ၸွမ်ၽွင်းလူင် မိူင်းၶႄႇ Mr. Li Qiang လၢတ်ႈဝႃႈ တေႁဵတ်းသၢင်ႈ ၼင်ႇႁိုဝ် သိုၵ်းမၢၼ်ႈ တေၸတ်းၵၢၼ် လႆႈၵဵတ်ႉ/ လၢၼ်ႇ တီႈလႅၼ်လိၼ်တႆး – ၶႄႇ လႆႈတဵမ်တီႈ မိူဝ်ႈၽွင်းႁူပ်ႉထူပ်းၵၼ်တင်း ၸွမ်းၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၼႂ်းဝၼ်းတီႈ 06/11/2024 ၼၼ်ႉၼင်ႇၼႆ။
ၸွမ်ၽွင်းလူင် မိူင်းၶႄႇ သိုပ်ႇလၢတ်ႈဝႃႈ ၵဵတ်ႉ/လၢၼ်ႇ လႅၼ်လိၼ် သွင်ၸိုင်ႈမိူင်းၼႆႉ တေလႆႈမီးတႂ်ႈ လွင်ႈၸတ်း ၵၢၼ်လူင်ပွင်ၸိုင်ႈၵူၺ်း။ ယွၼ်ႉၼၼ် တေႁဵတ်းသၢင်ႈၵႂႃႇ ၼင်ႇႁိုဝ် သိုၵ်းမၢၼ်ႈ တေၸတ်းၵၢၼ်လႆႈၵဵတ်ႉ/ လၢၼ်ႇ တီႈလႅၼ်လိၼ် တဵမ်တီႈ။ လိူဝ်ၼၼ်ႉ ပၼ်ၶေႃႈမၼ်ႈၵႅၼ်ႇၵႂႃႇဝႃႈ ယူႇတီႈမိူင်းၶႄႇသေ တေသိုပ်ႇၵမ်ႉၸွႆႈပၼ်ၵႂႃႇ မိူင်းမၢၼ်ႈထႅင်ႈ ဝႃႈၼႆ။
ၽွင်းမိူဝ်ႈႁူပ်ႉထူပ်းၵၼ်ၼၼ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈဝႃႈ ၸုမ်းဢူၺ်းလီပွတ်းႁွင်ႇ 3 ၸုမ်းၼႆႉ ဢမ်ႇႁဵတ်းၸွမ်း ၶေႃႈတူၵ်းလူင်းႁၢႆႊၵႅၼ်ႊ ဢၼ်မိူင်းၶႄႇ ၶဝ်ႈငူပ်ႉငီႉဝႆႉၼၼ်ႉသေ သိုပ်ႇ လေႃႇတိုၵ်းတပ်ႉသိုၵ်းမၢၼ်ႈမႃး၊ ယွၼ်ႉၼၼ် ယူႇတီႈ ၸုမ်းဢူၺ်းလီ 3 ၸုမ်း သင်ဢမ်ႇၼႄလႆႈ မီးၸႂ် လွင်ႈငမ်းယဵၼ်တႅတ်ႈတေႃးၸိုင် တေဢမ်ႇ ၸၢင်ႈဢုပ်ႇဢူဝ်းၵၼ်လႆႈ၊ တေသိုပ်ႇၽဵဝ်ႈမူၺ်ႉ ၵၢၼ်ၵႃႉၶၢႆ ဢၼ်ဢမ်ႇၸႂ်ႈတၢင်းၵၢၼ် တီႈလႅၼ်လိၼ် ဢၼ်တေၵမ်ႉပၼ် ၸုမ်းယိပ်းၵွင်ႈၵၢင်ႇၶဝ် ဝႃႈၼႆ။
ဝၢႆးၼၼ်ႉ ၸွမ်ၽွင်းလူင်မိူင်းၶႄႇ သိုပ်ႇလၢတ်ႈဝႃႈ တေၵမ်ႉၸွႆႈပၼ်ၵႂႃႇ ၼင်ႇႁိုဝ် မိူင်းမၢၼ်ႈ တေၸတ်းႁဵတ်းလႆႈ ပၢင်လိူၵ်ႈတင်ႈလႄႈ လွင်ႈတေသၢင်ႈၽႅၼ်ၵၢၼ် သဵၼ်ႈတၢင်းၵၢၼ်မၢၵ်ႈမီး မိူင်းၶႄႇ – မိူင်းမၢၼ်ႈ ။
ၵူၺ်းၵႃႈ လွင်ႈသိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ၼႂ်းၸိုင်ႈမိူင်းပတ်းပိုၼ်ႉ ဢိၵ်ႇပႃး ၸိုင်ႈတႆးပွတ်းႁွင်ႇသေ ႁဵတ်း ႁႂ်ႈႁိူၼ်းယေး ဝတ်ႉဝႃးၽႃသိူဝ်ႇ လူႉၵွႆ ၵူၼ်းမိူင်းမၢတ်ႇၸဵပ်းလူႉတၢႆ ၸိူဝ်းၼႆႉတႄႉ ဢမ်ႇႁၼ်ဢုပ်ႇပႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ