မိူဝ်ႈၼႆႉ ဝၼ်းတီႈ 20/10/2024 ယၢမ်းၵၢင်ၼႂ်ၸဝ်ႉ 12:45 မူင်း (တဵင်ႈၶိုၼ်းၸၢႆႉ) သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝၢၼ်ႈၼမ်ႉႁူး ဝဵင်းၵုၼ်လူင် ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ တိူဝ်ႉၺႃးႁိူၼ်းၵူၼ်းဝၢၼ်ႈ လူႉ ၵွႆၼမ်။
ၵူၼ်းပိုၼ်ႉတီႈ ဝဵင်းၵုၼ်လူင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်း ၵူၼ်းၼွၼ်းလပ်းယဵၼ်ယူႇၼၼ်ႉ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ ၼႂ်းဝၢၼ်ႈၼမ်ႉႁူး ႁိမ်းဝတ်ႉမုၼ်ၸဝ်ႈၼႆႉ လုၵ်ႈၼိုင်ႈ တိူဝ်ႉၺႃးႁိူၼ်းယေးၵူၼ်းဝၢၼ်ႈ လူႉၵွႆလၢႆလင်ဢေႃႈ။ လူႉတုမ်ႉတိူဝ်ႉ ၵူၼ်းဝၢၼ်ႈမၢတ်ႇၸဵပ်းလူႉတၢႆတႄႉ ဢမ်ႇမီးၶႃႈ။ ယွၼ်ႉဝႃႈ ၵူၼ်းဝၢၼ်ႈ ဢွၼ်ၵၼ်ငိူင်ႉပၢႆႈ ၼွၼ်းဝႆႉ တၢင်ႈတီႈဢေႃႈ”- ဝႃႈၼႆ။
ဢိင်ၼိူဝ် လွင်ႈမၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇၼႆႉသေ သဵင်တႅၵ်ႇမၼ်း လင်ယွၼ်ႈထိုင် တၢင်းဝဵင်းႁူဝ်ပၢင်ႇ။ ႁဵတ်း ႁႂ်ႈၵူၼ်းမိူင်းတၢင်းပွတ်းႁူဝ်ပၢင်ႇ ဢွၼ်ၵၼ်တိုၼ်ႇသၢၼ်ႈၸွမ်း တင်းၼမ် ၼႆယဝ်ႉ။
မိူဝ်ႈဝႃး ဝၼ်းတီႈ 19 ယၢမ်းၵၢင်ၼႂ်ၸဝ်ႉ 1 မူင်းၶိုင်ႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ ၾၢႆႇဢွၵ်ႇဝဵင်းလၢဝ်ႇၵၢႆး လုၵ်ႈၼိုင်ႈ ပဵၼ်မၢၵ်ႇၼမ်ႉၼၵ်း 500 ပွင်ႇ တၢင်းၾၢႆႇတူၵ်းပွၵ်ႉတူင်ႊၶျိူင်ႊလႄႈ သူၼ်မွၵ်ႇ 311 ၼၼ်ႉ တိူဝ်ႉၺႃးႁိူၼ်းယေး ၵူၼ်းမိူင်းလူႉၵွႆၼမ်။
မိူဝ်ႈဝၼ်းတီႈ 02/08/2024 ၵေႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတီႈဝဵင်းလၢဝ်ႇၵၢႆး ယၢမ်းၵၢင်ၶိုၼ်း တူၵ်းတိူဝ်ႉသႂ်ႇႁူင်းယႃလႄႈ ႁိူၼ်းယေးၵူၼ်းမိူင်း ၼႂ်းပွၵ်ႉတူင်ႊၶျိူင်ႊၼင်ႇၵဝ်ႇ။ ၽွင်းၼၼ်ႉ ၵူၼ်းမိူင်းမၢတ်ႇၸဵပ်းလႄႈ လူႉတၢႆ 10 ပၢႆ။
မိူဝ်ႈဝၼ်းတီႈ 23/07/2024 ၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ တီႈပွၵ်ႉတူင်ႊၶျိူင်ႊၼႆႉ ၵူၺ်းၼင်ႇၵဝ်ႇ ၽွင်းၼၼ်ႉၵေႃႈ ၵူၼ်းမိူင်းတၢႆ 2 ၵေႃႉ မၢတ်ႇၸဵပ်း 3 ၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ