ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢၼ်ယိုတ်းဢႃႇၼႃႇၸိုင်ႈမိူင်းဝႆႉၼၼ်ႉ တီႉၺွပ်းလုၵ်ႈၶူၺ် ၸွမ်ၸိၵ်းသိုၵ်းမၢၼ်ႈၵဝ်ႇ ဢူးတၢၼ်းသူၺ်ႇသေ ၵူတ်ႇထတ်းဝႆႉယူႇ ယၢမ်းလဵဝ်။

ဝၼ်းတီႈ 23/10/2024 ယၢမ်းႁူဝ်ၶမ်ႈ ပလိၵ်ႈတႂ်ႈ သိုၵ်းမၢၼ်ႈ ယိုတ်းမိူင်း – တီႉၺွပ်း တွၵ်ႊတိူဝ်ႊ ၼေႇၸူဝ်းမွင်ႇ ဢၼ်ပဵၼ်လုၵ်ႈၶူၺ် ၸွမ်ၸိၵ်းသိုၵ်းမၢၼ်ႈၵေႃႉၵဝ်ႇ ဢူးတၢၼ်းသူၺ်ႇ။ ၺႃးတီႉၺွပ်း တီႈဝဵင်းလိူဝ်ႇ။ သိုၵ်းမၢၼ်ႈ ၼႄးဝႃႈ မၼ်းၸၢႆး တႅမ်ႈလိၵ်ႈသူၼ်းသေႃႇ ၼိူဝ်ႈၾဵတ်ႉသ်ပုၵ်ႉ ႁဵတ်းႁႂ်ႈလွင်ႈၵတ်း ယဵၼ်ၼိမ်တဵင်ႈ ၸိုင်ႈမိူင်း လူႉလႅဝ် ဝႃႈၼႆ။

ယၢမ်းလဵဝ်တႄႉ တိုၵ်ႉၵူတ်ႇထတ်းမၼ်းၸၢႆးဝႆႉ ယူႇတီႈ ႁူင်းပလိၵ်ႈ ဝဵင်းပျီႇၵျီးတၶုၼ်ႇ တိူင်းတႃႈလိူဝ်ႇ။ တေပၼ်တူတ်ႈတၢမ်ႇၸိူင်ႉႁိုဝ်တႄႉ ပႆႇပိုၼ်ၽၢဝ်ႇ။

တွၵ်ႊတိူဝ်ႊၼေႇၸူဝ်းမွင်ႇၼႆႉ ပဵၼ်လုၵ်ႈၶူၺ် သိုၵ်းမၢၼ်ႈ တၢၼ်းသူၺ်ႇလႄႈ တေႃႇၵျၢႆႇၵျၢႆႇ၊ ပဵၼ်ၽူဝ် လုၵ်ႈယိင်းလူင်ၶဝ် တေႃႇၵျီႇၵျီႇသူၺ်ႇ၊ တူဝ်မၼ်းၸၢႆးၵေႃႈ ပဵၼ်လုၵ်ႈၸၢႆး ဢူးတိၼ်ႇၸဵင်ႇ ၵႅမ်ၽွင်းလူင် ႁွင်ႈၵၢၼ် ၾၢႆႇၵႅတ်ႇၶႄ ၵေႃႉၵဝ်ႇ (ပၢၼ်သိုၵ်းမၢၼ်ႈ တၢၼ်းသူၺ်ႇ ၽွင်းငမ်းမိူင်း)၊ မၼ်းၸၢႆးပဵၼ်ပေႃႈ မွင်ႇ ၼေႇသူၺ်ႇတူၺ်းဢွင်ႇ (လၢၼ် ၸၢႆးႁၵ်ႉ သိုၵ်းမၢၼ်ႈ တၢၼ်းသူၺ်ႇ)။

တွၵ်ႊတိူဝ်ႊၼေႇၸူဝ်းမွင်ႇၼႆႉ ယၢမ်ႈပဵၼ် မေႃယႃ ၼႂ်းႁူင်းယႃ တပ်ႉသိုၵ်း ယၢမ်ႈမီးၸၼ်ႉတႃၶုၼ် ၸၼ်ႉၸဝ်ႈသိုၵ်း။ ယၢမ်းလဵဝ်တႄႉ လိုဝ်ႈၵၢၼ်တီႈႁူင်းယႃတပ်ႉသိုၵ်းသေ ၵႂႃႇႁၢပ်ႇၵၼ်ဝႆႉပဵၼ် ၶူးပူင်သွၼ်လူင် ပႃႇမွၵ်ႉၶၶျူၵ်ႉ ဝႆႉတီႈ ၸၼ်ႉၸွမ်ၾၢႆႇပၢႆးယူႇလီ တီႈဝဵင်းလိူဝ်ႇ။   

ပူၼ်ႉမႃးဝၼ်းတီႈ 7 ႁူဝ်လိူၼ်ဢွၵ်ႊထူဝ်ႊပိူဝ်ႊ မိူဝ်ႈတွၵ်ႊတိူဝ်ႊၸေႃႇမျိၼ်ႉမွင်ႇ (ၸွမ်ၽွင်းလူင်ၵဝ်ႇ တိူင်းတႃႈလိူဝ်ႇ ပၢၼ်လူင်ပွင်ၸိုင်ႈ ပႃႇတီႇၼူၵ်ႉယုင်း NLD ) လူႉတၢႆၼၼ်ႉ တွၵ်ႊတိူဝ်ႊ ၼေႇၸူဝ်းမွင်ႇ တႅမ်ႈတၢင်ႇတီႈ ၾဵတ်ႉသ်ပုၵ်ႉ သုၼ်ႇတူဝ်မၼ်းၸၢႆး – လႆႈပဵၼ်လွင်ႈတိူဝ်ႉၸႂ် ၵေႃႉဢၼ်ပဵၼ် ၶူးဝႃးဢႃးၵျၢၼ်မၼ်း တွၵ်ႊတိူဝ်ႊ ၸေႃႇမျိၼ်ႉမွင်ႇ ပဵၼ်ဢမ်ႇယူႇလီ ဢမ်ႇလႆႈတိုဝ်ႉတၢင်းယူတ်းယႃတူဝ်သေ လႆႈလူႉသဵင်ႈၵႂႃႇ ၽွင်းၺႃးတီႉၺွပ်း ယဵတ်ႈၶွၵ်ႈဝႆႉ။

မၼ်းၸၢႆးတႅမ်ႈဝႆႉပႃးဝႃႈ – ၸၢတ်ႈတေမႃး ပေႃးၵိူတ်ႇမႃးပဵၼ်ၵူၼ်းၶိုၼ်းၵေႃႈ ႁႂ်ႈၶူးဝႃးဢႃးၵျၢၼ် လႆႈၵိူတ်ႇ တီႈၸိုင်ႈမိူင်းဢၼ်မီးလွင်ႈလွတ်ႈလႅဝ်းၽဵင်ႇပဵင်း၊ ၸိုင်ႈမိူင်းဢၼ်ဝႆႉၵႃႈၶၼ် ၵူၼ်းသေလႄႈ ႁႂ်ႈလႆႈသိုပ်ႇႁဵတ်းၵၢၼ်လီ တွၼ်ႈတႃႇၵူၼ်းမိူင်းသေၵမ်း – ဝႃႈၼႆဝႆႉ။

တီႈဢၼ်မၼ်းၸၢႆးတႅမ်ႈတၢင်ႇ ဝႆႉၼၼ်ႉ မီးၽူႈဢၢၼ်ႇမႃးၶွမ်ႊမႅၼ်ႉဝႃႈ – “ၸွမ်ၸိၵ်းသိုၵ်းမၢၼ်ႈ တၢၼ်းသူၺ်ႇ ဢမ်ႇလၢတ်ႈ ဢမ်ႇသွၼ် မိၼ်းဢွင်ႇလၢႆႇႁႃႉ” ၼႆလႄႈ မၼ်းၸၢႆးၶိုၼ်းတွပ်ႇဝႆႉဝႃႈ – ”လဵတ်းတိင်ႇ ၸွမ်းၵူၼ်ႈၵႂၢႆးၵူၺ်း” – ၼႆ တီႈသိုဝ်ႇၶၢဝ်ႇ ဢီႊရႃႊဝတီႊ တႅမ်ႈတၢင်ႇဝႆႉၼင်ႇၼႆ။ လွင်ႈၼႆႉ ဝၢႆးမႃးၵေႃႈ လႆႈ ႁၼ်မၼ်းၸၢႆး မွတ်ႇပႅတ်ႈၶိုၼ်း – တႅမ်ႈဝႆႉပႃးၼင်ႇၼႆ။

မၼ်းၸၢႆးၼႆႉ ပဵၼ်လုၵ်ႈၶူၺ် သိုၵ်းမၢၼ်ႈၵဝ်ႇၵေႃႉၼိုင်ႈသေတႃႉ ၵႆႉလႆႈႁၼ်မၼ်းၸၢႆး တႅမ်ႈတၢင်ႇတီႈ ၾဵတ်ႉသ်ပုၵ်ႉ သုၼ်ႇတူဝ်မၼ်းၸၢႆး လွင်ႈဢမ်ႇႁၼ်လီၼိူဝ် သိုၵ်းမၢၼ်ႈ ယိုတ်းမိူင်း ယၢမ်းလဵဝ်။ ပူၼ်ႉမႃး ဢမ်ႇႁိုင် မိူဝ်ႈဝၼ်းတီႈ 3 ႁူဝ်လိူၼ်ၼႆႉၵေႃႈ မၼ်းၸၢႆးတႅမ်ႈတၢင်ႇဝႃႈ – ယွၼ်းသူးႁႂ်ႈၵူၼ်းမိူင်းမၢၼ်ႈ ၸဵဝ်းလႆႈယူႇၵတ်းယဵၼ် ႁႂ်ႈလႆႈပဵၼ်ၶမ်ႈ ၶိုၼ်း ဢၼ်ၼွၼ်းလပ်းလီ လူၺ်ႈဢမ်ႇမီးသဵင်ၶိူင်ႈမိၼ် ဢမ်ႇမီးသဵင်ပွႆႇ မၢၵ်ႇသေၵမ်း – ဝႃႈၼႆဝႆႉ။

 ဢၢင်ႈဢိင် – Irrawaddy, VOA