ၵူၼ်းမိူင်း – ၸဝ်ႈၼႃး တီႈဝဵင်းလၢႆးၶႃႈ ဢွၼ်ၵၼ်ၶၢင်း ၵဵဝ်ႇလူၺ်ႈၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉ ၼမ်ႉမၼ်းၸိူဝ်ႉၾႆး ၸိူဝ်းၼႆႉ ၶိုၼ်ႈၵူႈလွင်ႈ ၽွင်းၶၢဝ်းၵၢၼ် လူဝ်ႇဢဝ်မၢၵ်ႇၶဝ်ႈတဝ်ႈၼမ်ႉၼႆႉ ဝႃႈၼႆ။

ယၢမ်းလဵဝ်ၼႆႉ ပဵၼ်ၶၢဝ်းလူဝ်ႇဢဝ်မၢၵ်ႇၶဝ်ႈတဝ်ႈၼမ်ႉၵၼ်ယဝ်ႉလႄႈ ၸဝ်ႈၼႃး တီႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဢွၼ်ၵၼ်ၶၢင်း ယွၼ်ႉလႆႈၸၢင်ႈၵူၼ်းႁဵတ်းၵၢၼ် ၵႃႈႁႅင်းမႃးလိူဝ်ၵဝ်ႇ ၵဵဝ်ႇလူၺ်ႈၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉ ပုင်ႈၶိုၼ်ႈႁႅင်း ပဵၼ်သွင်သၢမ်ပုၼ်ႈ ၼၼ်ႉယဝ်ႉ။

ၸဝ်ႈၼႃး ဝဵင်းလၢႆးၶႃႈ ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းၼႆႉ ပဵၼ်ၶၢဝ်းပၢတ်ႇၶဝ်ႈ၊ ပုမ်ႇ ၶဝ်ႈယဝ်ႉ။ ၵႃႈၸၢင်ႈလၢႆးဝၼ်း ပၢတ်ႇၶဝ်ႈတေႃႇဝၼ်း ၼိုင်ႈၵေႃႉ လႆႈပၼ် 15,000 ပျႃးယဝ်ႉ။ ၵူႈပီ 10,000 ပျႃး – 12,000 ပျႃး ၵူၺ်း။ ပုမ်ႇၶဝ်ႈတေႃႇဝၼ်း 35,000 ပျႃး ပီၵၢႆ 25,000 ပျႃး။ ၶူဝ်းၵုၼ်ႇၵေႃႈ ၶိုၼ်ႈၵူႈမဵဝ်း ၶူဝ်းၵုၼ်ႇ ဢၼ်ယၢမ်ႈသိုဝ်ႉ 1,000 ပျႃးၼၼ်ႉ ပီၼႆႉ ပဵၼ်မႃး 2,000 ပျႃးယဝ်ႉ။ ၶဝ်ႈသၢၼ်သမ်ႉ ၶၼ်လူင်း ႁဵတ်းၼႆဢေႃႈ။ ႁဵတ်းႁိုဝ်လႄႈ ၸဝ်ႈ ၼႃးႁဝ်းဢမ်ႇၵိၼ်းၸႂ်”- ဝႃႈၼႆ။

ယၢမ်းလဵဝ် ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) ၼိုင်ႈလိတ်ႉလႂ် 5,000 ပျႃး။ ၾုၼ်ႇသႂ်ႇၼႃး ၵူႈပီ ၼိုင်ႈထူင် 80,000 ပျႃး – 90,000 ပျႃး။ ပီၼႆႉ ၼိုင်ႈထူင် 160,000 ပျႃး – 170,000 ပျႃးယဝ်ႉ ဝႃႈၼႆ။

ၵူၼ်းၵိၼ်ၸၢင်ႈ လၢႆးဝၼ်း ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ၶၼ်ၶူဝ်းၵုၼ်ႇ ၶွင်ၵိၼ် ယႅမ်ႉ ၶိုၼ်ႈပဵၼ်သွင်သၢမ်ပုၼ်ႈ၊ ၼမ်ႉမၼ်းၵိၼ်တဝ်ႈလဵၵ်ႉ ယၢမ်ႈသိုဝ်ႈၵိၼ် 2,000 ပျႃးၼၼ်ႉ ယၢမ်းလဵဝ် ပဵၼ်ၵႂႃႇ 5,000 ပၢႆယဝ်ႉ ။ ၼိူဝ်ႉမူ ၼိုင်ႈၸွႆႈ 35,000 ပျႃး၊ ၼိူဝ်ႉဝူဝ်း 20,000 ပၢႆ။ ၽၵ်းၶဵဝ် ၸိူဝ်းၼႆႉၵေႃႈ ၶိုၼ်ႈမူတ်း ၼိုင်ႈမတ်ႉ 500 ၼၼ်ႉ ၶိုၼ်ႈမႃးပဵၼ် 1,000 ပျႃးယဝ်ႉ”- ဝႃႈၼႆ။

ဢိင်ၼိူဝ် ၶၼ်ၶူဝ်းၵုၼ်ႇ ၶွင်ၵိၼ်ယႅမ်ႉ ပုင်ႈၶိုၼ်ႈႁႅင်းၸိူင်ႉၼႆၼႆႉ ယွၼ်ႉၸုမ်းၵျႃးၽႅၼ်ႉ ဢၼ်လုၵ်ႉတၢင်းလႅၼ်လိၼ်တႆး – ၶႄႇ ပၢႆႈမႃးယူႇဝႆႉ တၢင်းလၢႆးၶႃႈၼမ်လႄႈ ၽၵ်းၶဵဝ် ၸိူဝ်းၼႆႉ ၵမ်ႈၼမ် ၶဝ်တေမဝ်သိုဝ်ႉ ဢဝ်မူတ်း ဝႃႈၼႆ။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၵဵဝ်ႇလူၺ်ႈ ၶၼ်ၵုၼ်ႇ – ၽၵ်းၶဵဝ်ၶိုၼ်ႈၼႆႉ မၼ်းပႃးလူၺ်ႈ ၸုမ်းၵျႃးၽႅၼ်ႉၵေႃႈ ၸႂ်ႈဢေႃႈ။ မိူၼ်ၼင်ႇ ၽၵ်းၶဵဝ်ၼႆႉ ပေႃးၶဝ်မႃးသိုဝ်ႉၼႆ ၶဝ်မဝ်လုမ်းသိုဝ်ႉ ၵႂႃႇမူတ်း။ ႁဵတ်းၼၼ်သေ ၵူၼ်းၶၢႆၽၵ်းသမ်ႉ ၶိုၼ်ႈၵႃႈသေၶၢႆ ၸုမ်းၼၼ်ႉၵေႃႈ ဢမ်ႇသဵတ်ႈ သိုဝ်ႉၵႂႃႇႁဵတ်း ၼၼ်မူတ်း။ ပေႃးပဵၼ်ၼႆ သမ်ႉတုမ်ႉတိူဝ်ႉၵူၼ်းပိုၼ်ႉတီႈ ဢၼ်ၶဝ်ယၢမ်ႈသိုဝ်ႉၵိၼ် ၶၼ်ၵူႈပွၵ်ႈၼၼ်ႉ ၶဝ် ဢမ်ႇၸၢင်ႈသိုဝ်ႉၵိၼ်ယဝ်ႉ ပဵၼ်ဝႆႉၸိူင်ႉ ၼႆဢေႃႈ တီႈဝဵင်းလၢႆးၶႃႈၼႆႉ”- ဝႃႈၼႆ။

ၸုမ်းၵျႃးၽႅၼ်ႉ ဢၼ်ပၢႆႈမႃးသွၼ်ႈဝႆႉ တီႈၸုမ်းပျီႇတူႉၸိတ်ႉ 758 ဝၢၼ်ႈပၢင်ႇ ဝဵင်းလၢႆးၶႃႈၼႆႉ ပၢႆႈမႃး တင်ႈ တႄႇ မိူဝ်ႈလိူၼ်ၼူဝ်ႊဝႅမ်ႊပိူဝ်ႊ 2023 မိူဝ်ႈၽွင်းၽႅၼ်ယၼ်ႇသိုၵ်း 1027 ၼၼ်ႉမႃးသေ ႁၢၼ်ႉတေႃႇထိုင် ယၢမ်းလဵဝ်။ ပူၼ်ႉမႃး မိူဝ်ႈၵၢင်လိူၼ်ဢွၵ်ႊထူဝ်ႊပိူဝ်ႊ 2024 ၼႆႉ ၸုမ်းၵျႃးၽႅၼ်ႉ ၸိူဝ်းၼၼ်ႉ လႆႈၽႄၵၼ် ၶၢႆႉၵႂႃႇယူႇဝႆႉတီႈမိူင်းၵိုင် ၵမ်ႈၽွင်ႈယဝ်ႉ ယွၼ်ႉမီးၶၢဝ်ႇလိုဝ်းၼိူဝ် Social Media ႁႅင်း – ၵူၼ်းပိုၼ်ႉတီႈလၢတ်ႈ။