ၸုမ်းၸွႆႈထႅမ်ၵူၼ်းတူၵ်းၶွၵ်ႈ ၵၢၼ်မိူင်း AAPP ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 04/11/2024 ၼႆႉဝႃႈ ဝၢႆးလင် သိုၵ်းမၢၼ်ႈ ယိုတ်းမိူင်းမႃး ၵူၼ်းမိူင်းမၢၼ်ႈ ပတ်းပိုၼ်ႉ ၺႃးၶႃႈတၢႆ 5,919 ၵေႃႉ ဝႃႈၼႆ။
ၵူၼ်းမိူင်း ၺႃးသိုၵ်းမၢၼ်ႈၶႃႈတၢႆ ၼမ်သုတ်းၼႆႉ ပဵၼ်ၼႂ်းတိူင်းတႃႈၵုင်ႈ (ယၼ်ႇၵုင်ႇ) သေ ၼႂ်းမိူင်းမွၼ်းသမ်ႉ ပဵၼ်ထီႉသွင်။
တႄႇဝၼ်းတီႈ 01/02/2021 ၶၢဝ်းတၢင်း 3 ပီပၢႆ ၸမ် 4 ပီမႃးၼႆႉ သိုၵ်းမၢၼ်ႈ ပလိၵ်ႈမၢၼ်ႈ တီႉၺွပ်းၵူၼ်းမိူင်းႁူမ်ႈတုမ်ပတ်းပိုၼ်ႉမီး 27,631 ၵေႃႉ။ ၼႂ်းၼၼ်ႉ 6,500 ပၢႆ ပွႆႇလွတ်ႈမႃးၶိုၼ်းယဝ်ႉသေတႃႉ တိုၵ်ႉၺႃးၵုမ်းၶင်ဝႆႉ 2 မိုၼ်ႇပၢႆ။
လိူဝ်ၼၼ်ႉ ၼႂ်းၶၢဝ်းတၢင်း 3 လိူၼ်မႃးၼႆႉၵူၺ်း ၵူၼ်းမိူင်း ဢၼ်ၺႃးမၢပ်ႇၼႄးဝႃႈ သၢၼ်ၶတ်းသိုၵ်းမၢၼ်ႈသေ သေႃႇသူၼ်း ႁဵတ်းႁႂ်ႈဝၢၼ်ႈမိူင်းဢူၼ်ဢၢၼ်မေႃးမႄးၼႆလႄႈ ၺႃးတီႉၺွပ်း 140 ပၢႆ ဝႃႈၼႆ။
ၵမ်ႈၼမ် ဢၼ်ၺႃးသိုၵ်းမၢၼ်ႈ တီႉၺွပ်းၼႆႉ ပဵၼ်ၵူၼ်းမိူင်း ၸိူဝ်းတၢင်ႇ Post တီႈ TikTok ၼႆ – Myanmar Internet Project ႁၢႆးငၢၼ်းဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ