ၸွမ်ၸိုင်ႈၵဝ်ႇ ၻူဝ်ႊၼေႃႊ ထရမ်ႉ Donald Trump ၼႆႉ လႆႈၶႅပ်းၵၢင်ၸႂ်ၼမ်ပူၼ်ႉ ၼၢင်းၶမ်ႊမလႃႊ ႁႄးရိသ်ႉ Kamala Harris သေ ပေႉပၢင်လိူၵ်ႈတင်ႈယဝ်ႉ ပဵၼ်မႃးထႅင်ႈၸွမ်ၸိုင်ႈမိူင်းဢမေႊရိၵၼ်ႊ ၵေႃႉထူၼ်ႈ 47 ဝႃႈၼႆ။
ပၢင်လိူၵ်ႈတင်ႈ မိူင်းဢမေႊရိၵၼ်ႊၼႆႉ ၸတ်းႁဵတ်းၵႂႃႇ မိူဝ်ႈဝၼ်းတီႈ 05/11/2024 ၸွမ်ၸိုင်ႈၵဝ်ႇ ၻူဝ်ႊၼေႃႊ ထရမ်ႉ ၼႆႉ ယူႇတီႈ ပႃႇတီႇ ရီႊပႃႊပလီၵၼ်ႊ ၶဝ်ႈလိူၵ်ႈတင်ႈ၊ ၶမ်ႊမလႃႊ ႁႄးရိသ်ႉသမ်ႉ တၢင် တူဝ်ပႃႇတီႇ တီႊမူဝ်ႊၵရႅတ်ႉတိတ်ႉသေ ၶဝ်ႈၶဵင်ႇ။ တီႈပၢင်လိူၵ်ႈတင်ႈၼၼ်ႉ ၻူဝ်ႊၼေႃႊ ထရမ်ႉ လႆႈၶႅပ်း သဵင် 292 ၶႅပ်းသေ ဢွင်ႇပေႉပၢင်လိူၵ်ႈတင်ႈၶိုၼ်း။
ဝၢႆးပၢင်လိူၵ်ႈတင်ႈယဝ်ႉ မၼ်းၸၢႆးလၢတ်ႈဝႃႈ ပဵၼ်လွင်ႈလႅၵ်ႈလၢႆႈ တီႈၽႂ်ဢမ်ႇယၢမ်ႈႁၼ်မႃးသေပွၵ်ႈ၊ ထႅင်ႈၾၢႆႇၼိုင်ႈၵေႃႈ ပဵၼ်လွင်ႈလႅၵ်ႈလၢႆႈၵၢၼ်မိူင်း ဢၼ်ယိုင်ႈယႂ်ႇသုတ်းယဝ်ႉ ဝႃႈၼႆ။
ၶမ်ႊမလႃႊ ႁႄးရိသ်ႉ ၽူႈၶဵင်ႇၵၼ်တင်း ၻူဝ်ႊၼေႃႊ ထရမ်ႉၵေႃႈ ဢွၵ်ႇမႃးလၢတ်ႈဝႃႈ –“တီႈပၢင်လိူၵ်ႈတင်ႈၼႆႉ မၼ်း ၼၢင်း သုမ်းၵႂႃႇယဝ်ႉသေတႃႉ တႃႇလွင်ႈလွတ်ႈလႅဝ်း၊ သုၼ်ႇလႆႈတိုဝ်ႉတၢင်း၊ လွင်ႈၽဵင်ႇပဵင်း မိူင်းဢမေႊရိၵၼ်ႊၼႆႉ မၼ်းၼၢင်းတေသိုပ်ႇတေႃႇသူႈၵႂႃႇထႅင်ႈယူႇ၊ တႃႇၵူၼ်းၼုမ်ႇ ၸိူဝ်းပၼ်ႁႅင်း မၼ်းၼၢင်းၵေႃႈ ယႃႇပေၸႂ်တူၵ်း တေသိုပ်ႇႁူမ်ႈမိုဝ်းၵွင်ႉသၢၼ်ၵၼ်ၵႂႃႇထႅင်ႈ” – ဝႃႈၼႆ။
ပၢင်လိူၵ်ႈတင်ႈ မိူင်းဢမေႊရိၵၼ်ႊၼႆႉ ၸတ်းႁဵတ်း 4 ပီလႂ် ၼိုင်ႈပွၵ်ႈ၊ ယၢမ်းလဵဝ် ဢၼ်တိုၵ်ႉႁပ်ႉပဵၼ် ၸွမ်ၸိုင်ႈမိူင်း ဢမေႊရိၵၼ်ႊၼႆႉ ပဵၼ် ၵျူဝ်း ပၢႆႊတႅၼ်ႊ Joe Biden ၊ ၻူဝ်ႊၼေႃႊ ထရမ်ႉ Donald Trump ဢၼ်ပေႉပၢင်လိူၵ်ႈတင်ႈ ပဵၼ်မႃးၸွမ်ၸိုင်ႈ ၵမ်းၼႆႉသမ်ႉ တႄႇလိူၼ်ၵျႅၼ်ႊၼိဝ်ႊရီႊ ပီ 2025 တေလႆႈႁပ်ႉပုၼ်ႈၽွၼ်းၸွမ်ၸိုင်ႈ ဢွၼ်ႁူဝ်မိူင်းဢမေႊရိၵၼ်ႊၵႂႃႇ။
လိူဝ်ၼၼ်ႉ ၼႂ်းသၽႃးၽၢၵ်ႈၼိူဝ် မိူင်းဢမေႊရိၵၼ်ႊၼၼ်ႉၵေႃႈ ၽူႈတႅၼ်း ပႃႇတီႇ ရီႊပႃႊပလီၵၼ်ႊ လႆႈဝႆႉတီႈယူႇ 100 လႂ် 51 တီႈယဝ်ႉ ဝႃႈၼႆ။
