သိုၵ်းမၢၼ်ႈၵဵပ်းၵႃႈၾႆးၾႃႉသုင်ၼႃႇလႄႈ ၵူၼ်းမိူင်းဝဵင်းတူၼ်ႈတီး ဢမ်ႇသိူဝ်းၸႂ်ႉၾႆးၾႃႉႁုင်ၵိၼ်ႁုင်ယမ်ႉ လႆႈသိုဝ်ႉၾိုၼ်း ထၢၼ်ႇၸႂ်ႉၵႃႈယႂ်ႇၵႃႈပႅင်း။
ဝၼ်းတီႈ 01/09/2024 မႃး ႁွင်ႈၵၢၼ်ၾၢႆႇႁႅင်းထၢတ်ႈၾႆးၾႃႉ ပိုၼ်ၽၢဝ်ႇဝႃႈ တေၵဵပ်းၵႃႈၸႂ်ႉၾႆးၾႃႉသုင်လိူဝ်ၵဝ်ႇ 2 ပုၼ်ႈ ။
ၼၢင်းယိင်းၵူၼ်းမိူင်းဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ – “ၾႆးၾႃ့ ဢၼ်ဢွၵ်ႇၼႂ်းမိူင်းႁဝ်း သမ့်ၶၢႆပၼ် ပိူၼ်ႈသေ ၊ ၵူၼ်းၼႂ်းမိူင်းသမ့် ဢမ်ႇလႆႈၾႆးၾႃႉၸႂ်ႉ ၊ တလဵဝ် ၾႆးသမ်ႉဢမ်ႇမႃးသေ ၵႃႈၸႂ်ႉၾႆးၾႃႉသမ်ႉလႆႈၸၢႆႇၵႃႈယႂ်ႇၶၼ်လူင်။ မိူဝ်ႈဢွၼ်တၢင်းတႄ့ လႆႈပၼ် 1 မိုၼ်ၼႆ့ ၵူၺ်း တလဵဝ် 4 မိုၼ်ႇဝႃႇဢမ်ႇယၢမ်ႈယိၼ်းသေပွၵ်ႈ ။ ပေႃးၾႆးမႃးၼႆ ၸႂ်ယႂ်ႇတႃႇထႅမ်ႁႅင်းၾူၼ်းၵူၺ်းယဝ်ႉ ။ တႃႇႁုင်ၵိၼ်ႁုင်ယမ်ႉတႄႉ လႆႈသိုဝ်ႉထၢၼ်ႇသိုဝ်ႉၾိုၼ်း မိူၼ်ပၢၼ်ၵွၼ်ႇပၢၼ်ဢွၼ်ပုၼ်ႉၵူၺ်းယဝ်ႉ ။ ”- ဝႃႈၼႆ ။
ယွၼ့်ၵႃႈၸႂ်ႉၾႆးၾႃႉ ၵႃႈယႂ်ႇၶၼ်သုင် ၵူဝ်ငိုၼ်းဢမ်ႇၵုမ်ႇထူၼ်ႈပေႃးၸႂ်ႉလႄႈ လႆႈပႅင်းယူႇပႅင်းၵိၼ် ။ ၾၢႆႇၼိုင်ႈ ငိုၼ်းၶဝ်ႈတင်းငိုၼ်းဢွၵ်ႇ ဢမ်ႇၽဵင်ႇၵၼ် လႄႈ ပဵၼ်ဢၼ်ယၢပ်ႇၸႂ်ဝႆ့ ဝႃႈၼႆ ။
ၸၢႆးမၢဝ်ႇ ဢၼ်ပိုတ်ႇႁၢၼ်ႉၶၢႆၶိူင်ႈ ၶွမ်ႊပိဝ်ႊတိူဝ်ႊ လၢတ်ႈၽူႈတွႆႇႁွၵ်ႈဝႃႈ -“ယွၼ့်ပိုတ်ႇပၢင်သွၼ်ဝႆ့လႄႈ ငိုၼ်းၶဝ်ႈငိုၼ်းဢွၵ်ႇဢမ်ႇၽဵင်ႇၵၼ် ။ တလဵဝ် ၵႃႈမီႊတိူဝ်ႊၾႆးၾႃႉသမ်ႉ ပုင်ႈၶိုၼ်ႈ 2 ပုၼ်ႈ မိူဝ်ႈဢွၼ် တၢင်းသဵင်ႈ 4 မိုၼ်ၵူၺ်း ၊ တလဵဝ် သဵင်ႈ 2 သႅၼ် ပၢႆ ။ သမ်ႉပေႃးတူၵ်းၸႂ် ၊ တႃႇႁုင်ၵိၼ်ယမ့်တႄ့ သိုဝ့်ဝႆ့ ထၢၼ် ၵူၺ်းယဝ့်” -ဝႃႈၼႆ ။
ပေႃးသိုၵ်းမၢၼ်ႈဢမ်ႇမူၼ်ႉမႄး ပိူင်ၽွင်းငမ်း၊ ၵုမ်ႇမိုင်ႉၶိုင်ၵၢၼ်သိုၵ်းသိူဝ်ယူႇၸိူင်ႉၼႆတိၵ်းတိၵ်းတႄႉၸိုင် ပၼ်ႁႃတၢင်ႇဢၼ်ၵေႃႈၸၢင်ႈတေယႂ်ႇမၢၵ်ႈမီးၼမ်မႃး၊ ဢမ်ႇၵႃးၵၢၼ်မိူင်းၵၢၼ်သိုၵ်းၵူၺ်း ၽေးသၽႃႇဝ ၵေႃႈၸၢင်ႈထူပ်းမႃးၵူႈသမ်ႇၵူႈပိူင်- မၼ်းၸၢႆးလၢတ်ႈၼင်ႇၼႆ။
ဢွၼ်တၢင်း တီႈတူၼ်ႈတီးထၢၼ်ႇၼိုင်ႈထူင် သိုဝ်ႉၶၢႆၵၼ် 1 မိုၼ်ႇပျႃး၊ ယၢမ်းလဵဝ် ထၢၼ်ႇ 1 ထူင် လႆႈပၼ် 3 မိုၼ်ႇပျႃး။ ၵူၼ်းမိူင်းလႆႈႁႃသိုဝ်ႉထၢၼ်ႇ ၾိုၼ်း၊ ၵႅတ်ႉသ်လႄႈ မၢၵ်ႇထၢၼ်ႇ Power bank ဝႆႉတင်းၼမ် ။
တႅမ်ႈ – ယိင်းသဵဝ်ႈၶၢဝ်( ၽူႈသိုဝ်ႇၶၢဝ်ႇၾိုၵ်းၵၢၼ် )
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ