ယၢမ်းလဵဝ် ပလိၵ်ႈမၢၼ်ႈ ပႂ်ႉၵူတ်ႇထတ်းၵႃး/ ရူတ်ႉၶိူင်ႈ ၸိူဝ်းဢမ်ႇမီးဝႂ်ၶွၼ်ႇ (License) ႁၢဝ်ႈႁႅင်း တီႈဝဵင်းတူၼ်ႈတီး သင်တီႉလႆႈ ၵႃးၼိုင်ႈလမ်း လႆႈပၼ်ဢမ်ႇယွမ်း 10 သႅၼ်ပျႃး။

တႄႇဢဝ် ဝၼ်းတီႈ 01/11/2024 ၼႆႉမႃး ၾၢႆႇၽွင်းငမ်းတင်း ပလိၵ်ႈမၢၼ်ႈ တႂ်ႈသိုၵ်းမၢၼ်ႈ ၵုမ်းၵမ် ႁူမ်ႈၵၼ် ပႂ်ႉၵူတ်ႇထတ်း ၸႅတ်ႈထၢမ်ၵႃး/ ရူတ်ႉၶိူင်ႈ ၸွမ်းသဵၼ်ႈတၢင်း ၼႂ်းဝဵင်းတူၼ်ႈတီး ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ လွင်ႈၵႂႃႇမႃးႁႃၵိၼ် ယၢမ်းလဵဝ် ဢၼ်တီႉၺွပ်းဝႆႉ ရူတ်ႉၶိူင်ႈ/ ၵႃး ဢမ်ႇယွမ်းပၢၵ်ႇယဝ်ႉ ဝႃႈၼႆ။  

ၵူၼ်းတူၼ်ႈတီး ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပလိၵ်ႈမၢၼ်ႈၶဝ် ပႂ်ႉၵူတ်ႇထတ်းၸွမ်း သဵၼ်ႈတၢင်း ၽႄၼႂ်းၵၢင်ဝဵင်း၊ သဵၼ်ႈတၢင်းလဵပ်ႈဝဵင်းၾၢႆႇဢွၵ်ႇ၊ ၾၢႆႇတူၵ်းလႄႈ ၸွမ်းတၢင်းၶဝ်ႈဢွၵ်ႇဝဵင်း ၸိူဝ်းၼႆႉ ၵူႈဝၼ်း။ ပေႃး ႁၼ် ၵူၼ်းၶီႇရူတ်ႉၶိူင်ႈၵေႃႈ ႁွင်ႉၸႅတ်ႈထၢမ် တီႉၺွပ်းရူတ်ႉ ဢၼ်ဢမ်ႇမီးဝႂ် (လၢႆႊ သိၼ်ႊ)။ ၸိူဝ်းဢမ်ႇတိုဝ်းမၢၵ်ႇႁူဝ်ရူတ်ႉၶိူင်ႈ၊ ဢမ်ႇသႂ်ႇမၢၼ်ႇၸမ်ႈရူတ်ႉၶိူင်ႈ ၸိူဝ်းၼႆႉ။ ပေႃးမႃးၼပ်ႉ တူၺ်း ဢၼ်ၶဝ်တီႉၺွပ်းဝႆႉၼႆႉ ဢမ်ႇယွမ်းပၢၵ်ႇလမ်းယဝ်ႉ”- ဝႃႈၼႆ။

လိူဝ်သေ ၵူတ်ႇထတ်း တီႉၺွပ်းရူတ်ႉၶိူင်ႈယဝ်ႉ မိူၼ်ၼင်ႇ ၵႃးၸိူဝ်းၼႆႉၵေႃႈ ၵူတ်ႇထတ်း တီႉၺွပ်းထႅင်ႈ ႁၢဝ်ႈႁႅင်း။ ၵမ်ႈၼမ် ဢၼ်ၵူတ်ႇထတ်းႁႅင်းတႄႉ ဝႂ်ရူတ်ႉ (ၶွၼ်ႇ) ၸိူဝ်းၼႆႉ။ သင်ပဵၼ်ရူတ်ႉၶိူင်ႈ ဢမ်ႇမီးဝႂ်ၸိုင် ၼိုင်ႈလမ်းလႂ် လႆႈထုတ်ႇဢွၵ်ႇ 2 သႅၼ်ပျႃး။ ပေႃးပဵၼ်ၵႃးသမ်ႉ ၼိုင်ႈလမ်းလႂ် ဢမ်ႇယွမ်း 10 သႅၼ် ပျႃး။ ယၢမ်းလဵဝ် တီႈႁူင်းပလိၵ်ႈမၢၼ်ႈ ဝဵင်းတူၼ်ႈတီးၼႆႉ ရူတ်ႉၶိူင်ႈ/ ၵႃး ဢၼ်ၶဝ်တီႉၺွပ်းဝႆႉၼၼ်ႉ တိုၵ်ႉမီးထႅင်ႈၼမ်။

ၵႃး/ ရူတ်ႉၶိူင်ႈ ၵူၼ်းမိူင်း ဢၼ်ၺႃးတီႉၺွပ်းၼႆႉ ၵမ်ႈၼမ် တေပဵၼ်ၵူၼ်းမိူင်း ၸိူဝ်းယူႇၸွမ်းသၢပ်ႇဝဵင်း၊ ၸွမ်းဝၢၼ်ႈ ၼွၵ်ႈၼႃးပၢင်ႇ ၸိူဝ်းၼႆႉ။ လိူဝ်ၼၼ်ႉ တႃႇတေႁဵတ်းဝႂ်ရူတ်ႉ (license) ၵေႃႈ မီးလွင်ႈယၢပ်ႇ။ ယွၼ်ႉဝႃႈ ယၢမ်းလဵဝ် ၾၢႆႇပလိၵ်ႈမၢၼ်ႈ (ကညန) ၶဝ် ဢမ်ႇပိုတ်ႇႁဵတ်းပၼ် ဝႂ်ရူတ်ႉလႄႈ ၵွပ်ႈၼႆ ႁဵတ်းႁႂ်ႈ ၵူၼ်းမိူင်းထူပ်းတၢင်းယၢပ်ႇၽိုတ်ႇ ႁႅင်း ၼႆယဝ်ႉ။

ထႅင်ႈၾၢႆႇၼိုင်ႈၵေႃႈ တီႈဝဵင်းတူၼ်ႈတီးၼႆႉ ၾၢႆႇသိုၵ်းမၢၼ်ႈ ပၼ်ႁႅင်းဢီး ၵူၼ်းမိူင်း ႁႂ်ႈၸတ်းႁဵတ်းပွႆးႁူင်းၾႆးမိၼ် ၶိုၵ်ႉယႂ်ႇ ၼႂ်းဝၼ်းတီႈ 09-15/11/2024 ၼႆႉ။ ၵွပ်ႈၼႆလႄႈ ပလိၵ်ႈမၢၼ်ႈၶဝ် ဢဝ်တိုဝ်ႉတၢင်းၼႆႉသေ ပႂ်ႉၵူတ်ႇထတ်း ၸွမ်းသဵၼ်ႈတၢင်းၼႂ်းဝဵင်း ၸိူဝ်းၼႆႉမႃး ႁၢဝ်ႈႁႅင်း။ ႁဵတ်းႁႂ်ႈၵူၼ်းမိူင်းပိုၼ်ႉတီႈ ဢွၼ်ၵၼ် မႆႈၸႂ်လွင်ႈႁူမ်ႇလူမ်ႈ ၽွင်းၵႂႃႇမႃး ၸွမ်းသဵၼ်ႈတႃႈသၢႆတၢင်း။