မိူဝ်ႈၼႆႉ ဝၼ်းတီႈ 25/10/2024 ယၢမ်းဝၢႆးဝၼ်း 1 မူင်း သိုၵ်းမၢၼ်ႈ ဢဝ်ၶိူင်ႈမိၼ် မိူဝ်းပွႆႇမၢၵ်ႇထႅင်ႈ ႁိမ်းႁွမ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းၸၢႆး ယူႇဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မၢၵ်ႇတႄႉတိုၵ်ႉမႃးပွႆႇယူႇတိၵ်းတိၵ်း။ ႁဝ်းၶႃႈၵေႃႈ ပႆႇႁတ်းၵႂႃႇတူၺ်း တူၵ်းတိူဝ်ႉတီႈလႂ်တႄႉတႄႉ”– ဝႃႈၼႆ။

ၸုမ်းၸွႆႈထႅမ် ၵူၼ်းပိုၼ်ႉတီႈတႄႉ တႅမ်ႈတၢင်ႇဝႆႉဝႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ 4 လုၵ်ႈ လႅပ်ႈတေပဵၼ်တၢင်းမႄႈႁၢၼ်ႇ ၵူၼ်းမၢတ်ႇ တုမ်ႉတိူဝ်ႉတီႈလႂ်တႄႉပႆႇႁူႉ ၼႆယဝ်ႉ။

ဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉ ပိုၼ်ၽၢဝ်ႇဝႆႉဝႃႈ ၵုမ်းလႆႈဝႆႉ။ သိုၵ်းမၢၼ်ႈသမ်ႉ ဢဝ်ၶိူင်ႈမိၼ်မႃးပွႆႇမၢၵ်ႇ ဝၼ်းဝၼ်း ၶိုၼ်းၶိုၼ်းလႄႈ ၵူၼ်းမိူင်း ဢၼ်ပၢႆႈၽေးသိုၵ်းဝႆႉ ပႆႇၸၢင်ႈပွၵ်ႈယူႇႁိူၼ်းယေးၶိုၼ်း။ 

ၶိူင်ႈမိၼ်သိုၵ်းမၢၼ်ႈ ဢၼ်မႃးပွႆႇတီႈဝဵင်းလႃႈသဵဝ်ႈ မိူဝ်ႈၼႆႉ ပဵၼ်ၶိူင်ႈမိၼ် ဢၼ်လုၵ်ႉတီႈ ၶူင်ႇႁိူဝ်းမိၼ် တတႃးဢူးမႃးၼႆ Facebook page – Nas တႅမ်ႈတၢင်ႇဝႆႉၼင်ႇၼႆ။

မိူဝ်ႈဝၼ်းတီႈ 23/10/2024  ယၢမ်းၵၢင်ၼႂ် 8:35 မူင်း သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ တူၵ်းတီႈႁူင်းႁုင်လဝ်ႈ ဢၼ်မီးတီႈႁိမ်းဝၢၼ်ႈၼမ်ႉၶႆႉ။ ဢမ်ႇမီး ၵူၼ်းမိူင်းမၢတ်ႇၸဵပ်းလူႉတၢႆ။ 

တႄႇသိုၵ်းၵဝ်ႈၵၢင်ႉ ပိုၼ်ၽၢဝ်ႇဝႃႈ ၵုမ်းၵမ်လႆႈဝဵင်းလႃႈသဵဝ်ႈမႃး ၶၢဝ်းတၢင်း 3 လိူၼ်ၼႆႉ သိုၵ်းမၢၼ်ႈ မႃး ပွႆႇမၢၵ်ႇ ဢမ်ႇယွမ်း 25 ပွၵ်ႈယဝ်ႉ – ၵူၼ်းပိုၼ်ႉတီႈလၢတ်ႈၼင်ႇၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)