ၶူဝ်းၵုၼ်ႇၵိၼ်ယႅမ်ႉ ဢမ်ႇၸၢင်ႈဢဝ်ၶဝ်ႈမူႇၸေႊ ၵူၼ်းမိူင်းမႆႈၸႂ် ၵူဝ်ဢမ်ႇမီးဢၼ်ၵိၼ်

ဝၼ်းတီႈ 11/11/2024 ယၢမ်းၵၢင်ၼႂ် မိူင်းၶႄႇ ပိုၼ်ၽၢဝ်ႇ ႁၢမ်ႈၵူၼ်းမိူင်းမူႇၸေႊ တေႃႉၶူဝ်းၵုၼ်ႇ မိူင်းၶႄႇ ဢွၵ်ႇမႃးတၢင်းၽၵ်းတူၸၢင်ႉၽိူၵ်ႇ ၊ ပၼ်တေႃႉသူင်ႇတၢင်း ၽၵ်းတူမၢၼ်ႈဝဵင်း၊ သမ်ႉပၢႆတတ်းမၵ်း သႅၼ်းၵုၼ်ႇ၊ မၢင်သႅၼ်း ဢမ်ႇပၼ်တေႃႉသူင်ႇၶဝ်ႈဢွၵ်ႇ ၵူၼ်းမိူင်းမူႇၸေႊ ပဵၼ်ဢၼ်မႆႈၸႂ် ၵူဝ်ၶူဝ်းၶွင်ၵိၼ်ယႅမ်ႉၶၢတ်ႇ။

ၶူဝ်းၵုၼ်ႇၸိူဝ်းၼႆႉ တၢင်းၾင်ႇမိူင်းၶႄႇ ပၼ်ၶႂၢင်ႉၶဝ်ႈဢွၵ်ႇ တီႈၽၵ်းတူမၢၼ်ႈဝဵင်းၼၼ်ႉယူႇဝႃႈၼႆသေတႃႉ ၸဝ်ႈ ၼႃႈတီႈ ၾၢႆႇတၢင်းမိူင်းမၢၼ်ႈသမ်ႉ ဢမ်ႇပၼ်ဢဝ်ၶဝ်ႈမႃးလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ ဝူၼ်ႉၵႂင်ၸွမ်းၵႄႈၵၢင်မၼ်း။

ၸဵမ်ၶူဝ်းၵုၼ်ႇ ၶူဝ်းၸႂ်ႉ ၶွင်ႈၵိၼ်ယႅမ်ႉတင်းသဵင်ႈၼႆႉ ၵူၼ်းမူႇၸေႊ လႆႈၸႂ်ယႂ်ႇမိူင်းၶႄႇ ၵမ်ႈၼမ်။ ဝၢႆးသေ ၸုမ်းဢူၺ်းလီပွတ်းႁွင်ႇလႄႈ သိုၵ်းမၢၼ်ႈ တိုၵ်းၵၼ်မႃးၼႆႉ ၵုၼ်ႇတၢင်းမိူင်းမၢၼ်ႈၵေႃႈ ဢမ်ႇၶိုၼ်ႈထိုင် ဝဵင်းမူႇၸေႊလႆႈ။ ၵမ်းၼႆသမ်ႉ မိူင်းၶႄႇ သင်ႇႁၢမ်ႈၸိူင်ႉၼႆထႅင်ႈလႄႈ ဢၼ်တုမ်ႉတိူဝ်ႉ သုတ်းၵေႃႈ ပဵၼ်ၵူၼ်းမိူင်း။ ၵွၼ်ႇၼႃႈၼႆႉ ၼမ်ႉမၼ်း ၸၢၵ်ႈ ၼိုင်ႈလိတ်ႉလႂ် 4,000 ပျႃး၊ ယၢမ်းလဵဝ် ပဵၼ်ၵႂႃႇမိုၼ်ႇပၢႆ။ လိူဝ်ၼၼ်ႉ မၢၵ်ႇမႆႉမၢၵ်ႇတွၵ်ႇ ၽၵ်းယိူဝ်ႈၼၢင်းၶဵဝ် ၼိူဝ်ႉပႃ ၸိူဝ်းၼႆႉ ၵႃႈယႂ်ႇၶၼ်သုင်မူတ်း ၵူၼ်းၸၢႆးမူႇၸေႊ ၵေႃႉၼိုင်ႈ လၢတ်ႈၼင်ႇၼႆ –

“မိူဝ်ႈၼမ်ႉၶမ်း တႄႇတူၵ်းၼၼ်ႉ လွင်ႈၵိၼ်ယႅမ်ႉၵူၼ်းမိူင်းၼႆႉ ပႆႇႁၢင်ႈႁၢႆႉပဵင်းၼႆႉ။ မူႇၸေႊၼႆႉ ၵၢၼ် ဝၢၼ်ႈၵၢၼ်မိူင်းၵေႃႈ ပႆႇမီးလွင်ႈလႅၵ်ႈလၢႆႈသင်။ မိူင်းၶႄႇၵေႃႈ တိုၵ်ႉပၼ်တေႃႉၵုၼ်ႇၶၢႆယူႇ ၸဵမ်ဢဝ် ၼမ်ႉမၼ်းၵိၼ် ၸိူဝ်းၼႆႉ။ ၵွၼ်ႇၼႃႈ ၸွမ်ၸိၵ်းသိုၵ်း မိၼ်းဢွင်ႇလၢႆႇ ၵႂႃႇမိူင်းၶႄႇၼႆႉတႄႉ ၼမ်ႉမၼ်း ၵိၼ်ၵေႃႈ ဢမ်ႇပၼ်ဢွၵ်ႇ။ တေႃႈၼင်ႇ ၵူၼ်းမိူင်းမၢင်ၵေႃႉ သိုဝ်ႉသေ ဢၢင်ႈတိဝ်ႈဢွၵ်ႇမႃးၵေႃႈ ဢမ်ႇ ပၼ်ၶၢမ်ႈၵဵတ်ႉ။ ယႃႇဝႃႈ တေဢဝ်မႃးၶၢႆ ဢဝ်မႃးၵိၼ် ၵူၺ်းၵေႃႈ ယင်းဢမ်ႇလႆႈ”- ဝႃႈၼႆ။

လိူဝ်ၼၼ်ႉ ၸိူဝ်းပဵၼ် ၶိူင်ႈၸႂ်ႉၾႆးၾႃႉ မိူၼ်ၼင်ႇ ၶႅပ်းသူဝ်ႊလႃႊ၊ ပႅတ်ႊထရီႊလႄႈ ၶိူင်ႈဢၼ်ၸၢင်ႈ ၵမ်ႉၵႅမ် သိုၵ်း ၸိူဝ်းၼၼ်ႉ ၾၢႆႇမိူင်းၶႄႇ ယိင်ႈၶႅၼ်းႁႄႉႁၢမ်ႈႁႅင်း။ ပေႃးပဵၼ်ၵူၼ်းလၢႆလၢႆ ဢမ်ႇပႃးၶူဝ်း ၵုၼ်ႇသင်တႄႉ ၵႂႃႇမႃးငၢႆႈယူႇသေတႃႉ ပေႃးပႃးၶူဝ်းၶွင်ၵိၼ်ယႅမ်ႉတႄႉ ၶဝ်ႈမူႇၸေႊယၢပ်ႇၼႃႇ။ ၶူဝ်း ၵုၼ်ႇဢၼ်ယၢမ်ႈတေႃႉလူင်းမႃးတၢင်းဝဵင်းလိူဝ်ႇ (မိူင်းမၢၼ်ႈ) ၸိူဝ်းၼႆႉ ယၢမ်းလဵဝ် ၺႃးၵူတ်ႇထတ်းႁႄႉ ႁၢမ်ႈႁႅင်း ၵူၼ်းၸၢႆးမူႇၸေႊ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ပေႃးပဵၼ်ၵူၼ်းတႄႉ ၵႂႃႇမႃးတိုၵ်ႉလႆႈယူႇ ၵူၺ်းၵႃႈ ၵုၼ်ႇဢမ်ႇပၼ်တေႃႉ မိူၼ်ႇၼင်ႇ ယႃႈယႃၸိူဝ်းၼႆႉ တေႃႉယၢပ်ႇ ၼႃႇယဝ်ႉမိူဝ်ႈလဵဝ်။ မိူၼ်ၼင်ႇ ၶူဝ်းၵုၼ်ႇဢၼ်သင်ႇတၢင်းမၢၼ်းတလေးပုၼ်ႉၼႆ မၢင်တီႈ လႆႈလတ်းၶဝ်ႈထိူၼ်ႇၶဝ်ႈၶိူဝ်းသေမႃးလႄႈ ဢမ်ႇမႃးထိုင်လႆႈမူႇၸေႊၼႆႉ ငၢႆႈငၢႆႈ ၸွမ်းတႃႈၸွမ်းတၢင်းၵေႃႈ မီးၸုမ်းယိပ်းၵွင်ႈၵၢင်ႇလၢႆၸုမ်း ပႂ်ႉၼမ်ၼႃႇ ပေႃးမႃးၺႃးသိုၵ်းမၢၼ်ႈ ၵူတ်ႇထတ်းၵေႃႈ ၺႃးၶဝ်ယိုတ်းၶူဝ်းဝႆႉ၊ ပေႃးမႃးၺႃး ၸုမ်းလုၵ်ႉၽိုၼ်ႉၵေႃႈ သမ်ႉဝႃႈ ဢဝ်ၵႂႃႇၶၢႆတေႃႇသိုၵ်းမၢၼ်ႈႁႃႉၼႆသေ ယိုတ်းဝႆႉၵေႃႈမီး”- ဝႃႈၼႆ။

သဵၼ်ႈတၢင်း ဢၼ်ၵူၼ်းမိူင်းယၢမ်ႈတေႃႉၵုၼ်ႇ မိူၼ်ၼင်ႇ သဵၼ်ႈတၢင်းလူင်ႁၢႆႊဝေႊ(သဵၼ်ႈတၢင်းပျီႇထွင်ႇၸူႉ) ၼၼ်ႉ ယၢမ်းလဵဝ် ဢမ်ႇတႆႇလႆႈယဝ်ႉလႄႈ ၸိူဝ်းလူဝ်ႇၵႂႃႇမိူင်းမၢၼ်ႈၼႆႉ လႆႈလုၵ်ႉမူႇၸေႊ ၵႂႃႇၼမ်ႉၶမ်း၊ လုၵ်ႉၼမ်ႉၶမ်းလူင်းၵႂႃႇ ၼမ်ႉၽၵ်းၵႃ ၵူတ်ႉၶၢႆယဝ်ႉ ၸင်ႇထိုင်လႃႈသဵဝ်ႈ။ ၵႂႃႇမႃးတႄႉ တိုၵ်ႉလႆႈယူႇဝႃႈၼႆသေတႃႉ ဢမ်ႇထိုင်လႆႈၵမ်းလဵဝ်လႄႈ လႆႈဝႄႉၼွၼ်းၸွမ်းတၢင်းၼိုင်ႈၶိုၼ်း။ မိူဝ်ႈဢွၼ်တၢင်း လႃႈသဵဝ်ႈ မူႇၸေႊၼႆႉ ၶၢဝ်းတၢင်း 3 ၸူဝ်ႈမူင်းၶိုင်ႈ ၵူၺ်းၵေႃႈ ထိုင်မူႇၸေႊယဝ်ႉ။ ယၢမ်းလဵဝ် လႆႈၸႂ်ႉၶၢဝ်းတၢင်း ၼိုင်ႈၶိုၼ်း 2 ဝၼ်းလူးၵွၼ်ႇ။ ၶၢဝ်ႇတႄႉ လိုဝ်းဢွၵ်ႇမႃးဝႃႈ လွင်ႈၶႄႇ သင်ႇႁၢမ်ႈတေႃႉၵုၼ်ႇၼႆႉ တႃႇၶၢဝ်းတၢင်း 3 လိူၼ်ၵူၺ်း ဝႃႈၼႆသေတႃႉ ၾၢႆႇမိူင်းၶႄႇတႄႉ ပႆႇဢွၵ်ႇ လိၵ်ႈပဵၼ်တၢင်းၵၢၼ်ဝႃႈ တေႁိုင်လၢႆလိူၼ် ၵူၼ်းပိုၼ်ႉတီႈလၢတ်ႈ။

မိူင်းတႆးပွတ်းႁွင်ႇ လၢႆဝဵင်းၼႆႉ ၸုမ်းဢူၺ်းလီၵုမ်းလႆႈ ၵမ်ႈၼမ်ယဝ်ႉသေတႃႉ မူႇၸေႊၼႆႉ သိုၵ်းမၢၼ်ႈ တိုၵ်ႉပၼ်ႇ ၵၢၼ်လႆႈလီယူႇ။ မိူၼ်ၸိူင်ႉၼင်ႇ ၶႃႈႁၢပ်ႇၵၢၼ်ၶုၼ်တၢင်းၼမ်ႉၶမ်း၊ ၵူတ်ႉၶၢႆ၊ ပၢင်ႇသၢႆး ၸိူဝ်းၼႆႉ လႆႈမႃးၼင်ႈလုမ်း ဝႆႉမူႇၸေႊ။ လုမ်းဢၼ်ႁဵတ်းပၼ် ဝႂ်မုင်ႉႁေႃႈႁိူၼ်း၊ မၢႆၾၢင် ၸိူဝ်းၼႆႉၵေႃႈ မႃးၼင်ႈဝႆႉ တီႈမူႇၸေႊ။

ၵူၼ်းပိုၼ်ႉတီႈလၢတ်ႈဝႃႈ – ဝဵင်းမူႇၸေႊၼႆႉ ၸုမ်းဢူၺ်းလီပွတ်းႁွင်ႇ ဢိူမ်ႈၸမ်ဝဵင်းဝႆႉယဝ်ႉ။ သင်ၶဝ်ႈ ဝဵင်းၵေႃႈထိုဝ်ဝႃႈ ယိုတ်းလႆႈယဝ်ႉ။ ၵူၺ်းၵႃႈ လႆႈငိၼ်းၶၢဝ်ႇဝႃႈ – မိူင်းၶႄႇ ဢမ်ႇပၼ်ၶဝ်ႈ။ ၾၢႆႇၼိုင်ႈ ဝဵင်းဢၼ်မီးၽၵ်းတူၶၢမ်ႈလႅၼ်လိၼ် ၶဝ်ႈဢွၵ်ႇၸူးမိူင်းၶႄႇၼႆႉ ၶႄႇၶဝ် သင်ႇပိၵ်ႉဢိုတ်းဝႆႉမူတ်းယဝ်ႉ မိူၼ်ၵၼ်။

ၵွၼ်ႇၼႃႈၽႅၼ်ယၼ်ႇသိုၵ်း 1027 ၼၼ်ႉ တီႈ 105 လၵ်း မူႇၸေႊၼႆႉ ၵၢၼ်ၵႃႉၶၢႆႁိူဝ်ႈႁိူင်းပဵၼ်ၵၢၼ်။ မီးႁူင်းၵဵပ်းသိုဝ်ႉ မၢၵ်ႇၶဝ်ႈတဝ်ႈၼမ်ႉ ဢၼ်ၵူၼ်းမိူင်းၽုၵ်ႇလႆႈမႃး ၸိူဝ်းၼၼ်ႉ။ လၢႆးလႆႈငိုၼ်း ၵူၼ်းမိူင်း ဢမ်ႇၶၢတ်ႇ။ ၵမ်ႈၼမ် သူင်ႇၶၢႆ တေႃႇမိူင်းၶႄႇ ၵမ်းသိုဝ်ႈ။ ၵမ်ႈၼႆႉ ပိၵ်ႉဢိုတ်းလၢႆၾၢႆႇယဝ်ႉ လႄႈ ၵူၼ်းမိူင်းၵေႃႈ ဢမ်ႇပဵၼ်ၵၢၼ်။ လိူဝ်သေ မီးၵုၼ်ႇတၢင်းမိူင်းၶႄႇ ၶဝ်ႈမႃးလႆႈဢိတ်းဢွတ်းၵူၺ်း လႄႈ ၵူၼ်းမိူင်း ပေႃးလႆႈပႅင်းၵိၼ်ပႅင်းၸႂ်ႉၼႆယဝ်ႉ။

ၽၵ်းတူၶၢမ်ႈလႅၼ်လိၼ်တႆး – ၶႄႇၼႆႉ တီႈမူႇၸေႊ မီးဝႆႉ 3 တီႈ ၽၵ်းတူမၢၼ်ႈဝဵင်းသမ်ႉ ၵမ်ႈၼမ် တေပဵၼ်တၢင်း ဢၼ် ၵႃးတၢင်ႇၵုၼ်ႇသႅၼ်းယႂ်ႇလတ်းၶၢမ်ႈ။ ၽၵ်းတူလူင် ႁေႃၶမ်းလူင်တႄႉ တေပဵၼ်တႃႇၵူၼ်း ၸိူဝ်းၶႂ်ႈၶဝ်ႈဢွၵ်ႇ ဢႅဝ်ႇယဵမ်ႈတွင်ႈတဵဝ်းလႄႈ ရူတ်ႉၶိူင်ႈ ၶၢမ်ႈလႆႈဢိတ်းဢွတ်း။ ၽၵ်းတူ ၸၢင်ႉၽိူၵ်ႇၼၼ်ႉသမ်ႉ ပဵၼ်တႃႇရူတ်ႉၶိူင်ႈ၊ ၵႃး ဢၼ်ၸႂ်ႉၸွမ်း ႁိူၼ်းယေးၽႂ်မၼ်းလတ်းၶၢမ်ႈ။ ယၢမ်း လဵဝ် ၾၢႆႇၶႄႇၾၢႆႇမၢၼ်ႈ ဢွၵ်ႇပိူင်ႁႄႉႁၢမ်ႈလၢႆလွင်ႈလႄႈ ဢမ်ႇမိူၼ်ၵဝ်ႇ။