ဝၼ်းတီႈ 28/10/2024 ယၢမ်းဝၢႆးဝၼ်းမွၵ်ႈ 2 မူင်း ၵႃးတၢင်ႇၵူၼ်းဝႆႈၽြႃး (Mini Bus) လမ်းၼိုင်ႈ ပဵၼ်ၽေးၵိုင်ႉၵၢင်ႉ ပိၼ်ႈတူၵ်းႁူၺ်ႈ ၼႂ်းၵႄႈသဵၼ်ႈတၢင်းယႂႃႇငၢၼ်ႇ – ႁၢၼ်ႇမိၼ်ႉမူဝ်ႇ ၼႂ်းၸႄႈဝဵင်းယႂႃႇငၢၼ်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။
ၽူႈၶဝ်ႈၸုမ်း ပရႁိတ ဝဵင်းယႂႃႇငၢၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵႃးၼႆႉ လုၵ်ႉတၢင်းႁၢႆးဝူဝ်း ၼၼ်ႉသေမႃး တေၵႂႃႇဝႆႈၽြႃး မၼ်းတလေးၼႆသေ မႃးပဵၼ်ၽေးၵိုင်ႉၵၢင်ႉ တူၵ်းႁူၺ်ႈၵႂႃႇ ဢၼ်မီးတၢင်းလိုၵ်ႉ 350 ထတ်း။ ၼႂ်း ၵႃးၼၼ်ႉ လူႉတၢႆ 7 ၵေႃႉ၊ မၢတ်ႇၸဵပ်း 17 ၵေႃႉ။ ၼႂ်းၵူၼ်းမၢတ်ႇၸဵပ်း 17 ၵေႃႉၼၼ်ႉ ဢၼ်မၢတ်ႇၸဵပ်းႁၢဝ်ႈႁႅင်းမီး 7 ၵေႃႉ”- ဝႃႈၼႆ။
ဢိင်ၼိူဝ် လွင်ႈၼႆႉသေ ယူႇတီႈ ၸုမ်းၸွႆႈထႅမ်ပရႁိတ ဝဵင်းယႂႃႇငၢၼ်ႇ လႆႈၵႂႃႇၸွႆႈတေႃႉဢဝ် ဢွၵ်ႇမႃးသူင်ႇ ၸူးတီႈႁူင်းယႃငၢၼ်ႇမူတ်းယဝ်ႉ။ လိူဝ်ၼၼ်ႉ ယူႇတီႈ ႁူင်းယႃယႂႃႇငၢၼ်ႇသေ ၶိုၼ်းသိုပ်ႇသူင်ႇၸူး တီႈႁူင်းယႃ ဝဵင်းလိူဝ်ႇ။
ၼႂ်းၵူၼ်းလူႉတၢႆ 7 ၵေႃႉၼၼ်ႉ ပဵၼ်ၸၢႆး 2 ၵေႃႉ ယိင်း 5 ၵေႃႉ။ ၼႂ်းၵူၼ်းမၢတ်ႇၸဵပ်း 17 ၵေႃႉၼၼ်ႉသမ်ႉ ပႃးလုၵ်ႈ ဢွၼ်ႇ 2 ၵေႃႉ – ၽူႈၶဝ်ႈၸုမ်း ပရႁိတ ဝဵင်းယႂႃႇငၢၼ်ႇလၢတ်ႈ။
ၵူၼ်းမိူင်း ဢၼ်မႃးပဵၼ်ၽေးၵိုင်ႉၵၢင်ႉ ယွၼ်ႉရူတ်ႉၵႃး ပိၼ်ႈတူၵ်းႁူၺ်ႈၼႆႉ ပဵၼ်ၵူၼ်းတၢင်းဝဵင်းတႃႈၵုင်ႈ မႃးႁူမ်ႈလူႇတၢၼ်း ပွႆးသၢင်ႇၵၢၼ်း(ၵထိၼ်ႇ) လိူၼ်သိပ်းသွင် တီႈႁၢႆးဝူဝ်းၼၼ်ႉသေ ပၼ်ႇမႃးတၢင်းဝဵင်းယႂႃႇငၢၼ်ႇ တေဢၢၼ်း ၵႂႃႇဝႆႉၽြႃး တီႈဝဵင်းလိူဝ်ႇ (မၼ်းတလေး) ယဝ်ႉ ၸင်ႇပူၼ်ႉမိူဝ်းတၢင်းတႃႇၵုင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ