင်း ပၼ်ႇလဵပ်ႈႁေႃးထမ်းတြႃးပၼ်တၵ်ႉ ၵႃႇၵူၼ်းမိူင်းတွၼ်ႈတႃႇ ၼႂ်းမိူင်းတႆးတႄႉ ပႆႇႁူႉတႅတ်ႈတေႃး ၼႆယဝ်ႉ။

“ပေႃးၸဝ်ႈၽႅဝ်ၵုင်းထဵပ်ႈယဝ်ႉ လႅပ်ႈတေၵူတ်ႇထတ်းပႃးပၢႆးယူႇလီ ၸဝ်ႈထႅင်ႈ။ ၵွပ်ႈၼႆလႄႈ တႃႇတေမႃးပၼ်ႇလဵပ်ႈ ႁေႃးတြႃး တီႈၼႂ်းမိူင်းတႆး ၸိူဝ်းၼႆႉတႄႉ ပႆႇလႆႈႁူႉ။ ဢၼ်တေၶဝ်ႈမႃးၼႂ်းမိူင်းတႆးၶိုၼ်းတႄႉ တေၶဝ်ႈမႃးယူႇ ပေႃးၽႅဝ်မႃးၼႂ်းမိူင်းထႆးယဝ်ႉ တေမႃးတီႈမိူင်းၽူင်း တေမႃးဝၼ်းလႂ်ၼႆ ပႆႇလႆႈႁူႉတႅတ်ႈတေႃး။ လႅပ်ႈတေပဵၼ်ဝၢႆးလင် ဝၼ်းတီႈ 20 ၸိူဝ်းၼႆႉ”- ၸဝ်ႈၶူးလူင် ၺႃႇၼသီႇရိ သိုပ်ႇလၢတ်ႈၼႄၼင်ႇၼႆ။

ၵူႈပီ ၽွင်းၼႂ်းဝႃႇသႃၼႆႉ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တိုဝ်းၵမ်သိလ်ထမ်းၼႂ်းထမ်ႈ။ တႄႇဢဝ် ပီၵၢႆၼႆႉမႃး ဢိင်ၼိူဝ်ငဝ်းလၢႆးပၢႆးယူႇလီၸဝ်ႈသေ လႆႈမိူဝ်းဢဝ်ဝႃႇသႃ တီႈဝတ်ႉဝဵင်းၵႅဝ်ႈ ဝဵင်းၵဵင်းသႅၼ် ၸႄႈတွၼ်ႈၵဵင်းႁၢႆး ၸိုင်ႈထႆး။

ၼႂ်းပီ 2024 ၼႆႉ ၸဝ်ႈယေႃးၶိင်း မိူဝ်းဢဝ်ၶဝ်ႈဝႃႇသႃ တီႈမိူင်းပူႊတၢၼ်ႊ တႄႇဢဝ်လိူၼ်ၾႅပ်ႊပိဝ်ႊရီႊ ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်း 9 လိူၼ်ပၢႆယဝ်ႉ ဝႃႈၼႆ။