ဢူးမိၼ်ႉၵျၢႆႇ ၽွင်းလူင်ၾၢႆႇႁႅင်းၵူၼ်းလႄႈ ၾၢႆႇၵူၼ်းၶဝ်ႈဢွၵ်ႇမိူင်း သိုၵ်းမၢၼ်ႈ ၸီႉသင်ႇ ႁႂ်ႈၽူႈႁၢပ်ႇၵၢၼ်လဝၵ တီႈၶူင်ႇႁိူဝ်းမိၼ်တႃႈၵုင်ႈ တိူဝ်းၶဵင်ႈၶႅင်ၵူတ်ႇထတ်း ဢမ်ႇပၼ်ၵူၼ်းမိူင်း ၸိူဝ်းသဵၼ်ႈၸိုဝ်ႈၶဝ်ႈပႃးၼႂ်း blacklist ဢွၵ်ႇၼွၵ်ႈမိူင်း – သိုၵ်းမၢၼ်ႈပိုၼ်ၽၢဝ်ႇ ၼႂ်းဝၼ်းတီႈ 05/11/2024 ၼႆႉၼင်ႇၼႆ။
လွင်ႈၸိူင်ႉၼႆ မိူဝ်ႈဢွၼ်တၢင်းယၢမ်ႈမီးမႃးယူႇသေတႃႉ ယၢမ်းလဵဝ် တိူဝ်းၸီႉသင်ႇ ႁႂ်ႈၶဵင်ႈၶႅင် ၵၢၼ်ၵူတ်ႇထတ်းထႅင်ႈ – ဝႃႈၼႆ။
မေႃယႃ ဢၼ်ႁဵတ်းဝႆႉ CDM ၵေႃႉၼိုင်ႈလၢတ်ႈဝႃႈ သိုၵ်းမၢၼ်ႈ တင်ႈၸႂ် ၸႂ်ႉၵူႈလၢႆးတၢင်းသေ ၶႂ်ႈပၼ်ႁႅင်းဢီးႁႂ်ႈၶဝ်ႈ ႁၢပ်ႇၵၢၼ်ၶိုၼ်းၵူၺ်း ဝႃႈၼႆ။
ၵူၼ်းၸိူဝ်းသဵၼ်ႈၸိုဝ်ႈၶဝ်ႈပႃးၼႂ်း blacklist ၼႆႉ ၺႃးသိုၵ်းမၢၼ်ႈပိၵ်ႉဢိုတ်း ဢမ်ႇပၼ်ၶႂၢင်ႉတေႃႇဢႃယု ဝႂ်ၶၢမ်ႈမိူင်း (Passport) လႄႈ ဝီႊသႃႊ (Visa) ၸိူဝ်းၼႆႉ။
ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ ၽူႈႁၢပ်ႇၵၢၼ်လူင်ပွင်ၸိုင်ႈ ၸိူဝ်းသၢၼ်ၶတ်း သိုၵ်း မၢၼ်ႈသေ ႁဵတ်း CDM ၼၼ်ႉ ၺႃးသိုၵ်းမၢၼ်ႈ ဢဝ်သႂ်ႇၼႂ်းသဵၼ်ႈၸိုဝ်ႈမၢႆလမ် (blacklist) ဝႆႉ။ ဝၢႆးလင်ၼၼ်ႉ တီႈၶူင်ႇႁိူဝ်းမိၼ်ၵူႈမိူင်းမိူင်း ဢၼ်မီးတီႈဝဵင်းတႃႈၵုင်ႈ၊ တႃႈလိူဝ်ႇ ၸိူဝ်းၼႆႉ ဢမ်ႇပၼ်ၶႂၢင်ႉဢွၵ်ႇၼွၵ်ႈမိူင်း၊ မၢင်ၸိူဝ်း ၺႃးတီႉၺွပ်းၵေႃႈမီး – ၼႆယဝ်ႉ။
လိူဝ်ၼၼ်ႉ ဝၢႆးလင်မၵ်းမၼ်ႈ ၸႂ်ႉတိုဝ်း မၢႆမီႈပၵ်းပိူင်ႁၢပ်ႇၵၢၼ်သိုၵ်း ၼႂ်းလိူၼ်ၾႅပ်ႊပိဝ်ႊရီႊယဝ်ႉ သိုၵ်း မၢၼ်ႈ မီးလွင်ႈႁႄႉႁၢမ်ႈ ၵူၼ်းၼုမ်ႇၸၢႆး ဢႃယု ၼႂ်းၵႄႈ 18 ပီ ထိုင် 35 ပီ ဢမ်ႇပၼ်ဢွၵ်ႇၼွၵ်ႈမိူင်း – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ