ပျီႇတူႉၸိတ်ႉပဢူဝ်း ဢၼ်တူင်ႉၼိုင်ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ယၢမ်းလဵဝ် တတ်းလွၵ်းလိၼ်ၵူၼ်းဝၢၼ်ႈ ၼႂ်းထုင်ႉတၢင်းၸၢၼ်းဝဵင်းသေ ပိုၼ်ၽၢဝ်ႇၶၢႆ။
ၵူၼ်းပိုၼ်ႉတီႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပျီႇတူႉၸိတ်ႉ ၸိူဝ်းၼႆႉ လၢတ်ႈတီႈၵူၼ်းဝၢၼ်ႈ ပေႃးမူ(ဝၢၼ်ႈပဢူဝ်း) ဝႃႈ တေသိူဝ်ႇတၢင်းပၼ်၊ တေတေႃႇသၢႆၾႆးၾႃႉၶဝ်ႈဝၢၼ်ႈ ပၼ်ၼႆသေ ယိုတ်းဝႆႉ တီႈလိၼ်ၵူၼ်းမိူင်း ၸဵမ်မိူဝ်ႈပီၵၢႆ (ပီ 2023)။ ယၢမ်းလဵဝ် ၼႂ်းပီၼႆႉ မီးၵူၼ်းမႃးထၢမ်သိုဝ်ႉၶိူဝ်းယႂ်းလႄႈ လွၵ်းလိၼ် ဢၼ်ယိုတ်းဝႆႉတီႈၵူၼ်းမိူင်းၼၼ်ႉ ၶဝ်တတ်းလွၵ်းသေၶိုၼ်းၶၢႆ”- ဝႃႈၼႆ။
တီႈလိၼ် ဢၼ်သိုၵ်းပျီႇတူႉၸိတ်ႉပဢူဝ်း ယိုတ်းၵႂႃႇၼၼ်ႉ ပဵၼ်တီႈလိၼ် ၽုၵ်ႇသွမ်ႈႁႃၵိၼ်လဵင်ႉတွင်ႉ ၵူၼ်းဝၢၼ်ႈ။ ဢၼ်ၺႃးယိုတ်းၵႂႃႇၼၼ်ႉ ၼပ်ႉႁူဝ်ႁဵင်ဢေႊၶိူဝ်ႊ။ ယၢမ်းလဵဝ် ၵူၼ်းဝၢၼ်ႈဢမ်ႇမီးတီႈၽုၵ်ႇသွမ်ႈလႄႈ ပဵၼ်ဢၼ်ယၢပ်ႇၽိုတ်ႇဝႆႉ။ ဢမ်ႇၸၢင်ႈၵႂႃႇတိူင်ႇလၢတ်ႈတီႈၽႂ်။
လွင်ႈၼႆႉ ယူႇတီႈ ၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူးတၢင်း ပျီႇတ်ႉၸိတ်ႉပဢူဝ်း PNO ယူႇၵေႃႈ ၵပ်းသိုပ်ႇဢမ်ႇလႆႈ။ ၵူၼ်းဝၢၼ်ႈပေႃးမူၼႆႉ ၽုၵ်ႇသွမ်ႈႁဵတ်းၵိၼ်ႁႃလဵင်ႉတွင်ႉပဵၼ်ပိူင်လူင်။ ဢၼ်ၽုၵ်ႇသွမ်ႈၼမ် သုတ်းတႄႉ ပဵၼ်ၶဝ်ႈၵၢပ်ႇလႄႈ ၶဝ်ႈ ဝႃႈၼႆ။
မိူၼ်ၼႆၼင်ႇၵဝ်ႇ မိူဝ်ႈပီၵၢႆ တီႈဝဵင်းသီႇသႅင်ႇၵေႃႈ ပျီႇတူႉၸိတ်ႉပဢူဝ်း PNO ယိုတ်းလိၼ်ၵူၼ်းမိူင်းလႄႈ ပဵၼ်ပၼ်ႁႃ ၵၼ်။ ၽွင်းၼၼ်ႉၵေႃႈ ၾၢႆႇတၢင်းပျီႇတူႉၸိတ်ႉ လွၵ်ႇငိုတ်ႈဢဝ်ငိုၼ်းဢိတ်းဢွတ်း ယဵတ်ႈပၼ်ၵူၼ်းဝၢၼ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ