ဝၢၼ်ႈမိူင်းဢမ်ႇၼိမ်သဝ်း သိုၵ်းမၢၼ်ႈဢဝ်ၶိူင်ႈမိၼ် မိူဝ်းပွႆႇမၢၵ်ႇၼႂ်း မိူင်းတႆးပွတ်းႁွင်ႇၵူႈဝၼ်း ၽွင်းၼင်ႇၼႆ မိူင်းတႆးပွတ်းၸၢၼ်း ဝဵင်းတူၼ်ႈတီးသမ်ႉ သိုၵ်းမၢၼ်ႈၸီႉသင်ႇ ႁႂ်ႈၸတ်းပွႆးလိူၼ်သိပ်းသွင် ႁူင်းၾႆးမိၼ် ၵိုၼ်းယႂ်ႇ ဝႃႈၼႆ။

သိုၵ်းမၢၼ်ႈ သင်ႇႁႂ်ႈႁဵတ်းပွႆးႁူင်းၾႆးမိၼ် ၼႂ်းဝၼ်းတီႈ 09/11/2024 တေႃႇထိုင် 15/11/2024 ၶၢဝ်းတၢင်း 7 ဝၼ်း ထပ်းၵၼ် ဝႃႈၼႆ။

ၵူၼ်းၸၢႆး ၽူႈလူင်ႉလႅၼ်ႇၾၢႆႇႁဵတ်းႁူင်းၾႆးမိၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ယွၼ်ႉပိူဝ်ႈဝႃႈ ၵူၼ်းမိူင်းတႆး ပွတ်းႁွင်ႇ ပၢႆႈၽေးသိုၵ်း မႃးသွၼ်ႈတူဝ်ယူႇ ၼႂ်းမိူင်းတႆးပွတ်းၸၢၼ်းလႄႈ ပွတ်းဢွၵ်ႇဝႃႇၼႆ ၸွမ်းဝတ်ႉဝႃးၽႃသိူဝ်ႇ ၵေႃႈ ၵိုၼ်းၶွၼ်ႈ၊ ရူတ်ႉၵႃး တိတ်းယိုတ်ႈယၢဝ်း”- ဝႃႈၼႆ။

ၼႂ်းဝဵင်းတူၼ်ႈတီး 22 ပွၵ်ႉၼႆႉ တေလႆႈႁူမ်ႈၵၼ်ႁဵတ်း ႁူင်းၾႆးမိၼ် ႁၢင်ႈလီယၢမ်းၵၢင်ၶိုၼ်း သႅၼ်းမီး မွၵ်ႇၾႆး 4 လုၵ်ႈ၊ သႅၼ်းၼႄတၢင်းႁၢင်ႈလီ 4 လုၵ်ႈ – သိုၵ်းမၢၼ်ႈ ၸီႉသင်ႇဝႆႉၼင်ႇၼႆ။

ႁူင်းၾႆးမိၼ် ယႂ်ႇႁၢင်ႈလီယၢမ်းၵၢင်ၶမ်ႈၼႆႉ ၼိုင်ႈလုၵ်ႈၵႃႈၶၼ် တေမီး 70 သႅၼ်ပျႃး၊ ၼႄတၢင်းႁၢင်ႈလီသမ်ႉ ၼိုင်ႈလုၵ်ႈ တေမီးၸမ် 40 သႅၼ်ပျႃး။

ယၢမ်းလဵဝ် တႃႇၵႄႈလိတ်ႈပၼ်ႁႃၵၢၼ်ႁႃလဵင်ႉတွင်ႉၵူၺ်းသမ်ႉ ပေႃးယၢပ်ႇယူႇယဝ်ႉ။ ယၢမ်းလဵဝ်သမ်ႉ ၸႂ်ႉႁဵတ်းႁူင်း ၾႆး ၵႃႈယႂ်ႇၶၼ်လူင် ပဵၼ်ဢၼ်ယၢပ်ႇၽိုတ်ႇ တႃႇၵူၼ်းမိူင်းတႄႉတႄႉ ဝႃႈၼႆ။

ၼၢင်းယိင်း ယူႇပွၵ်ႉသူၺ်ႇတွင်ႇ လၢတ်ႈတီႈၽူႈတွႆႇႁွၵ်ႈဝႃႈ -“ပွႆးတႄႉၸမ်ၼႃႇယဝ်ႉ ငိုၼ်းတႃႇတေသႂ်ႇ ဢၼ်ၶဝ်မႃးၵဵပ်း ၼၼ်ႉတႄႉဢမ်ႇမီး။ တႃႇတေႁႃၵိၼ်လဵင်ႉတွင်ႉပေႃးယၢပ်ႇၼႃႇယဝ်ႉ၊ ႁႂ်ႈဝႃႈၼိုင်ႈႁိူၼ်း သႂ်ႇၵႃႈၼႆႉၼႆတႄႉ ဢမ်ႇမီး၊ ႁိူၼ်းၵူၼ်း ဢၼ်မီးႁၢၼ်ႉၶၢႆၶူဝ်းၶွင်တႄႉ ၼိုင်ႈလင် တေလႆႈပၼ် 3 မိုၼ်ႇပျႃး၊ ငိုၼ်းၵေႃႈ ဢမ်ႇမီး ႁႃၵိၼ်တႃႇလဵင်ႉတွင်ႉၵေႃႈ ယၢပ်ႇၼႃႇ”- ဝႃႈၼႆ။

တႃႇႁႂ်ႈၾိင်ႈထုင်းဢမ်ႇႁၢႆၼၼ်ႉ ၵူၼ်းၼႂ်းပွၵ်ႉၼႂ်းယွမ်ႇၵူၺ်းဢမ်ႇၵႃး ပႃးၸဵမ်ၸဝ်ႈငိုၼ်းသႃး ၸဝ်ႈၶွင်ၶွမ်ႊပၼီႊလႄႈ ၸဝ်ႈၵၢၼ်ငၢၼ်းယႂ်ႇ ၸိူဝ်းၼႆႉ တေလႆႈႁူမ်ႈၵၼ်သႂ်ႇငိုၼ်း တႃႇႁဵတ်းႁူင်းၾႆးမိၼ် – သိုၵ်းမၢၼ်ႈလၢတ်ႈၼင်ႇၼႆ။ 

ယၢမ်းလဵဝ် ၵၢၼ်ႁႃၵိၼ်လဵင်ႉတွင်ႉၵိၼ်းၼႃႇလႄႈ ပေႃးပဵၼ်ပွႆးၵိုၼ်းၸိူင်ႉၼႆ ၸၢင်ႈမီးၵူၼ်းလၵ်ႉ ၵူၼ်းၸူၼ်ၼမ်ၼႆ ၵူၼ်းပိုၼ်ႉတီႈ လၢတ်ႈၼင်ႇၼႆ။

ၼၢင်းယိင်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “မီးၵူၼ်းတၢင်းပွတ်းႁွင်ႇ မႃးယူႇသဝ်းဝႆႉလႄႈ ယၢမ်းလဵဝ် တီႈတူၼ်ႈတီးၼႆႉ ၵိုၼ်းဝႃႈၵိုၼ်း။ ယွၼ်ႉၵူၼ်းၸေး၊ ၵၢၼ်သမ်ႉ ဢမ်ႇပေႃးလိူင်ႇ။ ၺႃးၵၢၼ်သင်ၵေႃႈ ၵႃႈလႆႈႁဵတ်းၵူႈမဵဝ်းယဝ်ႉၶႃႈ။ လိူၵ်ႈၵၢၼ်ဢမ်ႇလႆႈ။ လွင်ႈလၵ်ႉလွင်ႈၸူၼ် လွင်ႈၸူၵ်းၸၼ်ၵေႃႈ မီးၼမ်ဢေႃႈ”- ဝႃႈၼႆ။ 

မိူဝ်ႈပီ 2023 ပူၼ်ႉမႃးၼႆႉၵေႃႈ သိုၵ်းမၢၼ်ႈ ၸႂ်ႉၵူၼ်းမိူင်းဝဵင်းတူၼ်ႈတီး ႁဵတ်းပွႆးလိူၼ်သိပ်းသွင် ၼင်ႇၵဝ်ႇ။ ၵူၼ်းမိူင်း ဢမ်ႇမီးတၢင်းသိူဝ်းၸႂ်လႄႈ ဢမ်ႇၶႂ်ႈႁဵတ်းပွႆး။ သိုၵ်းမၢၼ်ႈ ပၼ်ငိုၼ်း 300 သႅၼ်ပျႃးသေ ၸႂ်ႉႁဵတ်းပွႆး။ ၵူၺ်းၵႃႈ ဢမ်ႇမီးၵူၼ်းၶဝ်ႈပွႆး။ ၼၼ်ႉၵေႃႈ သိုၵ်းမၢၼ်ႈလႆႈၸၢင်ႈ ၵူၼ်းႁႃၵိၼ်ဝၼ်းလႂ်ဝၼ်းၼၼ်ႉ ၵႂႃႇပွႆး ၼိုင်ႈၵေႃႉ လႆႈငိုၼ်း 8 ႁဵင်ပျႃး ဝႃႈၼႆ။ 

ပၢင်ပွႆးႁူင်းၾႆးမိၼ် လိူၼ်သိပ်းသွင်မူၼ်းၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉလႄႈ ငဝ်းလၢႆးဝၢၼ်ႈမိူင်းဢမ်ႇၼိမ်သဝ်း ၼၼ်ႉသေ ဢမ်ႇလႆႈၸတ်းႁဵတ်း တႃႇၶၢဝ်းတၢင်း 2 ပီ။ သိုၵ်းမၢၼ်ႈ ၸင်ႇၶိုၼ်းတဵၵ်းၸႂ်ႉႁဵတ်းပွႆး ၶိုၼ်းၼႂ်းပီ 2023 ပီၵၢႆ ၼႆႉၵူၺ်း။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)