ယၢမ်းလဵဝ် တီႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်းၼႆႉ ဝၢႆးၼမ်ႉတဵင်းၼွင်းထူမ်ႈ ယွမ်းလူင်းၶိုၼ်းယဝ်ႉ ၵူၼ်းပိုၼ်ႉတီႈ တိုၵ်ႉထူပ်းလွင်ႈယၢပ်ႇၽိုတ်ႇ တႃႇၽဵဝ်ႈၶိုၼ်းၶီႈၵူမ်ႇၶီႈငႂ်ႈ ဢၼ်ၵိုတ်းၶမ်ဝႆႉ ၸွမ်းႁိူၼ်းယေးလႄႈ သဵၼ်ႈတၢင်း ၸိူဝ်းၼႆႉ။

ၵူၼ်းပိုၼ်ႉတီႈ ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ႁိူၼ်းယေးၵူၼ်းမိူင်း မိူၼ်ၼင်ႇ တၢင်းဝၢၼ်ႈတႃႈၾၢႆႇ ဢွၵ်ႇ၊ ဝၢၼ်ႈပူးၵၢမ်ႇ၊ ဝၢၼ်ႈပၢင်သၼွင်း၊ ဝၢၼ်ႈၼမ်ႉဢုၼ်ႇ ၸိူဝ်းၼႆႉ ပႆႇၸၢင်ႈဢဝ်ၶီႈၵူမ်ႇၶီႈငႂ်ႈ ဢွၵ်ႇတိုၵ်ႉၵိုတ်းဝႆႉ တင်းၼမ်။ ယွၼ်ႉဝႃႈ ၵူမ်ႇဢုင်ငႂ်ႈၸိူဝ်းၼႆႉ ႁႅင်ႈၸပ်းဝႆႉၸွမ်းသဵၼ်ႈတၢင်း၊ ၼႂ်းဝၢင်းႁိူၼ်းယေးၶႃႈဢေႃႈ”- ဝႃႈၼႆ။

သိုပ်ႇလၢတ်ႈဝႃႈ – “ပေႃးၾူၼ်တူၵ်းသမ်ႉ ၶိုၼ်းပိူဝ်ႉဢုင်ထႅင်ႈ တႃႇတေၽဵဝ်ႈၶိုၼ်းၵေႃႈ ဢမ်ႇမီးၸုမ်းလႂ် မႃးၸွႆႈထႅမ်ပၼ် လႆႈၸႂ်ယႂ်ႇ ႁႅင်းၵူၼ်းဝၢၼ်ႈလႄႈ ၵူၼ်းႁိမ်းႁွမ်း ၵမ်ႈၽွင်ႈ ႁူမ်ႈၵၼ်ၵဵပ်းၽဵဝ်ႈၵူၺ်း။ တႃႇတေၸၢင်ႈၵူၼ်း ဢဝ်ၶိူင်ႈၸၢၵ်ႈလူင် မႃးၽဵဝ်ႈပၼ်ၵေႃႈ ဢမ်ႇမီးငိုၼ်းၸၢင်ႈ”- ဝႃႈၼႆ။

တီႈဝဵင်းလၢင်းၶိူဝ်းၼႆႉ ၼမ်ႉယွမ်းလူင်းမီး 20 ဝၼ်းပၢႆယဝ်ႉ။ ပေႃးၼပ်ႉသွၼ်ႇတူၺ်း ဢၼ်တိုၵ်ႉၽဵဝ်ႈလၢင်ႉယဝ်ႉၼႆႉ တေမီးႁူဝ်ပၢၵ်ႇ 40 ပိူဝ်ႊသႅၼ်ႊၵူၺ်း။ ၵူၼ်းမိူင်းတႄႉ မုင်ႈမွင်းႁႂ်ႈႁွင်ႈၵၢၼ်ၾၢႆႇလူင်ပွင်ၸိုင်ႈလႄႈ ၽူႈမီးပုၼ်ႈၽွၼ်းၶဝ် မႃးၸွႆႈတူၺ်းလူ ၵဵပ်းၽဵဝ်ႈပၼ် ၸွမ်းသဵၼ်ႈတႃႇသၢႆတၢင်းလႄႈ ၼႂ်း ႁိူၼ်းယေးယူႇ ဝႃႈၼႆ။   

ၼႂ်းပီ 2024 ၼႆႉ တီႈဝဵင်းလၢင်းၶိူဝ်း ၼမ်ႉတဵင်းၶိုၼ်ႈ ၼွင်းထူမ်ႈႁိူၼ်းယေးလႄႈ သူၼ်ႁႆႈၼႃး ဢမ်ႇယွမ်းသၢမ်ပွၵ်ႈယဝ်ႉ။ ဢၼ်ထူမ်ႈႁႅင်းတႄႉ ပဵၼ်ၼႂ်းလိူၼ်သႅပ်ႊထႅမ်ႊပိူဝ်ႊ။ ႁိူၼ်းယေးၵူၼ်းမိူင်း ၺႃးၼမ်ႉလုပ်ႇၼွင်းထူမ်ႈႁဵင်ပၢႆ၊ သူၼ်ႁႆႈၼႃးၵူၼ်းမိူင်း မိူၼ်ၼင်ႇ ဢၼ်ၽုၵ်ႇဝႆႉဢွႆႈ၊ ၶဝ်ႈ၊ တူၼ်ႈယႃႈလႅင် ၸိူဝ်းၼႆႉ ၵေႃႈလူႉသုမ်းတင်းၼမ်။ ၵူၼ်းမိူင်းပိုၼ်ႉတီႈ မႆႈၸႂ်တႃႇႁႃၵိၼ်လဵင်ႉတွင်ႉလႄႈ တႃႇသိုပ်ႇႁဵတ်းသၢင်ႈၼႃႈ ၵၢၼ်ၵႂႃႇၶၢဝ်းမိူဝ်းၼႃႈ ၸိူဝ်းၼႆႉ။