မိူဝ်ႈၼႆႉ ဝၼ်းတီႈ 20/10/2024 ယၢမ်းၵၢင်ၼႂ် 6:30 မူင်း ထိုင် 10:00 မူင်း တၵ်ႉၵႃႇသတ်ႉထႃး ႁူမ်ႈၵၼ်လူႇတၢၼ်း/ လွင်းသွမ်း ပွႆးၽြႃးလူင်းမိူင်း တႄႇဢဝ်ၼႃႈဝတ်ႉၽြႃးလူင် တေႃႇထိုင်ၾၢႆႇၸၢၼ်းၵၢတ်ႇ ၼႂ်းဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း သင်ၶၸဝ်ႈ လူင်းတုင်းသွမ်းမီး 1,250 တူၼ်။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ပွႆးၽြႃးလူင်းမိူင်း တီႈဝဵင်းလၢႆးၶႃႈ ၵိုၼ်းၶွၼ်ႈၶႃႈဢေႃႈ ။ ၵမ်ႈၼမ် တၵ်ႉၵႃႇၶဝ် လူႇတၢၼ်းလွင်းသွမ်း သင်ၶၸဝ်ႈ မိူၼ်ၼင်ႇ – ငိုၼ်းတွင်း၊ ၶဝ်ႈသၢၼ်၊ မၢၵ်ႇဢူမ်၊ ၵမ်ၸိုမ်း၊ ယႃႈယႃ၊ ၼမ်ႉသႂ်လႄႈ ၶဝ်ႈမုၼ်း ၸိူဝ်းၼႆႉ”- ဝႃႈၼႆ။

ပွႆးၽြႃးလူင်းမိူင်း တီႈဝဵင်းလၢႆးၶႃႈၼႆႉ ပေႃးထိုင်မႃးလိူၼ်သိပ်းဢဵတ်းလွင်ႈ 3 ၶမ်ႈၸိုင် ၸတ်းႁဵတ်းမႃးၵူႈပီ။ ပီၼႆႉ သင်ၶၸဝ်ႈ ၼႂ်းၸႄႈဝဵင်းလၢႆးၶႃႈ ၸဵမ်ၼႂ်းဝဵင်း/ ၼွၵ်ႈဝဵင်း ဢွၼ်ၵၼ်မႃးၶဝ်ႈႁူမ်ႈ တုင်းသွမ်းမွၵ်ႈ 1,250 တူၼ်။

တီႈတႄႉမၼ်းၼႆႉ ဝၼ်းၽြႃးလူင်းမိူင်းၼႆႉ ပဵၼ်ဝၼ်းလိူၼ်သိပ်းဢဵတ်းမူၼ်း။ ၵူၺ်းၵႃႈ မိူဝ်ႈၽွင်းၼၼ်ႉ ပဵၼ်ဝၼ်း ဢွၵ်ႇဝႃႇလႄႈ တၵ်ႉၵႃႇသတ်ႉထႃးၶဝ်ၵေႃႈ ဢမ်ႇတၼ်းသေ ၵုမ်ႇသုၵ်ႉသၵ်ႉ ယူႇတီႈဝတ်ႉၽႂ် ၵျွင်းမၼ်းလႄႈ ၸင်ႇလႆႈမႃးလိူၵ်ႈႁဵတ်း ၼႂ်းဝၼ်းလိူၼ်သိပ်းဢဵတ်းလွင်ႈ 3 ၶမ်ႈၼႆႉ ၵူႈပီယဝ်ႉ – ၸဝ်ႈတူၼ်ၶူး ပၼ်ႇတဝ ၽူႈၵွၼ်းဝတ်ႉပၢင်ႇ (ၵျွင်းပၢင်ႇ) ဝဵင်းလၢႆးၶႃႈ ယၢမ်းလၢတ်ႈဝႆႉတီႈၽူႈတွႆႇႁွၵ်ႈ မိူဝ်ႈပီ 2019 ၼၼ်ႉ ၼင်ႇၼႆ။