တပ်ႉသိုၵ်းလွတ်ႈၶႅဝ်းၶၢင် KIA ပိုတ်းယိုဝ်း သိုၵ်းမၢၼ်ႈသေ ယိုတ်းလႆႈဝဵင်းၽီမေႃ ဢၼ်မီးတီႈလႅၼ်လိၼ်မၢၼ်ႈ – ၶႄႇ ၼႂ်းဝၼ်းတီႈ 02/11/2024 လွင်ႈၼႆႉ ၶၢဝ်ႇ People’s Spring တႅမ်ႈတၢင်ႇဝႆႉဝႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ပိုတ်းယိုဝ်းသိုၵ်းမၢၼ်ႈသေ ယိုတ်းလႆႈ 86 ဝဵင်းယဝ်ႉ ဝႃႈၼႆ။
ယူႇတီႈ သိုၵ်းၶၢင် KIA သေ ၼႂ်းၶၢဝ်းတၢင်းလိူၼ်ပၢႆၼႆႉၵူၺ်း ယိုတ်းလႆႈဝဵင်းၶျီႊၽူၺ်ႊ၊ သေႃႉလေႃႇလႄႈ ဝဵင်းပၢင်ဝႃႈ လိုၼ်းသုတ်းၼႆႉ ယိုတ်းလႆႈဝဵင်းၽီမေႃ။ သိုၵ်းၶၢင် ပိုၼ်ၽၢဝ်ႇဝႃႈ – ၼႂ်းပီ 2024 တင်ႈတႄႇ လိူၼ်ၵျုၼ်ႊမႃး သိုၵ်းၶၢင် ယိုတ်းလႆႈတပ်ႉသိုၵ်း၊တပ်ႉပၢင်သဝ်း သိုၵ်းမၢၼ်ႈလႄႈ ပျီႇတူႉၸိတ်ႉ တႂ်ႈသိုၵ်းမၢၼ်ႈ တင်းၼမ်လႄႈ – လႆႈဝႃႈ ဢၼ်သိုၵ်းၶၢင် ယိုတ်းလႆႈယဝ်ႉတူဝ်ႈလီငၢမ်း ၼႂ်းမိူင်းၶၢင်ၼႆႉ မီးၵႂႃႇ 13 ဝဵင်းယဝ်ႉ ဝႃႈၼႆ။
ၸုမ်းလုၵ်ႉၽိုၼ်ႉ သိုၵ်းမၢၼ်ႈၶဝ် ႁဵတ်း Info- Graphic ဢွၵ်ႇပိုၼ်ၽၢဝ်ႇဝႆႉတႄႉ တေႃႇထိုင် ဝၼ်းမိူဝ်ႈၼႆႉ ယိုတ်းလႆႈ 86 ဝဵင်းယဝ်ႉဝႃႈၼႆသေတႃႉ ဢၼ်ယိုတ်းလႆႈဝဵင်းသေ ဢမ်ႇပိုၼ်ၽၢဝ်ႇၵေႃႈမီးလႄႈ လႅပ်ႈတေဢမ်ႇၵႃးၼႆႉ။ လိူဝ် ၼၼ်ႉ ပေႃးယိုတ်းဝဵင်းၼႆ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇတိူဝ်ႉသႂ်ႇႁိူၼ်းၵူၼ်း မိူင်းတိၵ်းတိၵ်းလႄႈ ၼႂ်းမိူင်းမၢၼ်ႈတူင်ႈပဵင်း မၢင်ဝဵင်းၼႆႉ သိုၵ်းမၢၼ်ႈ ဢမ်ႇမီးၼႂ်းဝဵင်းယဝ်ႉသေတႃႉ သိုၵ်းၸၢဝ်းၶိူဝ်း ဢမ်ႇၶဝ်ႈဝဵင်းသေ ယူႇဝႆႉတၢင်းၼွၵ်ႈဝဵင်းၵူၺ်း ၼႆၵေႃႈမီး – ဝႃႈၼႆ။
ၼႂ်းမိူင်းတႆးပွတ်းႁွင်ႇ တင်းမူတ်း 23 ၸႄႈဝဵင်းၼၼ်ႉၵေႃႈ – ဢၼ်ၸုမ်းယိပ်းၵၢင်ႇၸၢဝ်းၶိူဝ်း ပႆႇယိုတ်းလႆႈၼႆႉ ၵိုတ်း 3 ၸႄႈဝဵင်း – တၢင်ႉယၢၼ်း၊ မိူင်းယႆလႄႈ မူႇၸေႊ ၵူၺ်းယဝ်ႉ။ လိူဝ်ၼၼ်ႉတႄႉ ၸုမ်းဢူၺ်းလီ 3 ၸုမ်း ပိုၼ်ၽၢဝ်ႇယိုတ်းလႆႈဝႆႉသေ ဢၼ်ပဵၼ်မၢၼ်ႈပဵင်း၊ ၼမ်ႉၽၵ်းၵႃ ၸိူဝ်းၼႆႉတႄႉ သိုၵ်းၶၢင် ယိုတ်းလႆႈဝႆႉ။ တၢင်းမိူင်းရၶႅင်ႇတႄႉ သိုၵ်းရၶႅင်ႇ ယိုတ်းလႆႈဝႆႉ ဝဵင်းဢၢမ်း၊ မွင်းတေႃး၊ ၵႂႃႉလႄႈ တွင်ႇၵူၵ်ႉ ၸိူဝ်းၼႆႉဝႆႉ။
