တႃႇႁႂ်ႈပူၼ်ႉလွတ်ႈၽေးသၽႃႇဝ ၼႆသေ ၵူၼ်းမိူင်းဝဵင်းႁူဝ်ပူင်းၸိုင်ႈတႆးပွတ်းၸၢၼ်း ၸတ်းႁဵတ်းပၢင်ပွႆးလူႇတၢၼ်း တီႈထမ်ႈၸၢင်ႉ ဝဵင်းႁူဝ်ပူင်း မီးၵူၼ်းမိူင်းထုင်ႉဝဵင်းႁူဝ်ပူင်း သီႇသႅင်ႇ မႃးၶဝ်ႈႁူမ်ႈတင်းၼမ်။
ပၢင်ပွႆးလူႇတၢၼ်း တီႈထမ်ႈၸၢင်ႉၼႆႉ ၸတ်းႁဵတ်းမိူဝ်ႈဝၼ်းတီႈ 31/10/2024 ။ ပီႈၼွင်ႉ ၸၢဝ်းပဢူဝ်းလႄႈၸၢဝ်းတႆး ၸၢဝ်းမၢၼ်ႈ ၵူၼ်းမိူင်းတၢင်းထုင်ႉ လွႆမႆ (မႄးၼႄႇတွင်ႇ)၊ ၸိူဝ်းထူပ်းၽေးၼမ်ႉ ၽေးသိုၵ်းသိူဝ်ၸိူဝ်းၼႆႉ မႃးၶဝ်ႈႁူမ်ႈၵိုၼ်းၶွၼ်ႈ။
ယိူင်းဢၢၼ်းတႃႇႁႂ်ႈပူၼ်ႉၽေးသၽႃႇဝ ၼႆသေ ၸတ်းပွႆးယႂ်ႇၵူၼ်းလူင်။ ၵူၼ်းၼုမ်ႇပိုၼ်ႉတီႈတႄႉလၢတ်ႈဝႃႈ ၽိူဝ်ႇႁဵတ်းပွႆးၵိုၼ်းၸိူင်ႉၼႆ တႃႉႁဵတ်းၵၢၼ်ပူၵ်းပွင် ပိုၼ်ႉတီႈ ၸိူဝ်းထူပ်းၽေး ၵူႈၸိူဝ်ႉၵူႈလွင်ႈၼၼ်ႉလႃႈဝႃႈၼႆ ။
ၼၢင်းယိင်းၼုမ်ႇ ၸၢဝ်းပဢူဝ်း ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ-“ပွႆးတႆႈတဵၼ်းယွၼ်းသူးတႃႇႁႂ်ႈၼမ်ႉယႃႇထူမ်ႈၼႆဢေႃႈ။ ၵူၺ်းၵႃႈၶႃႈႁဝ်းၶဝ်ႁၼ်ထိုင်တႄႉ – ၵၢပ်ႈပၢၼ်ဝၼ်းမိူဝ်ႈၼႆႉၵူၼ်းမိူင်းထူပ်းတၢင်းယၢပ်ႇၽိုတ်ႇၼႃႇ ။ တႃႉႁဝ်းၶႃႈမႃးပူၵ်းပွင် ႁိူၼ်းယေး လႄႈၵူၼ်းပိုၼ်ႉတီႈ ဢၼ်ထူပ်းၽေးၸိူဝ်းၼၼ်ႉလႃႈ။ ၵူၼ်းတၢင်းၼွၵ်ႈၵေႃႈပိူၼ်ႈတေႁၼ်ထိုင်ႁဝ်းဝႃႈ – ထူပ်းလွင်ႈယၢပ်ႇၽိုတ်ႇပေႃးထၢၼ်ႇၼႆႉ ယင်းတိုၵ်ႉၸၢင်ႈႁဵတ်းပွႆးယူႇ – ၼႆ မၼ်းဢမ်ႇပေႃးၶႅမ်ႉ “- ဝႃႈၼႆ။
ပဵၼ်ၸဝ်ႈသြႃႇ ၸဝ်ႈတူၼ်ၶူးလူင်ၶဝ်ၸဝ်ႈ ဢၼ်ပဵၼ် ၾၢႆႇၸတ်းၵၢၼ် လုမ်းလႃး လႄႈၵေႃးပၵ ထမ်ႈၸၢင်ႉ ဢွၼ်ၼမ်းၸတ်းႁဵတ်းပၢင်ပွႆးတႆႈတဵၼ်းၼႆႉ- ၵူၼ်းမိူင်းဝဵင်းႁူဝ်ပူင်းလၢတ်ႈၼင်ႇၼႆ။
ၽူႈၸၢႆးၵူၼ်းမိူင်းဢၼ်လႆႈၵႂႃႇလူႇတၢၼ်းတီႈထမ်ႈၸၢင်ႉ ၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ-“ၶဝ်လူႇၾႆးတဵၼ်း ၾႆးမွၵ်ႇမူဝ် ႁွႆႈပုင်းၾႆး တီႈထမ်ႈၸၢင်ႉၼၼ်ႉ သမ်ႉပေႃးလႅင်းၵႂႃႇမူတ်းဢေႃႈ။ၵိုၼ်းၵေႃႈၵိုၼ်းၼႃႇၶႃႈ။ ၶဝ်ယုမ်ႇယမ်ဝႃႈ လူႇတၢၼ်းပုင်းၾႆး ၾႆးတဵၼ်းၼႆႉ တေလွတ်ႈၽေးသၽႃႇဝ ၼႆဢေႃႈ။ ပဵၼ်တၢင်းယုမ်ႇယမ်ၶဝ်ၶႃႈၼေႃႈ”- ဝႃႈၼႆ။
ပျီႇတူႉၸိတ်ႉပဢူဝ်း PNO သမ်ႉ ဢဝ်ႁူမ်ႇလူမ်ႈပၼ်ၸွမ်းသဵၼ်ႈတၢင်းလႄႈၸွမ်းထမ်ႈၸၢင်ႉ တီႈပၢင်ပွႆးၸိူဝ်းၼၼ်ႉ။
တီႈၼႂ်းၸႄႈဝဵင်းႁူဝ်ပူင်းၼႆႉမိူဝ်ႈလိူၼ်သႅပ်ႉထႅမ်ႊပိူဝ်ႊထူၼ်ႈ 9 ပူၼ်ႉမႃး ယွၼ်ႉၽေးသၽႃႇဝ ၼမ်ႉထူမ်ႈၼမ်ႉၼွင်း လိၼ်လွႆၵူၼ်ႇ သေလိၼ်သူၼ်ႁႆႈၼႃးႁိူၼ်းယေးၵူၼ်းမိူင်းလူႉၵွႆတင်းၼမ်တင်းလၢႆ။ သဵၼ်ႈတႃႈသၢႆတၢင်းၵေႃႈၶၢတ်ႇ ၵွႆ။ မၢၵ်ႇၶဝ်ႈတဝ်ႈၼမ်ႉလူႉသုမ်းၼမ် ။ တီႈထမ်ႈၸၢင်ႉၵေႃႈၼမ်ႉထူမ်ႈၼမ်ႉၼွင်းႁၢဝ်ႈႁႅင်း ။ လူႉသုမ်းၵွႆၼမ်။ လူဝ်ႇတၢင်းၸွႆႈထႅမ်တင်းၼမ် တင်းလၢႆ။ ပႆႇမီးလွင်ႈပူၵ်းပွင်ၶိုၼ်းသင်။
ၽွင်းၸဝ်ႈၵူဝ်ႇယိၼ်ႇလေး (ၸဝ်ႈသၢင်ႇဢွၼ်ႇ) ပႆႇလူႉလွၼ်ႇယွၼ်ႉတၢင်းပဵၼ်ၶူဝ်ႊဝိတ်ႉၼၼ်ႉတႄႉ တီႈထမ်ႈၸၢင်ႉၼႆႉၵူၼ်းၵိုၼ်းဝႆႉယူႇၵူႈၶၢဝ်းယၢမ်း။ တၵ်ႉၵႃႇသတ်ႉထႃးတီႈၸမ်တီႈၵႆမႃးလူႇမႃးဝႆႈ။ ပၢင်ပွႆးတႆႈတဵၼ်း ပွႆးလိူၼ်သီႇ ပွႆးၵဵဝ်ႇၵပ်းၾိင်ႈထုင်း ၵႆႉၸတ်းႁဵတ်းတႃႇသေႇ။ ၽွင်းၼၼ်ႉၵူၼ်းၵေႃႈၵိုၼ်းၶွၼ်ႈယႂ်ႇလူင်။
