ၶႄႇႁၢမ်ႈ ဢမ်ႇပၼ်ရူတ်ႉၶိူင်ႈတၢင်ႇၵုၼ်ႇ ၶဝ်ႈမူႇၸေႊ

မိူဝ်ႈၼႆႉ ဝၼ်းတီႈ 11/11/2024 ယၢမ်းၵၢင်ၼႂ် ၾင်ႇမိူင်းၶႄႇ ဢမ်ႇပၼ်ၶႂၢင်ႉ ရူတ်ႉၶိူင်ႈတၢင်ႇၶူဝ်းၵုၼ်ႇ လုၵ်ႉၸေႊၵဝ်ႇ ၶဝ်ႈမႃးတၢင်းၽၵ်းတူၸၢင်ႉၽိူၵ်ႇ တီႈဝဵင်းမူႇၸေႊ ၸိုင်ႈတႆးပွတ်းႁွင်ႇယဝ်ႉ ဝႃႈၼႆ။

ၵူၼ်းမူႇၸေႊ ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ရူတ်ႉၶိူင်ႈ တၢင်ႇၶူဝ်းၵုၼ်ႇ ဢၼ်လုၵ်ႉတၢင်း ၸေႊၵဝ်ႇဢွၵ်ႇမႃးတၢင်း ၽၵ်းတူၸၢင်ႉၽိူၵ်ႇၼႆႉ ၶႄႇၶဝ် ဢမ်ႇပၼ်ဢွၵ်ႇမႃးယဝ်ႉ။ ဢၼ်ၶဝ်ပၼ်ဢွၵ်ႇမႃးၼႆႉ ပဵၼ်ရူတ်ႈၶိူင်ႉပဝ်ႇ (ဢမ်ႇတၢင်ႇၶူဝ်းၵုၼ်ႇသင်) ၸိူင်ႉၼၼ်ၵူၺ်းၶႃႈ”- ဝႃႈၼႆ။

တီႈၽၵ်းတူၸေႊၵဝ်ႇ – ၸၢင်ႉၽိူၵ်ႇၼႆႉသမ်ႉ ၾင်ႇမိူင်းၶႄႇ ဢမ်ႇပၼ်ၶႂၢင်ႉဢွၵ်ႇ။ ၵူၺ်းၵႃႈ ပၼ်ၶႂၢင်ႉဢွၵ်ႇတီႈၽၵ်းတူမၢၼ်ႈဝဵင်း။ တီႈၽၵ်းတူၼၼ်ႉသမ်ႉ တၢင်းၾင်ႇမိူင်းမၢၼ်ႈသမ်ႉ ဢမ်ႇပၼ်ၶဝ်ႈ။ ၵူၺ်းပၼ် ၶဝ်ႈဢွၵ်ႇတီႈၽၵ်းတူ ၸၢင်ႉၽိူၵ်ႇၼႆႉၵူၺ်း – ၸဝ်ႈရူတ်ႉၶိူင်ႈ တေႃႉတၢင်ႇၶူဝ်းၵုၼ်ႇ ၵေႃႉၼိုင်ႈ လၢတ်ႈၽူႈ တွႆႇႁွၵ်ႈၼင်ႇၼႆ။

“ဢၼ်ၾၢႆႇၶႄႇၶဝ် ပွႆႇပၼ်ၶဝ်ႈမႃးသမ်ႉ တီႈၽၵ်းတူမၢၼ်ႈဝဵင်း တီႈၼၼ်ႈသမ်ႉ ၾင်ႇမိူင်းမၢၼ်ႈ ဢမ်ႇပၼ်ၶဝ်ႈ။ တီႈၽၵ်းတူၸၢင်ႉၽိူၵ်ႇသမ်ႉ ၾင်ႇမိူင်းၶႄႇ ဢမ်ႇပၼ်ၶဝ်ႈမႃး ၾင်ႇမိူင်းမၢၼ်ႈၼႆႉသမ်ႉ ပၼ်ၶႂၢင်ႉၶဝ်ႈပဵၼ်ဝႆႉ ၸိူင်ႉၼႆဢေႃႈ။ သုၵ်ႉယုင်ႈၼႃႇ”- ဝႃႈၼႆ။

တႄႇဢဝ် ဝၼ်းတီႈ 25/10/2024 ၼၼ်ႉမႃး တၢင်းၾင်ႇမိူင်းၶႄႇ မၵ်းတတ်း ႁၢမ်ႈတေႃႉသူင်ႇၶူဝ်းၵုၼ်ႇ၊ ၶွင်ၵိၼ်ယႅမ်ႉ၊ ၶိူင်ႈၸႂ်ႉၾႆးၾႃႉ ၸိူဝ်းၼႆႉ ၶဝ်ႈမႃးၼႂ်းမိူင်းတႆး တၢင်းၽၵ်းတူၸၢင်ႉၽိူၵ်ႇ၊ ၽၵ်းတူလူင် (ႁေႃၶမ်းလူင်) ယဝ်ႉ။ ယွၼ်ႉဝႃႈ ၵွၼ်ႇၼႃႈၼၼ်ႉ လၢႆးဝၼ်း ပလိၵ်ႈၶႄႇၶဝ်ၵူတ်ႇထတ်းတီႉလႆႈ သိူဝ်ႈၸီႇၵႃႇ (သိူဝ်ႉႁႄႉမၢၵ်ႇၵွင်ႈ)၊ သွၵ်းတိၼ်သိုၵ်းလႄႈ ၶွမ်ႊပိဝ်ႊတိူဝ်ႊ ၸိူဝ်းၼႆႉ။

ၵူၼ်းၵႃႉၶၢႆ ၶူဝ်းၵုၼ်ႇ တီႈဝဵင်းမူႇၸေႊ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ဢၼ်ၶႄႇၶဝ်ႈႁၢမ်ႈၼႆႉ တေမီး 20 ဝၼ်းပၢႆယဝ်ႉ။ လွင်ႈၶဝ်ပိၵ်ႉဢိုတ်းၼႆႉ ၸိူဝ်းၶူဝ်းၵုၼ်ႇ၊ ၶိူင်ႈၾႆးၾႃႉ ၸိူဝ်းၼႆႉ။ ၶူဝ်းၵုၼ်ႇၶႃႈ ၶမ်ဝႆႉ တီႈၸေႊၵဝ်ႇ ဢမ်ႇၸၢင်ႈ ဢွၵ်ႇမႃးၼႆႉ ၼမ်ၶႃႈဢေႃႈ။ ၶူဝ်းၵုၼ်ႇတႃႇတေၶဝ်ႈမႃးသမ်ႉ ဢမ်ႇမီး ပေႃးၶၢႆမူတ်းယဝ်ႉ လူဝ်ႇပိၵ်ႉသႅင်ႇၵူၺ်းယဝ်ႉ။ ပေႃးၶဝ် ႁၢမ်ႈၸိူင်ႉၼႆ 5-6 လိူၼ်တႄႉ တီႈမူႇၸေႊၼႆႉ ဢမ်ႇမီးၶူဝ်းၵုၼ်ႇ တႃႇၶၢႆယဝ်ႉ”- ဝႃႈၼႆ။

ဢၼ်ၾင်ႇမိူင်းၶႄႇႁၢမ်ႈ ၶူဝ်းၵုၼ်ႇ၊ ၶိူင်ႈၾႆးၾႃႉ ဢမ်ႇပၼ်ဢွၵ်ႇမႃးသမ်ႉ မိူၼ်ၼင်ႇ ၶူဝ်းၶွင်ဢၼ်ၵဵဝ်ႇ ၶွင်ႈၼႂ်းတပ်ႉသိုၵ်း။ သၢႆသႂၢင်းၾူၼ်း၊ ၾႆးသႅင်လႅတ်ႇ (Sola)၊ Power Bank ၊ ၾူၼ်း ၸိူဝ်းၼႆႉ။ ယဝ်ႉၵေႃႈ ၶွင်ၵိၼ်ယႅမ်ႉ၊ မၼ်းဢႃႇလူး၊ ၶဝ်ႈသွႆးႁႅင်ႈ ၸိူဝ်းၼႆႉထႅင်ႈ။