ဝၢႆးသိုၵ်းယိုတ်းမိူင်း တႄႇမိူဝ်ႈႁူဝ်ပီ 2021 ၼၼ်ႉမႃး ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇယိုဝ်းသႂ်ႇ ၼႂ်းမိူင်းၶျၢင်းသေ ၵူၼ်းမိူင်းလူႉတၢႆ 108 ၵေႃႉယဝ်ႉၼႆ ၸုမ်းသုၼ်ႇလႆႈသုၼ်ႇပဵၼ်ၶျၢင်း CHRO ပိုၼ်ၽၢဝ်ႇ ဢွၵ်ႇဝႆႉ မိူဝ်ႈႁၢင်လိူၼ်ဢွၵ်ႊထူဝ်ႊပိူဝ်ႊပူၼ်ႉမႃးၼႆႉ ၼင်ႇၼႆ။

ၼႂ်းၵူၼ်းလူႉတၢႆ 108 ၵေႃႉၼၼ်ႉ လုၵ်ႈဢွၼ်ႇပႃး 29 ၵေႃႉ မၢတ်ႇၸဵပ်းထႅင်ႈ 230 ပၢႆ။

သိုၵ်းမၢၼ်ႈ ယိုတ်းမိူင်းမႃး ၼႂ်းၶၢဝ်းတၢင်း 3 ပီပၢႆၼႆႉ ၸႂ်ႉၶိူင်ႈမိၼ်တိုၵ်းသေ ပွႆႇမၢၵ်ႇသႂ်ႇၼႂ်းမိူင်းၶျၢင်း 515 ၵမ်း ႁူဝ်ၼပ်ႉမၢၵ်ႇ 1,200 ပၢႆ ႁိူၼ်းယေးဝတ်ႉဝႃးၽႃသိူဝ်ႇ လူႉၵွႆ 470 ပၢႆ ဝႃႈၼႆ။

ၼႂ်းမိူင်းၶျၢင်းၼႆႉ သိုၵ်းမၢၼ်ႈတင်း ၸုမ်းယိပ်းၵွင်ႈၵၢင်ႇပိုၼ်ႉတီႈ ပဵၼ်ပၢင်တိုၵ်းၵၼ်မႃးၶိူဝ်းယႂ်း ယွၼ်ႉပၢင်တိုၵ်းသေ ၵူၼ်းမိူင်းမွၵ်ႈ 5 သႅၼ် လႆႈပွႆႇပိုၼ်ႉတီႈ ပၢႆႈၽေးသိုၵ်းဝႆႉ။

ၼႂ်းလိူၼ်ဢွၵ်ႊထူဝ်ႊပိူဝ်ႊ ပူၼ်ႉမႃးၼႆႉၵူၺ်း သိုၵ်းမၢၼ်ႈ ၽဝ်ႁိူၼ်းယေးၵူၼ်းမိူင်း 30 လင် တီႈဝဵင်းမိၼ်းတႅတ်ႉ မိူင်း ၶျၢင်း၊ ဢိင်ၼိူဝ် လွင်ႈၼႆႉသေ ၾၢႆႇသိုၵ်းမၢၼ်ႈတႄႉ ဢမ်ႇႁၼ်ပိုၼ်ၽၢဝ်ႇ ပဵၼ်တၢင်းၵၢၼ်သင် – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။