ၽွင်းဝၢၼ်ႈမိူင်း ဢမ်ႇၼိမ်သဝ်း သိုၵ်းမၢၼ်ႈ ဢဝ်ၶိူင်ႈမိၼ် မိူဝ်းပွႆႇမၢၵ်ႇၼႂ်း မိူင်းတႆးပွတ်းႁွင်ႇၵူႈဝၼ်း တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းသမ်ႉ သိုၵ်းမၢၼ်ႈ တဵၵ်းၶိၼ်ႁဵတ်းပွႆး ၸီႉသင်ႇ ႁႂ်ႈၵူၼ်းမိူင်းၸတ်းပွႆး လိူၼ်သိပ်းသွင် ႁူင်း ၾႆးမိၼ် ၵိုၼ်းၶွၼ်ႈၼႆလႄႈ ၵူၼ်းမိူင်းမၢၼ်ႈတူင်ႈပဵင်း သိုပ်ႇၾူၼ်းမႃးၶၢတ်ႈႁွင်ႈဝႆႉ လူင်ႈၼႃႈ – ဝႃႈၼႆ။
ၼႂ်းႁၢင်လိူၼ်ဢွၵ်ႊထူဝ်ႊပိူဝ်ႊ သိုၵ်းမၢၼ်ႈဢွၵ်ႇလိၵ်ႈ သင်ႇႁႂ်ႈၵူၼ်းမိူင်းဝဵင်းတူၼ်ႈတီး ဢွၼ်ၵၼ်ႁဵတ်းပွႆး ႁူင်းၾႆးမိၼ်ၵိုၼ်းၶွၼ်ႈ ၼႂ်းဝၼ်းတီႈ 09/11/2024 တေႃႇထိုင် 15/11/2024 ၶၢဝ်းတၢင်း 7 ဝၼ်း ထပ်းၵၼ် ဝႃႈၼႆ။
တႃႇႁဵတ်းပွႆးႁူင်းၾႆးမိၼ်ၼႆႉ ၵူၼ်းမိူင်းဝဵင်းတူၼ်ႈတီး ၵမ်ႈၼမ် ဢမ်ႇႁၼ်လီ ဢမ်ႇၽွမ်ႉၸွမ်းသေတႃႉ ဢမ်ႇလိူဝ်လႆႈ ၶေႃႈၸီႉသင်ႇ ၸဝ်ႈဢႃႇၼႃႇသိုၵ်း။ ၵူၺ်းၵႃႈ ၵူၼ်းမိူင်းမၢၼ်ႈတူင်ႈပဵင်း ပိုၼ်ႉတီႈဢမ်ႇထူပ်း ၽေးသိုၵ်းသိူဝ် ၸိူဝ်း ၼၼ်ႉတႄႉ သင်ႇၶၢတ်ႈႁွင်ႈႁူင်းႁႅမ်းဝႆႉလူင်ႈၼႃႈ – ယၢမ်းလဵဝ် ႁူင်းႁႅမ်း ၼႂ်းဝဵင်းတူၼ်ႈတီး သမ်ႉပေႃးတဵမ်မူတ်းယဝ်ႉၼႆ ၼၢင်းသၢဝ် – ဢႃယုသႅၼ်းပၢၼ် 30 ပီပၢႆ ႁဵတ်းၵၢၼ်တီႈႁူင်းႁႅမ်း ၸိုဝ်ႈယႂ်ႇဢၼ်ၼိုင်ႈ ၼႂ်းဝဵင်းတူၼ်ႈတီး လၢတ်ႈၼင်ႇၼႆ။
“ပိူၼ်ႈသင်ႇၶၢတ်ႈဝႆႉ ၼႂ်းလိူၼ်တေမႃးၼႆႉတႄႉ ႁွင်ႈတဵမ်မူတ်းယဝ်ႉ၊ ဢမ်ႇၵိုတ်းသေႁွင်ႈ၊ ဢမ်ႇၶၢတ်ႇ သေဝၼ်းယဝ်ႉ၊ ၼႂ်းၶၢဝ်းတၢင်းဝၼ်းပွႆး 7 ဝၼ်းၼႆႉ ယိင်ႈၶႅၼ်းဢမ်ႇမီးႁွင်ႈ တႃႇၶၢတ်ႈပၼ်ယဝ်ႉၶႃႈ။ ၵႃႈၶၼ်ႁွင်ႈ ၵူႈပွၵ်ႈၼိုင်ႈႁွင်ႈ 20,000 ပျႃး ၸိူဝ်းၼၼ်ႉ။ ယၢမ်းလဵဝ် ပဵၼ်ၵႂႃႇ 68,000 ပျႃးယဝ်ႉ” – ဝႃႈၼႆ။
ၵူၺ်းၵႃႈ ၽႂ်တေမႃးလိုဝ်ႈမႃးၼွၼ်းတီႈႁူင်းႁႅမ်း တေလႆႈပၼ်မၢႆၾၢင် ၶႅပ်းႁၢင်ႈ ၸိုဝ်ႈသဵင်လႄႈ ပိုၼ်းတူဝ် ၸဝ်ႈၵဝ်ႇ – တႃႇတၢင်ႇသဵၼ်ႈမၢႆၶႅၵ်ႇ တီႈပလိၵ်ႈၼႆလႄႈ ႁဵတ်းႁႂ်ႈၵူၼ်းမိူင်းတႆး တၢင်ႇၵေႃႉ ယၢပ်ႇၽိုတ်ႇ။
သိုၵ်းမၢၼ်ႈ ၸီႉသင်ႇဝႃႈ ဝဵင်းတူၼ်ႈတီး 22 ပွၵ်ႉၼႆႉ တေလႆႈႁူမ်ႈၵၼ်ႁဵတ်း ႁူင်းၾႆးမိၼ်ႁၢင်ႈလီ ယၢမ်းၵၢင်ၶိုၼ်း သႅၼ်းမီးမွၵ်ႇၾႆး 4 လုၵ်ႈ၊ သႅၼ်းၼႄတၢင်းႁၢင်ႈလီ ႁွႆႈပုင်းၾႆး 4 လုၵ်ႈ။ လိူဝ်ၼၼ်ႉ တေလႆႈမီး ပႃးႁူင်းၾႆးမိၼ် ယၢမ်းၵၢင်ဝၼ်းထႅင်ႈ၊ ဢမ်ႇႁဵတ်းဢမ်ႇလႆႈၼႆလႄႈ ၽူႈလူင်ႉလႅၼ်ႇႁဵတ်းႁူင်းၾႆးမိၼ် ၸိူဝ်းဝႄႈဢမ်ႇလွတ်ႈလႆႈၼၼ်ႉ ၵႃႈလႆႈႁၢင်ႈႁႅၼ်းႁူင်းၾႆးမိၼ်ယူႇ။ လိူဝ်ၼၼ်ႉ ၵူၼ်းမိူင်းၸိူဝ်းထုၵ်ႇ ၶၢၼ်းၵႂႃႇ ပတ်းၽဵဝ်ႈၵေႃႈ ဢွၼ်ၵၼ်ၵႂႃႇပတ်းၽဵဝ်ႈဝၢင်းဢဝုၺ်ႇယႃႇ ပၢင်ႇႁူင်းၾႆးမိၼ်ၼၼ်ႉ ယူႇၵူႈ ဝၼ်း။
ၼၢင်းသၢဝ်ၼၼ်ႉ သိုပ်ႇလၢတ်ႈ ၽူႈတွႆႇႁွၵ်ႈဝႃႈ – “ၼႂ်းပီၼႆႉ ၵူၼ်းမိူင်းတႆးပွတ်းႁွင်ႇသမ်ႉ ပၢႆႈၽေးသိုၵ်းသိူဝ် သေမႃးယူႇသဝ်းဝႆႉတီႈဝဵင်းတူၼ်ႈတီးၼႆႉ တင်းၼမ်။ ၽွင်းၶၢဝ်းဢွၵ်ႇဝႃႇ ၼၼ်ႉၵေႃႈ ဢွၼ်ၵၼ်ၵႂႃႇ ႁဵတ်းတၢင်းလီၵုသူလ် ၵူၼ်းၵိုၼ်းၶွၼ်ႈလူင်ဝႆႉ”- ဝႃႈၼႆ။
ယၢမ်းလဵဝ်သမ်ႉ သိုၵ်းမၢၼ်ႈ ၸႂ်ႉႁဵတ်းပွႆးႁူင်းၾႆးမိၼ်ထႅင်ႈ။ ၾၢႆႇၼိုင်ႈၵေႃႈ တႃႇႁဵတ်းပွႆးၼႆႉ သိုၵ်းမၢၼ်ႈသမ်ႉ ၵဵပ်းငိုၼ်းတီႈၶွမ်ႊပၼီႊ၊ ႁူင်းႁႅမ်းယႂ်ႇလႄႈ ၸဝ်ႈၵၢၼ်ၸဝ်ႈငၢၼ်းယႂ်ႇ၊ ၸဝ်ႈၶွင်ၵၢတ်ႇ၊ ႁၢၼ်ႉၶၢႆၶူဝ်း ယႂ်ႇၸိူဝ်းၼႆႉထႅင်ႈလူးၵွၼ်ႇ ဝႃႈၼႆ။
မိူဝ်ႈပီ 2023 ပူၼ်ႉမႃးၼႆႉၵေႃႈ သိုၵ်းမၢၼ်ႈ ၸႂ်ႉၵူၼ်းမိူင်းဝဵင်းတူၼ်ႈတီး ႁဵတ်းပွႆးလိူၼ်သိပ်းသွင် ၼင်ႇၵဝ်ႇ။ ၵူၼ်းမိူင်း ဢမ်ႇမီးတၢင်းသိူဝ်းၸႂ်လႄႈ ဢမ်ႇၶႂ်ႈႁဵတ်းပွႆး။ သိုၵ်းမၢၼ်ႈ ပၼ်ငိုၼ်း 300 သႅၼ်ပျႃးသေ ၸႂ်ႉႁဵတ်းပွႆး။ ၵူၺ်းၵႃႈ ဢမ်ႇမီးၵူၼ်းၶဝ်ႈပွႆး။ ၼၼ်ႉၵေႃႈ သိုၵ်းမၢၼ်ႈလႆႈၸၢင်ႈ ၵူၼ်းႁႃၵိၼ်ဝၼ်းလႂ်ဝၼ်းၼၼ်ႉ ၵႂႃႇပွႆး ၼိုင်ႈၵေႃႉ လႆႈငိုၼ်း 8 ႁဵင်ပျႃး ဝႃႈၼႆ။
ပၢင်ပွႆးႁူင်းၾႆးမိၼ် လိူၼ်သိပ်းသွင်မူၼ်းၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉလႄႈ ငဝ်းလၢႆးဝၢၼ်ႈမိူင်း ဢမ်ႇ ၼိမ်သဝ်းၼၼ်ႉသေ ဢမ်ႇလႆႈၸတ်းႁဵတ်း တႃႇၶၢဝ်းတၢင်း 2 ပီ။ သိုၵ်းမၢၼ်ႈ ၸင်ႇၶိုၼ်းတဵၵ်းၸႂ်ႉႁဵတ်းပွႆး ၶိုၼ်း ၼႂ်းပီ 2023 ပီၵၢႆ ၼႆႉၵူၺ်း။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ